ಐಪಿಎಲ್ ಮೊದಲೇ ಚೆನ್ನೈಗೆ ಆಘಾತ: ವೇಗಿ ಲುಂಗಿ ನಿಗಿಡಿ ಔಟ್

Team Udayavani, Mar 21, 2019, 10:20 AM IST

ಚೆನ್ನೈ: ವರ್ಣರಂಜಿತ ಕೂಟ ಐಪಿಎಲ್ ಆರಂಭಕ್ಕೆ ಕ್ಷಣಗಣನೆ ಆರಂಭವಾಗಿದ್ದು, ತಂಡಗಳು ಭರ್ಜರಿ ತಾಲೀಮಿನಲ್ಲಿ ತೊಡಗಿವೆ. ಆದರೆ ಕೆಲವು ಫ್ರಾಂಚೈಸಿಗಳಿಗೆ ಈಗ ಹೊಸದೊಂದು ಸಮಸ್ಯೆ ಕಾಡುತ್ತಿದೆ. ಅದೇ ಗಾಯಾಳುಗಳ ಸಮಸ್ಯೆ. ಈಗ ಈ ಸಮಸ್ಯೆ ಬಂದಿರುವುದು ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ. ಗಾಯಾಳು ಆಟಗಾರ ಲುಂಗಿ ನಿಗಿಡಿ.

ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡದ ವೇಗಿಗಳಾದ ಕಮಲೇಶ್ ನಾಗರಕೋಟಿ, ಶಿವಂ ಮಾವಿ ಮತ್ತು ಆನ್ರಿಚ್ ನೋರ್ಜೆ ಗಾಯಾಳಾಗಿರುವ ಬೆನ್ನಲ್ಲೇ ಚೆನ್ನೈ ಸೂಪರ್ ಕಿಂಗ್ಸ್ ಕ್ಯಾಂಪ್ ನಿಂದಲೂ ಇಂತಹದ್ದೇ ಸುದ್ದಿ ಬಂದಿದೆ. ದಕ್ಷಿಣಾ ಆಫ್ರಿಕಾದ ವೇಗಿ ಲುಂಗಿ ನಿಗಿಡಿ ಗಾಯಗೊಂಡಿದ್ದು, ಇದರಿಂದಾಗಿ ಸಂಪೂರ್ಣ ಐಪಿಎಲ್ ನಲ್ಲಿ ಸಿಎಸ್ ಕೆ ಇವರ ಸೇವೆಯಿಂದ ವಂಚಿತವಾಗಲಿದೆ.
 
ಇತ್ತೀಚೆಗೆ ಮುಗಿದ ಶ್ರೀಲಂಕಾ ಏಕದಿನ ಸರಣಿಯ ಅಂತಿಮ ಪಂದ್ಯದ ವೇಳೆ ಸ್ನಾಯು ಸೆಳೆತದ ನೋವಿಗೆ ಸಿಲುಕಿದ್ದರು. ನಂತರ ಅವರನ್ನು ವೈದ್ಯಕೀಯ ತಪಾಸಣೆ ನಡೆಸಿ ಅವರಿಗೆ ನಾಲ್ಕು ವಾರಗಳ ವಿಶ್ರಾಂತಿ ಸೂಚಿಸಲಾಗಿದೆ. ನಂತರ ಅವರು ಕೆಲವು ಅಭ್ಯಾಸ ನಡೆಸಿ ವಿಶ್ವ ಕಪ್ ಗೆ ತಯಾರಾಗುತ್ತಾರೆ ಎಂದು ದಕ್ಷಿಣ ಆಫ್ರಿಕಾದ ಮ್ಯಾನೇಜರ್ ಮೊಹಮ್ಮದ್ ಮೂಸಾಜೆ ಹೇಳಿಕೆ ನೀಡಿದ್ದಾರೆ.

ಕಳೆದ ಋತುವಿನಲ್ಲಿ ಮಹೇಂದ್ರ ಸಿಂಗ್ ಧೋನಿ ನೇತೃತ್ವದ ಚೆನ್ನೈಸೂಪರ್ ಕಿಂಗ್ಸ್ ಚಾಂಪಿಯನ್ ಆಗುವಲ್ಲಿ ನಿಗಿಡಿ ಪಾತ್ರವೂ ಮಹತ್ತರವಾಗಿತ್ತು. ಆಡಿದ ಏಳು ಪಂದ್ಯಗಳಲ್ಲಿ ನಿಗಿಡಿ 11 ವಿಕೆಟ್ ಕಬಳಿಸಿದ್ದರು.

ಲುಂಗಿ ನಿಗಿಡಿ ಸಿಎಸ್ ಕೆ ಮೊದಲ ಆಯ್ಕೆಯ ವೇಗದ ಬೌಲರ್ ಆಗಿದ್ದರು. ಈಗ ಅವರ  ಅನುಪಸ್ಥಿತಿಯಲ್ಲಿ ಧೋನಿಗೆ ವೇಗಿಗಳ ವಿಭಾಗ ದೊಡ್ಡ ತಲೆ ನೋವಾಗಿದೆ. ಇಂಗ್ಲೆಂಡ್ ಆಲ್ ರೌಂಡರ್ ಡೇವಿಡ್ ವಿಲ್ಲೆ ಜೊತೆ ಶಾರ್ದೂಲ್ ಠಾಕೂರ್, ಮೋಹಿತ್ ಶರ್ಮಾ, ದೀಪಕ್ ಚಾಹರ್, ಕೆ.ಎಂ ಆಸಿಫ್ ವೇಗಿಗಳಾಗಿ ಸೇವೆ ಸಲ್ಲಿಸಲಿದ್ದಾರೆ. ವಿಶ್ವಕಪ್ ಗಾಗಿ ಡೇವಿಡ್ ವಿಲ್ಲೆ ಬೇಗನೆ ತವರು ತಂಡಕ್ಕೆ ವಾಪಾಸ್ ಆದರೆ ಚೆನ್ನೈ ಗೆ ಅನುಭವಿ ವೇಗಿಯ ಕೊರತೆ ಕಾಡದಿರದು.