Cricket; ತೀರ್ಪು ಪ್ರಕಟಿಸಲು ಸುಲಭ: ಡಿಆರ್‌ಎಸ್‌ ಅಲ್ಲ,ಎಸ್‌ಆರ್‌ಎಸ್‌!

Team Udayavani, Mar 21, 2024, 6:10 AM IST

ಮುಂಬಯಿ: ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ ಈ ಐಪಿಎಲ್‌ನಿಂದಲೇ ಸ್ಮಾರ್ಟ್‌ ರೀಪ್ಲೇ ಸಿಸ್ಟಮ್‌ (ಎಸ್‌ಆರ್‌ಎಸ್‌) ಪರಿಚಯಿಸಲಿದೆ. ಪ್ರಮುಖ ಸಂದರ್ಭಗಳಲ್ಲಿ ಅಂಪಾಯರ್‌ ನಿರ್ಧಾರ ಪ್ರಕಟಿಸುವಾಗ ವೇಗ ಮತ್ತು ನಿಖರತೆ ಹೆಚ್ಚಿಸುವ ನಿಟ್ಟಿನಲ್ಲಿ ಹೊಸ ವ್ಯವಸ್ಥೆಯನ್ನು ಪರಿಚಯಿಸಲಾಗುತ್ತದೆ ಎಂದು ವರದಿಗಳು ಹೇಳಿವೆ.

ವರದಿಯ ಪ್ರಕಾರ, ಕಂಪ್ಯೂಟರ್‌ ವಿಶನ್‌ ಭಾಗದಲ್ಲಿರುವ ಎಂಟು (ಹಾಕ್‌ ಐ) ಹೈಸ್ಪೀಡ್‌ ಕ್ಯಾಮರಾಗಳು ಮೈದಾನದ ಸುತ್ತಲೂ ಹದ್ದಿನ ಕಣ್ಣಿಟ್ಟು ಕಾಯಲಿವೆ. ಈ ವಿಭಾಗದಲ್ಲಿರುವ ಇಬ್ಬರು ನಿರ್ವಾಹಕರು ಟಿವಿ ಅಂಪಾರ್‌ಗಳ ಜತೆ ಕಾರ್ಯ ನಿರ್ವಹಿಸುತ್ತಾರೆ. ಹೀಗಾಗಿ, ಆಟದ ಎಲ್ಲಾ ಮೂಲೆಗಳ ಚಿತ್ರಣ ಸಿಗುವುದರಿಂದ ಟಿವಿ ಅಂಪಾಯರ್‌ ನಿರ್ಧಾರ ಪ್ರಕಟಿಸುವಾಗ ಗೊಂದಲದ ಸನ್ನಿವೇಶ ಸೃಷ್ಟಿಯಾಗದಂತೆ ಇವು ನೆರವಾಗುತ್ತವೆ.

ತೀರ್ಪು ಪ್ರಕಟಿಸಲು ಸುಲಭ
ಉದಾಹರಣೆಗೆ; ಪಂದ್ಯಗಳ ವೇಳೆ ಫೀಲ್ಡರ್‌ ಒಬ್ಬ ಬೌಂಡರಿ ಲೈನ್‌ ಬಳಿ ಕ್ಯಾಚ್‌ ಪಡೆದಾಗ, ಆತನ ಕಾಲು ಬೌಂಡರಿ ಲೈನ್‌ ತಾಗಿದೆಯೇ ಇಲ್ಲವೇ ಎಂದು ನಿರ್ಧರಿಸಲು ಕೆಲವೊಮ್ಮೆ ಸವಾಲೆನಿಸುತ್ತಿತ್ತು. ಆದರೆ ಹೊಸ ವ್ಯವಸ್ಥೆಯಿಂದ ಇಂಥ ಸಂದರ್ಭಗಳಲ್ಲಿ ತೀರ್ಪು ಪ್ರಕಟಿಸಲು ಸುಲಭವಾಗಲಿದೆ ಎನ್ನಲಾಗಿದೆ.