ಕೋವಿಡ್‌-19 ಎನ್ನುವುದು ಟೆಸ್ಟ್‌ ಪಂದ್ಯವಿದ್ದಂತೆ: ಅನಿಲ್‌ ಕುಂಬ್ಳೆ

Team Udayavani, May 9, 2020, 7:59 PM IST

ಬೆಂಗಳೂರು: ದೇಶಾದ್ಯಂತ ನಡೆಯುತ್ತಿರುವ ಕೋವಿಡ್‌-19 ವೈರಸ್‌ ವಿರುದ್ಧದ ಹೋರಾಟ ಟೆಸ್ಟ್‌ ಮ್ಯಾಚ್‌ ಇದ್ದಂತೆ, ದೇಶದ ಪ್ರತಿಯೊಬ್ಬ ನಾಗರಿಕರು ಜತೆಗೂಡಿ ವಿಜಯಶಾಲಿಯಾಗಿ ಹೊರಹೊಮ್ಮಬೇಕು ಎಂದು ಭಾರತ ತಂಡದ ಮಾಜಿ ಸ್ಪಿನ್‌ ದಿಗ್ಗಜ ಅನಿಲ್‌ ಕುಂಬ್ಳೆ ಹೇಳಿದ್ದಾರೆ.

ಕೋವಿಡ್‌-19 ವೈರಸ್‌ ವಿರುದ್ಧ ನಾವೆಲ್ಲರೂ ಜತೆಗೂಡಿ ಹೋರಾಟ ನಡೆಸಬೇಕು. ಕೋವಿಡ್‌-19 ಒಂದು ರೀತಿ ಐದು ದಿನಗಳ ಟೆಸ್ಟ್‌ ಪಂದ್ಯವಿದ್ದಂತೆ. ದೀರ್ಘ‌ಕಾಲ ಆಡುವಂತಹ ಪಂದ್ಯ ಇದಾಗಿದೆ ಎಂದು ತಮ್ಮ ಅಧಿಕೃತ ಟ್ವಿಟರ್‌ಖಾತೆಯಲ್ಲಿ ವೀಡಿಯೋದಲ್ಲಿ ಕುಂಬ್ಳೆ ತಿಳಿಸಿದ್ದಾರೆ.

ಟೆಸ್ಟ್‌ ಪಂದ್ಯ ಎರಡು ಇನ್ನಿಂಗ್ಸ್‌ಗಳನ್ನು ಒಳಗೊಂಡಿರುತ್ತದೆ. ಆದರೆ, ಕೋವಿಡ್‌-19 ಹೋರಾಟದಲ್ಲಿ ಇದಕ್ಕಿಂತ ಹೆಚ್ಚು ಇನ್ನಿಂಗ್ಸ್‌ಗಳಿರುತ್ತವೆ ಆದ್ದರಿಂದ ಮೊದಲ ಇನ್ನಿಂಗ್ಸ್‌ನಲ್ಲಿ ನಾವು ಮುನ್ನಡೆ ಸಾಧಿಸಿದ್ದೇವೆಂದು ಬೀಗುವುದು ಬೇಡ. ಏಕೆಂದರೆ, ದ್ವಿತೀಯ ಇನ್ನಿಂಗ್ಸ್‌ ಅದಕ್ಕಿಂತಲೂ ಅತ್ಯಂತ ಕಠಿನವಾಗಿರುತ್ತದೆ ಎಂದು ಕುಂಬ್ಳೆ ಜನರಿಗೆ ಎಚ್ಚರಿಕೆಯ ಸಂದೇಶವನ್ನು ನೀಡಿದ್ದಾರೆ.

“ಕೋವಿಡ್‌-19 ಎಂಬ ಪಂದ್ಯವನ್ನು ನಾವು ಗೆಲ್ಲಲೇಬೇಕು. ಆದ್ದರಿಂದ ಅಧಿಕಾರಿಗಳು ನೀಡಿದ ಸೂಚನೆಗಳನ್ನು ಶ್ರದ್ಧೆಯಿಂದ ಪಾಲಿಸಬೇಕು ಮತ್ತು ಜವಾಬ್ದಾರಿಯುತವಾಗಿ ನಡೆದುಕೊಳ್ಳಬೇಕು ಎಂದು ಕುಂಬ್ಳೆ ಜನರಲ್ಲಿ ಒತ್ತಾಯ ಮಾಡಿದ್ದಾರೆ.

“ಎಲ್ಲ ಕೋವಿಡ್‌-19ಯೋಧರಿಗೆ ಧನ್ಯವಾದ ಹೇಳಲು ಈ ಅವಕಾಶವನ್ನು ಬಳಸಿಕೊಳ್ಳುತ್ತೇನೆ. ವೈದ್ಯರು, ನರ್ಸ್‌ಗಳು, ಪೌರ ಕಾರ್ಮಿಕರು, ಸ್ವಯಂಸೇವಕರು, ಪೊಲೀಸರು ಈ ರೋಗವನ್ನು ಹೊಡೆದೋಡಿಸುವಲ್ಲಿ ಹಗಲು ರಾತ್ರಿ ಎನ್ನದೆ ಕಾರ್ಯನಿರ್ವಹಿಸುತ್ತಿದ್ದಾರೆ. ನಿಜಕ್ಕೂ ಇವರೆಲ್ಲರ ಸೇವೆ ಶ್ರೇಷ್ಠವಾದುದು. ಇವರೆಲ್ಲರಿಗೂ ಹ್ಯಾಟ್ಸಾಪ್‌ ಎಂದು ಅನಿಲ್‌ ಕುಂಬ್ಳೆ ಹೇಳಿದ್ದಾರೆ.