ಯುನಿವರ್ಸ್‌ ಬಾಸ್‌’ ಖ್ಯಾತಿಯ ಕ್ರಿಸ್‌ ಗೇಲ್‌ ತವರಲ್ಲೇ ವಿದಾಯ!

Team Udayavani, Nov 29, 2021, 6:50 AM IST

ಕಿಂಗ್‌ಸ್ಟನ್‌ (ಜಮೈಕಾ): “ಯುನಿವರ್ಸ್‌ ಬಾಸ್‌’ ಖ್ಯಾತಿಯ ಕ್ರಿಸ್‌ ಗೇಲ್‌ ಅವರ ಅಂತಾರಾಷ್ಟ್ರೀಯ ಕ್ರಿಕೆಟಿನ ಬಹು ದೊಡ್ಡ ಅಭಿಲಾಷೆಯೊಂದು ಈಡೇರುವ ಸಾಧ್ಯತೆ ಇದೆ.

ಕಳೆದ ಟಿ20 ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ವೇಳೆ ವಿದಾಯದ ಸೂಚನೆ ನೀಡಿದ್ದ ಅವರು, ತವರಿನ ಕಿಂಗ್‌ಸ್ಟನ್‌ ಅಂಗಳದಲ್ಲಿ ವಿದಾಯ ಪಂದ್ಯವೊಂದನ್ನು ಆಡಬೇಕೆಂಬ ಆಸೆಯನ್ನು ವ್ಯಕ್ತಪಡಿಸಿದ್ದರು.

ಇದೀಗ ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಮಂಡಳಿ ಇಂಥದೊಂದು ಸಾಧ್ಯತೆಯನ್ನು ತೆರೆದಿರಿಸಿದೆ.

“ಹೌದು, ಇದೊಂದು ಅತ್ಯುತ್ತಮ ಯೋಜನೆ. ಗೇಲ್‌ ಅವರಿಗೆ ಗೌರವಯುತ ವಿದಾಯ ನೀಡಬೇಕಿದೆ. ಆದರೆ ವಿದಾಯ ಪಂದ್ಯದ ಬಗ್ಗೆ ನಾವಿನ್ನೂ ಯಾವುದೇ ಅಧಿಕೃತ ನಿರ್ಧಾರಕ್ಕೆ ಬಂದಿಲ್ಲ’ ಎಂಬುದಾಗಿ ಮಂಡಳಿಯ ಅಧ್ಯಕ್ಷ ರಿಕಿ ಸ್ಕೆರಿಟ್‌ ಹೇಳಿದ್ದಾರೆ.

ಇದನ್ನೂ ಓದಿ:ಮುಂಬಯಿ ಟೆಸ್ಟ್‌ ಪಂದ್ಯಕ್ಕೆ ಶೇ. 25 ವೀಕ್ಷಕರಿಗಷ್ಟೇ ಪ್ರವೇಶ

ಜನವರಿಯಲ್ಲಿ ವಿದಾಯ ಪಂದ್ಯ?
ಆದರೆ ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಮಂಡಳಿಯ ಸಿಇಒ ಜಾನಿ ಗ್ರೇವ್‌ ಮುಂದಿನ ಜನವರಿಯಲ್ಲಿ ಈ ಪಂದ್ಯದ ಸಾಧ್ಯತೆಯನ್ನು ತೆರೆದಿರಿಸಿದ್ದಾರೆ.

“ಐರ್ಲೆಂಡ್‌ ವಿರುದ್ಧ ಜನವರಿ ದ್ವಿತೀಯ ವಾರದಲ್ಲಿ ನಾವು 3 ಪಂದ್ಯಗಳ ಏಕದಿನ ಸರಣಿಯನ್ನು ಆಡಲಿದ್ದೇವೆ. ಈ ಸಂದರ್ಭದಲ್ಲಿ ಸಬೀನಾ ಪಾರ್ಕ್‌ನಲ್ಲಿ ಒಂದು ಟಿ20 ಪಂದ್ಯವನ್ನು ಆಯೋಜಿಸಿ ಕ್ರಿಸ್‌ ಗೇಲ್‌ ಅವರಿಗೆ ಶುಭ ವಿದಾಯ ಕೋರುವ ಯೋಜನೆ ಇದೆ’ ಎಂದಿದ್ದಾರೆ.