ಗೆಲುವು ಕೈಚೆಲ್ಲಿದ ಪಾಕಿಗೆ ಮತ್ತೂಂದು ಸವಾಲು; ನಾಳೆಯಿಂದ ಇಂಗ್ಲೆಂಡ್‌ ವಿರುದ್ಧ 2ನೇ ಟೆಸ್ಟ್‌

Team Udayavani, Aug 12, 2020, 9:37 PM IST

ಸೌತಾಂಪ್ಟನ್‌: ಕೈಯಲ್ಲಿದ್ದ ಮ್ಯಾಂಚೆಸ್ಟರ್‌ ಟೆಸ್ಟ್‌ ಪಂದ್ಯವನ್ನು ಕಳೆದುಕೊಂಡು ಸಂಕಟಕ್ಕೆ ಸಿಲುಕಿರುವ ಪ್ರವಾಸಿ ಪಾಕಿಸ್ಥಾನ, ಗುರುವಾರದಿಂದ ಇಂಗ್ಲೆಂಡ್‌ ವಿರುದ್ಧ ದ್ವಿತೀಯ ಟೆಸ್ಟ್‌ ಸವಾಲನ್ನು ಎದುರಿಸಲಿದೆ. ಎದುರಾಳಿ ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ ಅನುಪಸ್ಥಿತಿಯ ಲಾಭವನ್ನು ಎತ್ತಲು ಅಜರ್‌ ಅಲಿ ಪಡೆಗೆ ಸಾಧ್ಯವಾದೀತೇ ಎಂಬುದೊಂದು ನಿರೀಕ್ಷೆ.

ಇನ್ನೊಂದೆಡೆ, ಬೆನ್‌ ಸ್ಟೋಕ್ಸ್‌ ಅವರ ದೊಡ್ಡ ಕೊಡುಗೆ ಇಲ್ಲದೆಯೂ ಗೆಲ್ಲಲು ತಾನು ಶಕ್ತ ಎಂಬುದಾಗಿ ಇಂಗ್ಲೆಂಡ್‌ ಕಳೆದ ಟೆಸ್ಟ್‌ ಪಂದ್ಯದಲ್ಲಿ ಸಾಧಿಸಿ ತೋರಿಸಿತ್ತು. ಸ್ಟೋಕ್ಸ್‌ ಬದಲು ಕ್ರಿಸ್‌ ವೋಕ್ಸ್‌ ಆಲ್‌ರೌಂಡ್‌ ಪ್ರದರ್ಶನ ನೀಡಿ ತಂಡದ ಜಯಭೇರಿ ಮೊಳಗಿಸಿದ್ದರು. ಗೆಲುವಿನ ಹಾದಿಯಲ್ಲಿದ್ದ ಪಾಕಿಸ್ಥಾನವನ್ನು ಸೋಲಿನ ಸುಳಿಗೆ ತಳ್ಳಿದ್ದರು. ಜಾಸ್‌ ಬಟ್ಲರ್‌ ಮತ್ತೋರ್ವ ಹೀರೋ ಆಗಿ ಮೂಡಿಬಂದಿದ್ದರು.

ತಿರುಗಿ ಬಿದ್ದ ಇಂಗ್ಲೆಂಡ್‌
ನೂರು ಚಿಲ್ಲರೆ ಇನ್ನಿಂಗ್ಸ್‌ ಲೀಡ್‌ ಹೊರತಾಗಿಯೂ ಮ್ಯಾಂಚೆಸ್ಟರ್‌ ಟೆಸ್ಟ್‌ ಪಂದ್ಯದ ದ್ವಿತೀಯ ಸರದಿಯ ಬ್ಯಾಟಿಂಗ್‌ ಮತ್ತು ಬೌಲಿಂಗ್‌ ವಿಭಾಗಗಳೆರಡರಲ್ಲೂ ಪಾಕ್‌ ಶೋಚನೀಯ ವೈಫ‌ಲ್ಯ ಅನುಭವಿಸಿತ್ತು. ಇಂಗ್ಲೆಂಡ್‌ ಅಮೋಘ ರೀತಿಯಲ್ಲಿ ತಿರುಗಿ ಬಿದ್ದು ಪಂದ್ಯವನ್ನು ವಶಪಡಿಸಿಕೊಂಡಿತ್ತು. ಇದೇ ಸ್ಫೂರ್ತಿಯಲ್ಲಿ ಸಾಗಿದರೆ ಆಂಗ್ಲರ ಪಡೆ ಮೇಲುಗೈ ಉಳಿಸಿಕೊಳ್ಳುವ ಸಾಧ್ಯತೆ ಇದೆ. ಆದರೆ ಅಗ್ರ ಕ್ರಮಾಂಕದ ಬ್ಯಾಟಿಂಗ್‌ನಲ್ಲಿ ಭಾರೀ ಎನ್ನಬಹುದಾದ ಸುಧಾರಣೆ ಅಗತ್ಯ.

ವೇಗಿಗಳ ಆವರ್ತನ ಪದ್ಧತಿಗೆ ಒತ್ತು ನೀಡಿರುವ ಇಂಗ್ಲೆಂಡ್‌, ಅನುಭವಿ ಜೇಮ್ಸ್‌ ಆ್ಯಂಡರ್ಸನ್‌ ಬದಲು ಸ್ಯಾಮ್‌ ಕರನ್‌ ಅವರನ್ನು ಆಡಿಸುವ ಸಾಧ್ಯತೆ ಇದೆ. ಕೋವಿಡ್‌ ಕಾಲದ ಟೆಸ್ಟ್‌ ಪಂದ್ಯಗಳಲ್ಲಿ ಗೆಲುವಿನ ಹ್ಯಾಟ್ರಿಕ್‌ ಸಾಧಿಸಿದ ಹಿರಿಮೆ ನಾಯಕ ಜೋ ರೂಟ್‌ ಅವರದಾಗಿದೆ ಎಂಬುದನ್ನು ಮರೆಯುವಂತಿಲ್ಲ. ಇದಕ್ಕೂ ಮೊದಲು ವಿಂಡೀಸ್‌ ಎದುರು ಸತತ 2 ಪಂದ್ಯಗಳಲ್ಲಿ ಇಂಗ್ಲೆಂಡ್‌ ಜಯಭೇರಿ ಮೊಳಗಿಸಿತ್ತು.

ಪಾಕಿಸ್ಥಾನಕ್ಕೆ ನಾಯಕನದೇ ಸಮಸ್ಯೆಯಾಗಿದೆ. ನಾಯಕ ಅಜರ್‌ ಅಲಿ ಅವರ ಬ್ಯಾಟಿಂಗ್‌ ಫಾರ್ಮ್ ಕೈಕೊಟ್ಟಿದೆ. ನಾಯಕತ್ವವೂ ಸಾಕಷ್ಟು ಟೀಕೆಗೆ ಒಳಗಾಗಿದೆ. ಅಲಿ ಕಪ್ತಾನನ ಆಟವಾಡಿ ತಂಡವನ್ನು ಮೇಲೆತ್ತಬೇಕಾದುದು ಅನಿವಾರ್ಯ.