ಕಪಿಲ್‌ದೇವ್‌ ನಿವಾಸದಲ್ಲಿ ಗೆಲುವಿನ ಪಾರ್ಟಿ

Team Udayavani, Feb 21, 2023, 7:43 AM IST

ಹೊಸದಿಲ್ಲಿ: ಎರಡೂ ಟೆಸ್ಟ್‌ಗಳಲ್ಲಿ ಪ್ರವಾಸಿ ಆಸ್ಟ್ರೇಲಿಯವನ್ನು ಮೂರೇ ದಿನಗಳಲ್ಲಿ ಬಗ್ಗುಬಡಿದ ಭಾರತದ ಸಾಹಸಕ್ಕೆ ಎಲ್ಲ ದಿಕ್ಕುಗಳಿಂದಲೂ ಪ್ರಶಂಸೆ ಗಳ ಸುರಿಮಳೆ ಆಗುತ್ತಿದೆ.

“ಬೋರ್ಡರ್‌-ಗಾವಸ್ಕರ್‌ ಟ್ರೋಫಿ’ಯನ್ನು ಉಳಿಸಿಕೊಂಡ ಖುಷಿಗಾಗಿ ಸಂಭ್ರ ಮಾಚರಣೆಗಳೂ ನಡೆಯುತ್ತಿವೆ. ಇದಕ್ಕೆ 1983ರ ವಿಶ್ವಕಪ್‌ ವಿಜೇತ ತಂಡದ ಸದಸ್ಯರೂ ಹೊರತಲ್ಲ.

ದ್ವಿತೀಯ ಟೆಸ್ಟ್‌ ಪಂದ್ಯವನ್ನು ರವಿವಾರವೇ ಗೆದ್ದ ಬಳಿಕ ಅಂದಿನ ವಿಶ್ವಕಪ್‌ ವಿಜೇತ ತಂಡದ ನಾಯಕ ಕಪಿಲ್‌ದೇವ್‌ ಅವರ ಹೊಸದಿಲ್ಲಿ ನಿವಾಸದಲ್ಲಿ ಅಂದಿನ ಹೀರೋಗಳೆಲ್ಲ ಸೇರಿ ಪಾರ್ಟಿ ನಡೆಸಿದರು. ಮದನ್‌ಲಾಲ್‌, ಕೀರ್ತಿ ಆಜಾದ್‌, ರವಿಶಾಸ್ತ್ರಿ, ಸುನೀಲ್‌ ಗಾವಸ್ಕರ್‌ ಅವರೆಲ್ಲ ಈ ಸಂಭ್ರಮದಲ್ಲಿ ಪಾಲ್ಗೊಂಡಿದ್ದರು.

“1983ರ ವಿಶ್ವಕಪ್‌ ವಿಜೇತ ತಂಡದ ದಿಲ್ಲಿ ಹುಡುಗರೊಂದಿಗೆ ಸೇರಿ ಕಪಿಲ್‌ದೇವ್‌ ನಿವಾಸದಲ್ಲಿ ಟೆಸ್ಟ್‌ ಗೆಲುವನ್ನು ಸಂಭ್ರಮಿಸಲಾಯಿತು. ಭರ್ಜರಿ ಔತಣ, ಅಮೋಘ ಮಾತುಕತೆ, ಅದ್ಭುತ ಸಂಜೆ…’ ಎಂಬುದಾಗಿ ಸುನೀಲ್‌ ಗಾವಸ್ಕರ್‌ ಪ್ರತಿಕ್ರಿಯಿಸಿದ್ದಾರೆ.

ಜತೆಗೊಂದು ಚಿತ್ರವನ್ನೂ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್‌ ಮಾಡಿದ್ದಾರೆ. ರವಿಶಾಸ್ತ್ರಿ ಕೂಡ ಟ್ವಿಟರ್‌ನಲ್ಲಿ ಒಂದು ಚಿತ್ರವನ್ನು ಹಾಕಿದ್ದಾರೆ.