Women’s ODI rankings; 5ನೇ ಸ್ಥಾನಕ್ಕೆ ಏರಿದ ದೀಪ್ತಿ ಶರ್ಮ

Team Udayavani, Jan 1, 2025, 6:45 AM IST

ದುಬಾೖ: ವೆಸ್ಟ್‌ ಇಂಡೀಸ್‌ ಎದುರಿನ ಏಕದಿನ ಸರಣಿಯಲ್ಲಿ ಮಿಂಚಿದ ಆಲ್‌ರೌಂಡರ್‌ ದೀಪ್ತಿ ಶರ್ಮ, ಬೌಲಿಂಗ್‌ ರ್‍ಯಾಂಕಿಂಗ್‌ನಲ್ಲಿ 5ನೇ ಸ್ಥಾನಕ್ಕೆ ಏರಿದ್ದಾರೆ.

ವಡೋದರದಲ್ಲಿ ಆಡಲಾದ ಏಕದಿನ ಸರಣಿಯಲ್ಲಿ ದೀಪ್ತಿ ಶರ್ಮ 8 ವಿಕೆಟ್‌ ಉರುಳಿಸಿದ್ದರು. ಕೊನೆಯ ಪಂದ್ಯದಲ್ಲಿ 31ಕ್ಕೆ 6 ವಿಕೆಟ್‌ ಕೆಡವಿದ ಸಾಧನೆ ಇವರದ್ದಾ ಗಿತ್ತು. ದೀಪ್ತಿ 665 ರೇಟಿಂಗ್‌ ಅಂಕ ಹೊಂದಿದ್ದಾರೆ. 4ನೇ ಸ್ಥಾನದಲ್ಲಿರುವ ದಕ್ಷಿಣ ಆಫ್ರಿಕಾದ ಮರಿಜಾನ್‌ ಕಾಪ್‌ (677) ಅವರಿಗಿಂತ ಕೆಲವೇ ಅಂಕಗಳ ಹಿಂದಿದ್ದಾರೆ.

ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಜೆಮಿಮಾ ರೋಡ್ರಿಗಸ್‌ 4 ಸ್ಥಾನಗಳ ಪ್ರಗತಿಯೊಂದಿಗೆ 22ನೇ ಸ್ಥಾನಕ್ಕೇರಿದರು (537). ಬಿಗ್‌ ಹಿಟ್ಟರ್‌ ರಿಚಾ ಘೋಷ್‌ ಅವರದು 7 ಸ್ಥಾನಗಳ ನೆಗೆತ (448). ಅವರೀಗ 41ನೇ ಸ್ಥಾನಕ್ಕೆ ಬಂದಿದ್ದಾರೆ.

ಸರಣಿಯಲ್ಲಿ 2 ಅರ್ಧ ಶತಕ ಹೊಡೆದ ಸ್ಮತಿ ಮಂಧನಾ ಒಂದು ಸ್ಥಾನ ಕೆಳಗಿಳಿದು 3ಕ್ಕೆ ಬಂದಿದ್ದಾರೆ (720). ಲಾರಾ ವೋಲ್ವಾರ್ಟ್‌ (773) ಮತ್ತು ಚಾಮರಿ ಅತಪಟ್ಟು (733) ಮೊದಲೆರಡು ಸ್ಥಾನ ಅಲಂಕರಿಸಿದ್ದಾರೆ.