ಡೇವಿಸ್‌ ಕಪ್‌ ವಿಶ್ವ ಗುಂಪು: ನಾರ್ವೆ ವಿರುದ್ಧ ಭಾರತಕ್ಕೆ ಸೋಲು

Team Udayavani, Sep 18, 2022, 11:15 PM IST

ಲಿಲ್ಲೆಹ್ಯಾಮರ್‌ (ನಾರ್ವೆ): ಭಾರತ ವಿರುದ್ಧದ ಡೇವಿಸ್‌ ಕಪ್‌ ವಿಶ್ವಗುಂಪು-1ರ ಮೊದಲ ಸುತ್ತಿನ ಮುಖಾಮುಖಿಯಲ್ಲಿ ಆತಿಥೇಯ ನಾರ್ವೆ 3-1 ಅಂತರದ ಗೆಲುವು ಸಾಧಿಸಿ ಕ್ವಾಲಿಫೈಯರ್‌ ಸುತ್ತಿಗೆ ಅರ್ಹತೆ ಸಂಪಾದಿಸಿದೆ.

ಭಾರತವಿನ್ನು ಸ್ಪರ್ಧೆಯಲ್ಲಿ ಉಳಿಯಬೇಕಾದರೆ ವಿಶ್ವ ಗುಂಪು ಪ್ಲೇಆಫ್ ನಲ್ಲಿ ಸ್ಪರ್ಧಿಸಿ ಜಯ ಸಾಧಿಸಬೇಕಿದೆ. ಇಲ್ಲಿ ವಿಶ್ವ ಗುಂಪು-2 ವಿಜೇತ ತಂಡವೊಂದು ಎದುರಾಗಲಿದೆ.

ಭಾರತ 0-3 ಹಿನ್ನಡೆಗೆ ಸಿಲುಕಿದ ಬಳಿಕ ಔಪಚಾರಿಕವಾಗಿ ಒಂದು ರಿವರ್ಸ್‌ ಸಿಂಗಲ್ಸ್‌ ಪಂದ್ಯವನ್ನು ಆಡಲಾಯಿತು. ಆಡದವರಿಗೆ ಇಲ್ಲಿ ಅವಕಾಶ ಸಿಕ್ಕಿತು. ಸುಮಿತ್‌ ನಾಗಲ್‌ ಭಾರತದ ಏಕೈಕ ಗೆಲುವಿಗೆ ಸಾಕ್ಷಿಯಾದರು. ಅವರು ಲುಕಾಸ್‌ ಹೆಲ್ಲಮ್‌ ಲಿಲ್ಲಿಂಜೆನ್‌ ವಿರುದ್ಧ 6-2, 6-1 ಅಂತರದಿಂದ ಗೆದ್ದು ಬಂದರು.

ಮೊದಲ ಸಿಂಗಲ್ಸ್‌ನಲ್ಲಿ ಪ್ರಜ್ಞೇಶ್ ಗುಣೇಶ್ವರನ್‌ ವಿಶ್ವದ ನಂ.2 ಆಟಗಾರ, ಯುಎಸ್‌ ಓಪನ್‌ ಫೈನಲಿಸ್ಟ್‌ ಕ್ಯಾಸ್ಪರ್‌ ರೂಡ್‌ ಅವರಿಗೆ ಶರಣಾದರು. ಅಂತರ 1-6, 4-6. ದ್ವಿತೀಯ ಸಿಂಗಲ್ಸ್‌ನಲ್ಲಿ ರಾಮ್‌ಕುಮಾರ್‌ ರಾಮನಾಥನ್‌ ತಮಗಿಂತ ಕೆಳ ರ್‍ಯಾಂಕಿಂಗ್‌ನ ವಿಕ್ಟರ್‌ ಡುರಸೋವಿಕ್‌ ವಿರುದ್ಧ 1-6, 4-6ರಿಂದ ಎಡವಿದರು. ಡಬಲ್ಸ್‌ನಲ್ಲಿ ಯೂಕಿ ಭಾಂಬ್ರಿ-ಸಾಕೇತ್‌ ಮೈನೇನಿ ಕೂಡ ಪರಾಭವಗೊಂಡರು. ಕ್ಯಾಸ್ಪರ್‌ ರೂಡ್‌-ವಿಕ್ಟರ್‌ ಡುರಸೋವಿಕ್‌ ವಿರುದ್ಧ 3-6, 6-3, 3-6 ಅಂತರದ ಸೋಲಿಗೆ ಸಿಲುಕಿದರು.