IPL; ಮಹಿಳೆಯೊಂದಿಗೆ ಡೆಲ್ಲಿ ಕ್ಯಾಪಿಟಲ್ಸ್ ಆಟಗಾರನ ಅನುಚಿತ ವರ್ತನೆ: ವರದಿ

Team Udayavani, Apr 27, 2023, 2:26 PM IST

ಹೊಸದಿಲ್ಲಿ: ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಕ್ರಿಕೆಟಿಗನೊಬ್ಬ ಫ್ರಾಂಚೈಸಿ ಪಾರ್ಟಿಯಲ್ಲಿ ಮಹಿಳೆಯೊಂದಿಗೆ ಅನುಚಿತವಾಗಿ ವರ್ತಿಸಿದ ಕಾರಣ ಆಟಗಾರರಿಗೆ ‘ನೀತಿ ಸಂಹಿತೆ’ ಹೇರಲು ಫ್ರಾಂಚೈಸಿ ನಿರ್ಧರಿಸಿದೆ. ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಇದುವರೆಗಿನ ಏಳು ಪಂದ್ಯಗಳಲ್ಲಿ 2 ಜಯಗಳಿಸುವುದರೊಂದಿಗೆ ಇನ್ನುಳಿದ ಪಂದ್ಯಗಳೆಲ್ಲವೂ ನಿರ್ಣಾಯಕವಾಗಿವೆ. ಈಗ ಆಟಗಾರನೊಬ್ಬ ಮಹಿಳೆಯೊಂದಿಗೆ ಅನುಚಿತವಾಗಿ ವರ್ತಿಸಿದ ವರದಿಗಳು ಎಲ್ಲಾ ತಪ್ಪು ಕಾರಣಗಳಿಗಾಗಿ ಫ್ರಾಂಚೈಸಿಯನ್ನು ಗೊಂದಲದ ಗೂಡಿನಲ್ಲಿ ಇರಿಸಿದಂತಾಗಿದೆ.

ಫ್ರಾಂಚೈಸಿ ಸಾರ್ವಜನಿಕವಾಗಿ ಉತ್ತಮ ಅಭಿಪ್ರಾಯ ಕಾಪಾಡಿಕೊಳ್ಳಲು ನೀತಿ ಸಂಹಿತೆಯನ್ನು ವಿಧಿಸಲಾಗಿದೆ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್‌ನಲ್ಲಿನ ವರದಿಯು ಸೂಚಿಸಿದ ಕಾರಣ ಭವಿಷ್ಯದಲ್ಲಿ ಇಂತಹ ಘಟನೆಗಳನ್ನು ತಪ್ಪಿಸಲು ಫ್ರಾಂಚೈಸಿ ಅಗತ್ಯ ಕ್ರಮಗಳನ್ನು ತೆಗೆದುಕೊಂಡಿದೆ ಎಂದು ಹೇಳಲಾಗಿದೆ.

ರಾತ್ರಿ 10 ಗಂಟೆಯ ನಂತರ ಆಟಗಾರರು ತಮ್ಮ ಪರಿಚಯಸ್ಥರನ್ನು ತಮ್ಮ ಕೊಠಡಿಗಳಿಗೆ ಕರೆತರುವಂತಿಲ್ಲ ಎಂದು ಫ್ರಾಂಚೈಸಿ ಸ್ಪಷ್ಟಪಡಿಸಿದೆ ಎಂದು ವರದಿ ಹೇಳಿದೆ. ಅವರನ್ನು ತಂಡದ ಹೋಟೆಲ್‌ನ ರೆಸ್ಟೋರೆಂಟ್ ಅಥವಾ ಕಾಫಿ ಶಾಪ್‌ನಲ್ಲಿ ಭೇಟಿಯಾಗಲು ಅನುಮತಿಸಲಾಗಿದೆ.

ಆಟಗಾರರು ಈಗ ವೈಯಕ್ತಿಕ ಭೇಟಿಗಾಗಿ ಹೋಟೆಲ್‌ನಿಂದ ಹೊರಹೋಗಬೇಕಾದರೆ ಫ್ರಾಂಚೈಸಿಯಲ್ಲಿರುವ ಅಧಿಕಾರಿಗಳಿಗೆ ತಿಳಿಸಬೇಕು ಎಂದು ಸಲಹೆಯಲ್ಲಿ ತಿಳಿಸಲಾಗಿದೆ.

ಫ್ರ್ಯಾಂಚೈಸ್‌ನ ಸಲಹೆಯು ದೊಡ್ಡ ಎಚ್ಚರಿಕೆಯಾಗಿದೆ ಎಂದು ವರದಿಯಾಗಿದ್ದು, ಕೋಡ್‌ನ ಯಾವುದೇ ಉಲ್ಲಂಘನೆಯು ದಂಡ ಅಥವಾ ಒಪ್ಪಂದದ ಮುಕ್ತಾಯಕ್ಕೆ ಕಾರಣವಾಗಬಹುದು ಎನ್ನಲಾಗಿದೆ.

ಫ್ರಾಂಚೈಸಿಗಳು ಆಟಗಾರನ ಪತ್ನಿಯರು ಮತ್ತು ಗೆಳತಿಯರಿಗೆ ತಂಡದೊಂದಿಗೆ ಪ್ರಯಾಣಿಸಲು ಅವಕಾಶ ನೀಡುತ್ತದೆ ಆದರೆ ಅವರ ವೆಚ್ಚವನ್ನು ಆಟಗಾರರೇ ಭರಿಸುತ್ತಾರೆ.