ಹಾಕಿ: ಭಾರತಕ್ಕೆ ಪದಕವಿಲ್ಲ!

Team Udayavani, Apr 15, 2018, 7:10 AM IST

ಗೋಲ್ಡ್‌ಕೋಸ್ಟ್‌: ಕಂಚಿನ ಪದಕ ಸ್ಪರ್ಧೆಯಲ್ಲಿ ಇಂಗ್ಲೆಂಡಿಗೆ 1-2 ಗೋಲುಗಳಿಂದ ಶರಣಾದ ಭಾರತದ ಪುರುಷರ ಹಾಕಿ ತಂಡ ಬರಿಗೈಯಲ್ಲಿ ತವರಿಗೆ ಮರಳುವ ಸಂಕಟಕ್ಕೆ ಸಿಲುಕಿದೆ.

ಕಳೆದೆರಡೂ ಗೇಮ್ಸ್‌ಗಳಲ್ಲಿ ಫೈನಲ್‌ಗೆ ಲಗ್ಗೆ ಇರಿಸಿ, ಎರಡೂ ಸಲ ಆಸ್ಟ್ರೇಲಿಯಕ್ಕೆ ಶರಣಾಗಿ ಬೆಳ್ಳಿ ಪದಕ ಜಯಿಸಿದ್ದ ಭಾರತ ಈ ಬಾರಿ ತೀವ್ರ ನಿರಾಶಾದಾಯಕ ಪ್ರದರ್ಶನ ನೀಡಿತು. ಶನಿವಾರದ ಸ್ಪರ್ಧೆಯಲ್ಲಿ ಜಯ ಸಾಧಿಸುವ ಮೂಲಕ ಇಂಗ್ಲೆಂಡ್‌ ಕಂಚಿನ ಪದಕ ಜಹಯಿಸಿತಷ್ಟೇ ಅಲ್ಲ, ಗ್ರೂಪ್‌ ಹಂತದಲ್ಲಿ ಭಾರತದ ವಿರುದ್ಧ ಅನುಭವಿಸಿದ 3-4 ಅಂತರದ ಸೋಲಿಗೆ ಸೇಡನ್ನೂ ತೀರಿಸಿಕೊಂಡಿತು.

ಇಂಗ್ಲೆಂಡ್‌ ಪರ ದಾಖಲಾದ ಎರಡೂ ಗೋಲುಗಳನ್ನು ಸ್ಯಾಮ್‌ ವಾರ್ಡ್‌ ಹೊಡೆದರು (7 ಹಾಗೂ 43ನೇ ನಿಮಿಷ). ಭಾರತದ ಏಕೈಕ ಗೋಲನ್ನು ವರುಣ್‌ ಕುಮಾರ್‌ 27ನೇ ನಿಮಿಷದಲ್ಲಿ ದಾಖಲಿಸಿದರು.

ಈ ಫ‌ಲಿತಾಂಶಕ್ಕೆ ಭಾರತ ತಂಡದ ನಾಯಕ ಮನ್‌ಪ್ರೀತ್‌ ಸಿಂಗ್‌ ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.