ಕ್ರಿಕೆಟ್‌: ಉಳ್ಳಾಲ ತಂಡಕ್ಕೆ ಕೆಎಸ್‌ಸಿಎ ಟ್ರೋಫಿ

Team Udayavani, Feb 28, 2018, 7:30 AM IST

ಮಂಗಳೂರು: ಕೆಎಸ್‌ಸಿಎ ಆಶ್ರಯದಲ್ಲಿ ನಡೆದ ಪ್ರಥಮ ವಿಭಾಗದ ಲೀಗ್‌ ಕಂ ನಾಕೌಟ್‌ ಕ್ರಿಕೆಟ್‌ ಕೂಟದ ಫೈನಲ್‌ನಲ್ಲಿ ಆಳ್ವಾಸ್‌ ತಂಡವನ್ನು 81 ರನ್ನುಗಳಿಂದ ಸೋಲಿಸಿದ ಉಳ್ಳಾಲ ನ್ಪೋರ್ಟ್ಸ್ಅ ಕಾಡೆಮಿ (ಯುಸಿಎ) ತಂಡವು ಕೆಎಸ್‌ಸಿಎ ಟ್ರೋಫಿಯನ್ನು ಗೆದ್ದು ಕೊಂಡಿತು. ವಿಜೇತ ಉಳ್ಳಾಲ ತಂಡ ಟ್ರೋಫಿ ಮತ್ತು 75 ಸಾವಿರ ರೂ. ನಗದು ಪಡೆದರೆ ರನ್ನರ್‌ ಅಪ್‌ ಆಳ್ವಾಸ್‌ 60 ಸಾವಿರ ರೂ. ಪಡೆಯಿತು.

ಮೊದಲು ಬ್ಯಾಟಿಂಗ್‌ ಮಾಡಿದ ಉಳ್ಳಾಲ ತಂಡವು ರೋಶನ್‌ ಶೆಟ್ಟಿ ಮತ್ತು ನಿಶಿತ್‌ರಾಜ್‌ ಅವರ ಉಪಯುಕ್ತ ಆಟದಿಂದಾಗಿ 5 ವಿಕೆಟಿಗೆ 291 ರನ್‌ ಪೇರಿಸಿತು. ರೋಶನ್‌ ಮತ್ತು ನಿಶಿತ್‌ ಮೊದಲ ವಿಕೆಟಿಗೆ 168 ರನ್ನುಗಳ ಜತೆಯಾಟದಲ್ಲಿ ಪಾಲ್ಗೊಂಡರು. ನಿಶಿತ್‌ 78 ರನ್ನಿಗೆ ಔಟಾದರೆ ರೋಶನ್‌ 112 ರನ್‌ ಗಳಿಸಿ ಮಿಂಚಿದರು. ಮುಶಾಹಿರ್‌ 38 ರನ್ನಿಗೆ 4 ವಿಕೆಟ್‌ ಪಡೆದರು.

ಗೆಲ್ಲಲು ಕಠಿನ ಗುರಿ ಪಡೆದ ಆಳ್ವಾಸ್‌ ತಂಡವು ಆರಂಭದಲ್ಲಿಯೇ ಕುಸಿಯಿತು. ಐಪಿಎಲ್‌ ಮತ್ತು ರಾಜ್ಯಮಟ್ಟದ ಆಟ ಗಾರರು ತಂಡದಲ್ಲಿದ್ದರೂ ಆಳ್ವಾಸ್‌ 39ನೇ ಓವರಿನಲ್ಲಿ 210 ರನ್ನಿಗೆ ಆಲೌಟಾಗಿ ಶರಣಾಯಿತು. ರಾಜೀವ್‌ 68 ರನ್‌ ಹೊಡೆದರೆ ರಿತೇಶ್‌ ಭಟ್ಕಳ ಮತ್ತು ಮನೋಜ್‌ ತಲಾ 23 ರನ್‌ ಗಳಿಸಿದರು.