ಡಕರ್‌ ರೇಸ್‌: ಗಂಭೀರ ಅಪಘಾತ, ಕೋಮಾದಲ್ಲಿ ಬೆಂಗಳೂರಿನ ಸಂತೋಷ್‌

Team Udayavani, Jan 8, 2021, 9:02 AM IST

ರಿಯಾಧ್‌: ಭಾರತದ ಪ್ರಖ್ಯಾತ ಬೈಕ್‌ ರೇಸರ್‌, ಬೆಂಗಳೂರಿನ ಸಿ.ಎಸ್‌.ಸಂತೋಷ್‌, ಡಕರ್‌ ರ್ಯಾಲಿಯಲ್ಲಿ ಬೈಕ್‌ ಓಡಿಸುವಾಗ ಗಂಭೀರ ಅಪಘಾತಕ್ಕೆ ತುತ್ತಾಗಿದ್ದಾರೆ. ಸದ್ಯ ಸೌದಿ ಅರೇಬಿಯದ ರಿಯಾಧ್‌ನಲ್ಲಿರುವ ಆಸ್ಪತ್ರೆಗೆ ರ್ಯಾಲಿ ಸಂಘಟಕರರು ಅವರನ್ನು ದಾಖಲಿಸಿದ್ದು, ಕೋಮಾಕ್ಕೆ ಜಾರಿದ್ದಾರೆ. 2021ರ ಡಕರ್‌ ರ್ಯಾಲಿ ಜ.2ರಿಂದ 16ರವರೆಗೆ ಸೌದಿ ಅರೇಬಿಯದಲ್ಲಿ ನಡೆಯುತ್ತಿದೆ.

ಸಂತೋಷ್‌ ಹೀರೊ ಮೋಟೊಸ್ಪೋರ್ಟ್ಸ್‌ ತಂಡವನ್ನು ಪ್ರತಿನಿಧಿಸಿದ್ದಾರೆ. ಪ್ರಸ್ತುತ 4ನೇ ಹಂತ ಚಾಲ್ತಿಯಲ್ಲಿದ್ದು, 43ನೇ ಸ್ಥಾನಿಯಾಗಿ ಸಂತೋಷ್‌ ಸ್ಪರ್ಧೆ ಆರಂಭಿಸಿದ್ದರು. ಡಕರ್‌ ರ್ಯಾಲಿ ರಸ್ತೆಯ ಬದಲಾಗಿ ಬೆಟ್ಟಗುಡ್ಡ, ಮರಳುಗಾಡಿನಂತಹ ಪ್ರದೇಶಗಳಲ್ಲಿ ನಡೆಯುವ, ವಿಶ್ವದ ಅತ್ಯಂತ ಕಠಿಣ ಬೈಕ್‌ ಸ್ಪರ್ಧೆ. ಈ ಬಾರಿ ಒಟ್ಟು 12 ಸುತ್ತುಗಳಲ್ಲಿ 7646 ಕಿ.ಮೀ. ದೂರ ಸಂಚರಿಸಬೇಕಾಗಿದೆ. ಇದರಲ್ಲಿ ಭಾಗವಹಿಸಿದ ದೇಶದ ಮೊದಲ ಸ್ಪರ್ಧಿ ಸಂತೋಷ್‌.

2015ರಲ್ಲಿ ಅವರು ಮೊದಲ ಬಾರಿಗೆ ಸ್ಪರ್ಧಿಸಿದ್ದರು. 2013ರಲ್ಲಿ ನಡೆದ ಅಬುಧಾಬಿ ಸ್ಪರ್ಧೆಯಲ್ಲಿ ಅವರು ಓಡಿಸಿದ್ದ ಬೈಕ್‌ಗೆ ಬೆಂಕಿ ತಗುಲಿ, ಕುತ್ತಿಗೆ ಸುಟ್ಟುಕೊಂಡಿದ್ದನ್ನು ಇಲ್ಲಿ ಸ್ಮರಿಸಬಹುದು.