ವಿಶ್ವ ಫ‌ುಟ್ಬಾಲಿಗ ಪ್ರಶಸ್ತಿ: ರೊನಾಲ್ಡೊ,ಮೆಸ್ಸಿ, ನೇಯ್ಮರ್‌ ಕದನ

Team Udayavani, Sep 24, 2017, 6:20 AM IST

ಲಂಡನ್‌: ಫಿಫಾ ವಿಶ್ವ ಶ್ರೇಷ್ಠ ಫ‌ುಟ್ಬಾಲ್‌ ಆಟಗಾರ ಪ್ರಶಸ್ತಿಗೆ ಪಟ್ಟಿಯನ್ನು ಅಂತಿಮಗೊಳಿಸಲಾಗಿದೆ. ಖ್ಯಾತ ಫ‌ುಟ್ಬಾಲ್‌ ಆಟಗಾರರಾದ ಕ್ರಿಸ್ಟಿಯಾನೊ ರೊನಾಲ್ಡೊ, ಲಿಯೋನೆಲ್‌ ಮೆಸ್ಸಿ  ಅವರ ಜತೆ ಬ್ರಝಿಲ್‌ನ ಸೂಪರ್‌ ತಾರೆ 25ರ ಹರೆಯದ ನೇಯ್ಮರ್‌ ಪ್ರಶಸ್ತಿ ಗೆಲ್ಲಲು ಪೈಪೋಟಿ ನಡೆಸಲಿದ್ದಾರೆ.

ಈ ಮೂವರು ಫ‌ುಟ್ಬಾಲಿಗರು ತಾರಾ ಆಟಗಾರರಾಗಿದ್ದು ಅಪಾರ ಅಭಿಮಾನಿಗಳನ್ನು ಹೊಂದಿದ್ದಾರೆ. ಅತೀ ಹೆಚ್ಚು ಸಂಭಾವನೆ ಪಡೆಯುವ ಆಟಗಾರರೂ ಆಗಿದ್ದಾರೆ. ಕಳೆದ ವರ್ಷ 32ರ ಹರೆಯದ ರೊನಾಲ್ಡೊ  ನೇತೃತ್ವದ ರಿಯಲ್‌ ಮ್ಯಾಡ್ರಿಡ್‌ ತಂಡವು ಲಾ ಲಿಗಾ ಪ್ರಶಸ್ತಿ ಮತ್ತು ಮೂರನೇ ಬಾರಿ ಚಾಂಪಿಯನ್‌ ಲೀಗ್‌ನಲ್ಲಿ ಭಾರೀ ಯಶಸ್ಸು ಸಾಧಿಸಿತ್ತು. ಹಾಗಾಗಿ ಅವರೇ ಪ್ರಶಸ್ತಿ ಗೆಲ್ಲುವ ಫೇವರಿಟ್‌ ಆಟಗಾರರಾಗಿದ್ದಾರೆ.   ರೊನಾಲ್ಡೊ ಕಳೆದ ವರ್ಷ ಸಹಿತ ಒಟ್ಟು 4 ಬಾರಿ ಈ ಪ್ರಶಸ್ತಿ ಜಯಿಸಿದ್ದಾರೆ.

ಆರ್ಜೆಂಟೀನಾದ ಲಿಯೋನೆಲ್‌ ಮೆಸ್ಸಿ ಬಾರ್ಸಲೋನಾ ಫ‌ುಟ್ಬಾಲ್‌ ಕ್ಲಬ್‌ನಲ್ಲಿ ಆಡುತ್ತಿದ್ದು ಐದು ಬಾರಿ ಶ್ರೇಷ್ಠ ಫ‌ುಟ್ಬಾಲ್‌ ಆಟಗಾರ ಪ್ರಶಸ್ತಿಗೆ ಪಾತ್ರರಾಗಿದ್ದಾರೆ.