ಜೊಕೋವಿಕ್‌, ಕಿಕಿ ಬರ್ಟೆನ್ಸ್‌ ಚಾಂಪಿಯನ್ಸ್‌

Team Udayavani, Aug 21, 2018, 6:00 AM IST

ಸಿನ್ಸಿನಾಟಿ: ವಿಶ್ವ ನಂಬರ್‌ ವನ್‌ ಸಿಮೋನಾ ಹಾಲೆಪ್‌ ಅವರನ್ನು ಮೂರು ಸೆಟ್‌ಗಳ ಕಠಿನ ಹೋರಾಟದಲ್ಲಿ ಉರುಳಿಸಿದ ಹಾಲೆಂಡಿನ ಕಿಕಿ ಬರ್ಟೆನ್ಸ್‌ ಮತ್ತು ಸರ್ಬಿಯಾದ ನೊವಾಕ್‌ ಜೊಕೋವಿಕ್‌ ಅವರು ಸಿನ್ಸಿನಾಟಿ ಮಾಸ್ಟರ್ 1000 ಟೆನಿಸ್‌ ಕೂಟದ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ.

ಸೋಲಿನ ದವಡೆಯಿಂದ ಪಾರಾದ ವಿಶ್ವದ 17ನೇ ರ್‍ಯಾಂಕಿನ ಬರ್ಟೆನ್ಸ್‌ ಅಮೋಘ ರೀತಿಯಲ್ಲಿ ಆಡಿ ಹಾಲೆಪ್‌ ಅವರನ್ನು 2-6, 7-6 (8-6), 6-2 ಸೆಟ್‌ಗಳಿಂದ ಕೆಡಹಿದರು. ಈ ಮೂಲಕ ಹಾಲೆಪ್‌ ಅವರ ಸತತ 9 ಪಂದ್ಯ ಗೆಲುವಿನ ಸರಮಾಲೆಗೆ ಅಂತ್ಯ ಹಾಡಿದರು. ಹಾಲೆಪ್‌ ಕಳೆದ ವಾರ ನಡೆದ ಮಾಂಟ್ರಿಯಲ್‌ ಟೆನಿಸ್‌ ಕೂಟದ ಫೈನಲ್‌ನಲ್ಲಿ ಯುಎಸ್‌ ಚಾಂಪಿಯನ್‌ ಸ್ಲೋನ್‌ ಸ್ಟೀಫೆನ್ಸ್‌ ಅವರನ್ನು ಸೋಲಿಸಿದ್ದರು.

ಹಾಲೆಪ್‌ ಜತೆ ಬರ್ಟೆನ್ಸ್‌ ಇಷ್ಟರವರೆಗೆ ಐದು ಬಾರಿ ಸೆಣಸಾಟ ನಡೆಸಿದ್ದು ಎರಡನೇ ಗೆಲುವಿನ ಸಂಭ್ರಮ ಆಚರಿಸಿದ್ದಾರೆ. ಮೂರನೇ ಸೆಟ್‌ನಲ್ಲಿ ತನ್ನೆಲ್ಲ ಶಕ್ತಿಯನ್ನು ಕಳೆದುಕೊಂಡ ಹಾಲೆಪ್‌ ಸುಲಭವಾಗಿ ಬರ್ಟೆನ್ಸ್‌ಗೆ ಶರಣಾಗಿದ್ದರು.

ಜೊಕೋವಿಕ್‌ ಜಯಭೇರಿ
ಮಾಜಿ ನಂಬರ್‌ ವನ್‌ ರೋಜರ್‌ ಫೆಡರರ್‌ ಅವರನ್ನು 6-4, 6-4 ನೇರ ಸೆಟ್‌ಗಳಿಂದ ಸೋಲಿಸಿದ ನೊವಾಕ್‌ ಜೊಕೋವಿಕ್‌ ಸಿನ್ಸಿನಾಟಿ ಮಾಸ್ಟರ್ ಟೆನಿಸ್‌ ಕೂಟದ ಪ್ರಶಸ್ತಿ ಜಯಿಸಿದ್ದಾರೆ. ಈ ಮೂಲಕ ಜೊಕೋವಿಕ್‌ 1990ರಲ್ಲಿ ಎಟಿಪಿ ಸ್ಥಾಪನೆಯಾದ ಬಳಿಕ ಎಟಿಪಿಯ ಎಲ್ಲ 9 ಎಲೈಟ್‌ ಮಾಸ್ಟರ್ 1000 ಕೂಟದ ಪ್ರಶಸ್ತಿ ಜಯಿಸಿದ ಮೊದಲ ಟೆನಿಸ್‌ ತಾರೆಯಾಗಿದ್ದಾರೆ.

ಸಿನ್ಸಿನಾಟಿಯಲ್ಲಿ ಏಳು ಬಾರಿ ಚಾಂಪಿಯನ್‌ ಆಗಿದ್ದ ಫೆಡರರ್‌ ಯುಎಸ್‌ಗೆ ಪೂರ್ವಭಾವಿಯಾಗಿ ನಡೆಯುವ ಹಾರ್ಡ್‌ಕೋರ್ಟ್‌ ಕೂಟದ ಫೈನಲ್‌ನಲ್ಲಿ ಸೋತಿರುವುದು ಇದೇ ಮೊದಲ ಸಲವಾಗಿದೆ. 37ರ ಹರೆಯದ ಸ್ವಿಸ್‌ ತಾರೆ ತನ್ನ ಬಾಳ್ವೆಯ 99ನೇ ಪ್ರಶಸ್ತಿಯ ನಿರೀಕ್ಷೆಯಲ್ಲಿದ್ದರು. ಆದರೆ ನಾಲ್ಕು ಬಾರಿ ಡಬಲ್‌ ಫಾಲ್ಟ್ ಮಾಡುವ ಮೂಲಕ ಪ್ರಶಸ್ತಿ ಗೆಲ್ಲುವ ಅವಕಾಶ ಕಳೆದುಕೊಂಡರು.