ಶ್ರಬ್ಸೋಲ್‌ ಕ್ರಿಕೆಟ್‌ ವಿದಾಯ

Team Udayavani, Apr 15, 2022, 6:44 AM IST

ಲಂಡನ್‌: ಇಂಗ್ಲೆಂಡ್‌ ವನಿತಾ ಕ್ರಿಕೆಟ್‌ ತಂಡದ ಖ್ಯಾತ ಸೀಮರ್‌ ಅನ್ಯಾ ಶ್ರಬ್ಸೋಲ್‌ ಗುರುವಾರ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ವಿದಾಯ ಘೋಷಿಸಿದರು.

ಇಂಗ್ಲೆಂಡ್‌ ಕ್ರಿಕೆಟ್‌ನೊಂದಿಗೆ ಅನ್ಯಾ ಅವರದು ಸತತ 14 ವರ್ಷಗಳ ನಂಟು. ಎರಡು ವಿಶ್ವಕಪ್‌ ವಿಜಯಗಳಲ್ಲಿ ಇವರ ಪಾತ್ರ ಮಹತ್ವದ್ದಾಗಿತ್ತು. ಇದರಲ್ಲಿ ಸ್ಮರಣೀಯ ಸಾಧನೆಯೆಂದರೆ, ಭಾರತದೆದುರಿನ 2017ರ ಏಕದಿನ ವಿಶ್ವಕಪ್‌ ಫೈನಲ್‌. ಇದರಲ್ಲಿ ಅನ್ಯಾ 6 ವಿಕೆಟ್‌ ಉಡಾಯಿಸಿ ದಾಖಲೆ ಸ್ಥಾಪಿಸಿದ್ದು.

30 ವರ್ಷದ ಅನ್ಯಾ ಶ್ರಬ್ಸೋಲ್‌ ಇಂಗ್ಲೆಂಡ್‌ ಪರ ಎಲ್ಲ ಮಾದರಿಗಳಲ್ಲಿ ಒಟ್ಟು 173 ಪಂದ್ಯಗಳನ್ನಾಡಿ 227 ವಿಕೆಟ್‌ ಉಡಾಯಿಸಿದ್ದಾರೆ.

“ಇಂಗ್ಲೆಂಡ್‌ ಪರ ಆಡುವುದು ನನ್ನ ಕನಸಾಗಿತ್ತು. ಇದು ನನಸಾದದ್ದು ನನ್ನ ಬದುಕಿನ ಸ್ಮರಣೀಯ ಗಳಿಗೆ. ಆದರೆ 14 ವರ್ಷಗಳಷ್ಟು ಸುದೀರ್ಘ‌ ಕಾಲ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಲಿದ್ದೇನೆ ಎಂದು ನಾನು ಊಹಿಸಿಯೂ ಇರಲಿಲ್ಲ. 2017ರ ಲಾರ್ಡ್ಸ್‌ ವಿಶ್ವಕಪ್‌ ಫೈನಲ್‌ನಲ್ಲಿ ಇಂಗ್ಲೆಂಡಿನ ಗೆಲುವಿಗೆ ಕಾರಣವಾದದ್ದು ನನ್ನ ಕ್ರಿಕೆಟ್‌ ಬಾಳ್ವೆಯ ಮಹೋನ್ನತ ಕ್ಷಣವೆಂದು ಭಾವಿಸಿದ್ದೇನೆ’ ಎಂದು ಅನ್ಯಾ ಶ್ರಬ್ಸೋಲ್‌ ಹೇಳಿದರು.