ಮುಂದಿನ ಐಪಿಎಲ್‌ನಲ್ಲಿ ಇಂಗ್ಲೆಂಡ್‌ ತಾರಾ ಕ್ರಿಕೆಟಿಗರು ಆಡಲ್ಲ?

Team Udayavani, Nov 17, 2018, 6:20 AM IST

ಕೋಲ್ಕತಾ: ಮುಂದಿನ ವರ್ಷದ ಐಪಿಎಲ್‌ಗೆ ಗ್ರಹಚಾರ ಸರಿಯಿದ್ದಂತಿಲ್ಲ. ಅದೇ ವೇಳೆ ಲೋಕಸಭಾ ಚುನಾವಣೆಯಿರುವುದರಿಂದ ಪಂದ್ಯಗಳು ಭಾರತದಲ್ಲಿ ನಡೆಯುತ್ತವೋ, ವಿದೇಶದಲ್ಲೋ ನಡೆಯುತ್ತವೆಯೋ ಇನ್ನೂ ಖಾತ್ರಿಯಾಗಿಲ್ಲ. ಇಷ್ಟರ ಮಧ್ಯೆ ಆಸ್ಟ್ರೇಲಿಯದ ತಾರಾ ಆಟಗಾರರು ಐಪಿಎಲ್‌ಗೆ ಕೈಕೊಡುವುದು ಖಚಿತವಾಗಿದೆ. ಈ ಬೇಸರದ ನಡುವೆಯೇ ಇಂಗ್ಲೆಂಡ್‌ನ‌ ತಾರಾ ಕ್ರಿಕೆಟಿಗರೂ ಐಪಿಎಲ್‌ನಲ್ಲಿ ಆಡದಿರುವುದು ಬಹುತೇಕ ಖಾತ್ರಿಯಾಗಿದೆ. ಇದಕ್ಕೆ ಕಾರಣ ಏಕದಿನ ವಿಶ್ವಕಪ್‌.

ಮಾ.29ರಿಂದ ಮೇ 19ರವರೆಗೆ ಐಪಿಎಲ್‌ ನಡೆಯಲಿದೆ. ಮೇ 30ರಿಂದ ಇಂಗ್ಲೆಂಡ್‌ನ‌ಲ್ಲಿ ಏಕದಿನ ವಿಶ್ವಕಪ್‌ ನಡೆಯಲಿದೆ. ಈ ಕೂಟಕ್ಕಾಗಿ ತರಬೇತಿ ನಡೆಸಲು ವಿಶ್ವಕಪ್‌ಗೆ ಆಯ್ಕೆಯಾದ 15 ಆಟಗಾರರು ಕಡ್ಡಾಯವಾಗಿ ಶಿಬಿರಕ್ಕೆ ಹಾಜರಾಗಲೇಬೇಕೆಂದು ಆಸ್ಟ್ರೇಲಿಯ ಕ್ರಿಕೆಟ್‌ ಮಂಡಳಿ ತಿಳಿಸಿದೆ. ಇಂಗ್ಲೆಂಡ್‌ನ‌ಲ್ಲೇ ಕೂಟ ನಡೆಯುತ್ತಿರುವುದರಿಂದ ವಿಶ್ವಕಪ್‌ಗೆ ಆಯ್ಕೆಯಾದ ಇಂಗ್ಲೆಂಡ್‌ ಕ್ರಿಕೆಟಿಗರೂ ಬಹುತೇಕ ಐಪಿಎಲ್‌ ತಪ್ಪಿಸಿಕೊಳ್ಳಲಿದ್ದಾರೆ. ಈ ಸಾಧ್ಯತೆಯನ್ನು ಕೋಲ್ಕತಾ ನೈಟ್‌ರೈಡರ್ಸ್‌ ಸಿಇಒ ವೆಂಕಿ ಮೈಸೂರು ಹೌದೆಂದು ಒಪ್ಪಿಕೊಂಡಿದ್ದಾರೆ.