ಕೊಪಾ ಅಮೆರಿಕ ಫ‌ುಟ್‌ಬಾಲ್‌: ಉರುಗ್ವೆ 4-0 ಗೆಲುವು

ಕತಾರ್‌-ಪರಗ್ವೆ ಪಂದ್ಯ 2-2 ಡ್ರಾ ; 10 ಸದಸ್ಯರ ಇಕ್ವಾಡೋರ್‌ಗೆ ಆಘಾತ

Team Udayavani, Jun 18, 2019, 5:00 AM IST

ಬೆಲೊ ಹಾರಿಝಾಂಟೆ: ಅಮೋಘ ಪ್ರದರ್ಶನ ನೀಡಿದ ಉರುಗ್ವೆ ತಂಡ ಕೊಪಾ ಅಮೆರಿಕ ಫ‌ುಟ್‌ಬಾಲ್‌ ಪಂದ್ಯಾಟದಲ್ಲಿ 10 ಸದಸ್ಯರ ಇಕ್ವಾಡೋರ್‌ ತಂಡದ ವಿರುದ್ಧ 4-0 ಗೋಲುಗಳ ಭರ್ಜರಿ ಗೆಲುವು ದಾಖಲಿಸಿದೆ.

ಪಂದ್ಯ ಆರಂಭವಾದ ಆರನೇ ನಿಮಿಷದಲ್ಲಿ ನಿಕೋಲಾಸ್‌ ಲೊಡೈರೊ ಗೋಲಿನ ಖಾತೆ ತೆರೆದಿದ್ದರು. ಈ ನಡುವೆ ಕೈಯಿಂದ ಚೆಂಡನ್ನು ಹೊಡೆದ ಕಾರಣಕ್ಕಾಗಿ ಇಕ್ವಾಡೋರ್‌ನ ಫ‌ುಲ್‌ ಬ್ಯಾಕ್‌ ಜೋಸ್‌ ಕ್ವಿಂಟೆರೊ ಅವರನ್ನು ಹೊರಗೆ ಕಳುಹಿಸಲಾಯಿತು.

ಮೊದಲ ಅವಧಿಯಲ್ಲಿ ಉರುಗ್ವೆ ಆಟ ಗಾರರು ಪ್ರಬಲ ಹೋರಾಟ ಸಂಘಟಿಸಿದ್ದರು. 33ನೇ ನಿಮಿಷದಲ್ಲಿ ಎಡಿನ್ಸನ್‌ ಕವಾನಿ ಏಳು ಯಾರ್ಡ್‌ ದೂರದಿಂದ ಬೈಸಿಕಲ್‌ ಕಿಕ್‌ ಮೂಲಕ ಅದ್ಭುತ ಗೋಲು ಹೊಡೆದರು.

ಗೆಲುವು ಸಾಧಿಸಿರುವುದು ಅತಿಮುಖ್ಯವಾದ ವಿಷಯ. ನಾವೀಗ ಮುಂದಿನ ಪಂದ್ಯಕ್ಕೆ ಸಿದ್ಧರಾ ಗಬೇಕು ಎಂದು ಲೂಯಿಸ್‌ ಸೂರೆಜ್‌ ಹೇಳಿದ್ದಾರೆ. ಉರುಗ್ವೆ ಮುಂದಿನ ಪಂದ್ಯದಲ್ಲಿ ಜಪಾನ್‌ ತಂಡವನ್ನು ಎದುರಿಸಲಿದೆ.

ಕತಾರ್‌: ಹಿನ್ನಡೆ ಬಳಿಕ ಡ್ರಾ
ಕೊಪಾ ಅಮೆರಿಕ ಪಂದ್ಯಾಟದಲ್ಲಿ ಇದೇ ಮೊದಲ ಬಾರಿ ಆಡುತ್ತಿರುವ ಏಶ್ಯನ್‌ ಚಾಂಪಿ ಯನ್‌ ಕತಾರ್‌ ತಂಡ 0-2 ಹಿನ್ನಡೆ ಬಳಿಕ ವೀರೋಚಿತ ಹೋರಾಟ ನೀಡಿ ಪರಗ್ವೆ ವಿರುದ್ಧ 2-2 ಗೋಲುಗಳಿಂದ ಡ್ರಾ ಸಾಧಿಸಲು ಯಶಸ್ವಿಯಾಗಿದೆ.

ಆಸ್ಕರ್‌ ಕಾಡೋìಜೊ ಅವರ ಪೆನಾಲ್ಟಿ ಮತ್ತು ಡೆರ್ಲಿಸ್‌ ಗೊನ್ಸಾಲೆಸ್‌ ಅವರ ಅದ್ಭುತ ಗೋಲಿನಿಂದ ಪರಗ್ವೆ 2-0 ಮುನ್ನಡೆ ಸಾಧಿಸಿತ್ತು. ಆದರೆ ಅಂತಿಮ ಕ್ವಾರ್ಟರ್‌ನಲ್ಲಿ ಅಲ್ಮೋಜ್‌ ಅಲಿ ಮತ್ತು ಕೌಖೀ ಅವರ ಗೋಲನಿಂದ ಕತಾರ್‌ ಡ್ರಾ ಸಾಧಿಸುವಲ್ಲಿ ಯಶಸ್ವಿಯಾಯಿತು.

“ಇದೊಂದು ನೈಜ ಫ‌ಲಿತಾಂಶ. ನಾವು ಗಳಿಸಿದ ಅಂಕಕ್ಕೆ ಅರ್ಹರಾಗಿದ್ದೇವೆ’ ಎಂದು ಕತಾರ್‌ ತಂಡದ ಕೋಚ್‌ ಫೆಲಿಕ್ಸ್‌ ಸ್ಯಾಂಚೆಸ್‌ಅವರು ಹೇಳಿದ್ದಾರೆ.