Rahul; ಕ್ರಿಕೆಟ್‌ ಗೆ ವಿದಾಯ ಹೇಳಿದರಾ ಕನ್ನಡಿಗ ಕೆಎಲ್‌ ರಾಹುಲ್?;‌ ಏನಿದು ವೈರಲ್‌ ಪೋಸ್ಟ್‌

Team Udayavani, Aug 23, 2024, 3:21 PM IST

ಬೆಂಗಳೂರು: ಟೀಂ ಇಂಡಿಯಾದ ಸ್ಟೈಲಿಶ್-‌ ಟ್ಯಾಲೆಂಟೆಡ್‌ ಆಟಗಾರ ಕೆಎಲ್‌ ರಾಹುಲ್‌ ಅವರು ಸದ್ಯ ಟೀಂ ಇಂಡಿಯಾದಲ್ಲಿ ಜಾಗ ಗಟ್ಟಿ ಮಾಡಿಕೊಳ್ಳಲು ಪರದಾಡುತ್ತಿದ್ದಾರೆ. ರಾಹುಲ್‌ ಅವರನ್ನು ಈಗಾಗಲೇ ಟಿ20 ಸೆಟಪ್‌ ನಿಂದ ಕೈಬಿಡಲಾಗಿದೆ. ಕಳೆದ ಟಿ20 ವಿಶ್ವಕಪ್‌ ಗೆದ್ದ ಟೀಂ ಇಂಡಿಯಾದಲ್ಲಿ ಅವರು ಭಾಗವಾಗಿರಲಿಲ್ಲ. ಇದೀಗ ಕೆಎಲ್‌ ರಾಹುಲ್‌ ಹೆಸರಿನ ಪೋಸ್ಟ್‌ ಒಂದು ಭಾರೀ ವೈರಲ್‌ ಆಗುತ್ತಿದೆ. ಅದು ರಾಹುಲ್‌ ವಿದಾಯ ಹೇಳುವ ಪೋಸ್ಟ್.‌

ಇನ್‌ಸ್ಟಾಗ್ರಾಮ್‌ ನಲ್ಲಿ ಸ್ಟೋರಿ ಹಾಕಿರುವ ರಾಹುಲ್, “ನಾನು ಪ್ರಮುಖ ಘೋಷಣೆಯೊಂದು ಮಾಡಬೇಕಿದೆ” ಎಂದು ಬರೆದುಕೊಂಡಿದ್ದಾರೆ. ಈ ಘೋಷಣೆಯು ಅವರ ಕ್ರಿಕೆಟ್ ಭವಿಷ್ಯಕ್ಕೆ ಸಂಪೂರ್ಣವಾಗಿ ಸಂಬಂಧಿಸಿಲ್ಲವಾದರೂ, ಅಭಿಮಾನಿಗಳು ಕಳವಳಗೊಂಡಿದ್ದಾರೆ.

ಇದರ ಮಧ್ಯೆ ಕೆಎಲ್‌ ರಾಹುಲ್‌ ಅವರ ಹೆಸರಲ್ಲಿ ಒಂದು ಪೋಸ್ಟ್‌ ವೈರಲ್‌ ಆಗುತ್ತಿದೆ. “ತುಂಬಾ ಯೋಚಿಸಿದ ಬಳಿಕ ನಾನು ವೃತ್ತಿಪರ ಕ್ರಿಕೆಟ್‌ ಗೆ ವಿದಾಯ ಹೇಳಲು ನಿರ್ಧಾರ ಮಾಡಿದ್ದೇನೆ” ಎಂಬ ಪೋಸ್ಟ್‌ ವೈರಲ್‌ ಆಗುತ್ತಿದೆ. ಹಲವರು ಇದನ್ನು ಶೇರ್‌ ಮಾಡಿದ್ದು, ರಾಹುಲ್‌ ಇಷ್ಟು ಬೇಗ ವಿದಾಯ ಹೇಳಬಾರದಿತ್ತು ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.

#KLRahul Is this news true about Kl Rahul???? pic.twitter.com/g645kTJP26

— Syed Altaf Bukhari (@syedaltaf57) August 23, 2024

ಆದರೆ ಅಸಲಿಯಾಗಿ ರಾಹುಲ್‌ ಇಂತಹ ಯಾವುದೇ ಪೋಸ್ಟ್‌ ಮಾಡಿಲ್ಲ. ಅವರು ಕ್ರಿಕೆಟ್‌ ಗೆ ವಿದಾಯ ಹೇಳಿಲ್ಲ. ಅವರ ಹೆಸರಿನಲ್ಲಿ ಫೇಕ್‌ ಪೋಸ್ಟ್‌ ವೈರಲ್‌ ಆಗುತ್ತಿದೆ.

ಆದರೆ ಅವರು ಗುರುವಾರ (ಆ.23) ಸಂಜೆ ಪೋಸ್ಟ್‌ ಹಾಕಿರುವ ನಾನು ಪ್ರಮುಖ ಘೋಷಣೆಯೊಂದು ಮಾಡಬೇಕಿದೆ ಎಂಬ ಸ್ಟೋರಿಗೆ ಅಭಿಮಾನಿಗಳು ಹಲವು ಅರ್ಥ ಹುಡುಕುತ್ತಿದ್ದಾರೆ. ಐಪಿಎಲ್‌ ನಲ್ಲಿ ಲಕ್ನೋ ಸೂಪರ್‌ ಜೈಂಟ್ಸ್‌ ತಂಡದ ನಾಯಕನಾಗಿರುವ ರಾಹುಲ್‌ ಅವರು ಈ ಬಾರಿ ತಂಡ ತೊರೆಯಬಹುದು ಎಂದು ಹೇಳಲಾಗುತ್ತಿದೆ. ತವರು ತಂಡವಾದ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡ ಸೇರಬಹುದು ಎಂದು ಅಂದಾಜಿಸಲಾಗುತ್ತಿದೆ. ಈ ಬಗ್ಗೆ ರಾಹುಲ್‌ ಹೇಳಿರಬಹುದೇ ಎಂದು ಅಭಿಮಾನಿಗಳು ಮಾತನಾಡಿಕೊಳ್ಳುತ್ತಿದ್ದಾರೆ.