ನಾಟಕೀಯ ಕುಸಿತ ಕಂಡ ಫಿಂಚ್ ಪಡೆಯಿಂದ ಅಸಾಧ್ಯ ಗೆಲುವು ಕಸಿದ ಇಂಗ್ಲೆಂಡ್

Team Udayavani, Sep 5, 2020, 8:56 AM IST

ಸೌಥಂಪ್ಟನ್: ಕೋವಿಡ್ ನಂತರ ಮೊದಲ ಅಂತಾರಾಷ್ಟ್ರೀಯ ಪಂದ್ಯವಾಡಲಿಳಿದ ಆಸ್ಟ್ರೇಲಿಯಾ ತಂಡಕ್ಕೆ ಇಯಾನ್ ಮಾರ್ಗನ್ ಪಡೆ ಚಮಕ್ ನೀಡಿದೆ. ಕೊನೆಯವರೆಗೂ ಆಸೀಸ್ ಹಿಡಿತದಲ್ಲಿದ್ದ ಪಂದ್ಯವನ್ನು ಗೆದ್ದ ಇಂಗ್ಲೆಂಡ್ ಸರಣಿಯಲ್ಲಿ ಶುಭಾರಂಭ ಮಾಡಿದೆ.

ದಿ ರೋಸ್ ಬೌಲ್ ಅಂಗಳದಲ್ಲಿ ಟಾಸ್ ಗೆದ್ದ ಆಸೀಸ್ ನಾಯಕ ಫಿಂಚ್ ಫೀಲ್ಡಿಂಗ್ ಆಯ್ಕೆ ಮಾಡಿದರು. ಬೆರಿಸ್ಟೊ ಬೇಗನೇ ಔಟಾದರೂ ಬಟ್ಲರ್ ಮತ್ತು ಮಲಾನ್ ಇಂಗ್ಲೆಂಡ್ ಗೆ ಆಧಾರವಾದರು. ಬಟ್ಲರ್ 44 ರನ್ ಗಳಿಸಿದರೆ, ಮಲಾನ್ 66 ರನ್ ಗಳಿಸಿದರು. ಆದರೆ ನಂತರ ಇಂಗ್ಲೆಂಡ್ ತಂಡ ಸತತ ವಿಕೆಟ್ ಕಳೆದುಕೊಂಡಿತು.

ನಿಗಧಿತ 20 ಓವರ್ ನಲ್ಲಿ ಏಳು ವಿಕೆಟ್ ಕಳೆದುಕೊಂಡ ಇಂಗ್ಲೆಂಡ್ 162 ರನ್ ಗಳಿಸಿತು. ಆಸೀಸ್ ಪರ ಆ್ಯಗರ್, ರಿಚರ್ಡ್ ಸನ್ ಮತ್ತು ಮ್ಯಾಕ್ಸ್ ವೆಲ್ ತಲಾ ಎರಡು ವಿಕೆಟ್ ಪಡೆದರು.

ಇದನ್ನೂ ಓದಿ: ಲಂಕಾ ಪ್ರೀಮಿಯರ್‌ ಲೀಗ್‌ನಲ್ಲಿ ಶಾಹಿದ್‌ ಅಫ್ರಿದಿ, ಸರ್ಫರಾಜ್‌

ಗುರಿ ಬೆನ್ನತ್ತಿದ ಆಸೀಸ್ ಗೆ ನಾಯಕ ಫಿಂಚ್ ಮತ್ತು ವಾರ್ನರ್ ಉತ್ತಮ ಆರಂಭ ಒದಗಿಸಿದರು. ವಾರ್ನರ್ 58 ರನ್ ಗಳಿಸಿದರೆ, ಫಿಂಚ್ 46 ರನ್ ಗಳಿಸಿದರು. ಇವರಿಬ್ಬರು ಮೊದಲ ವಿಕೆಟ್ ಗೆ 98 ರನ್ ಜೊತೆಯಾಟ ನಡೆಸಿದರು. ಸ್ಮಿತ್ 18 ರನ್ ಗಳಿಸಿದರು.

ಒಂದು ಹಂತದಲ್ಲಿ ಒಂಬತ್ತು ವಿಕೆಟ್ ಸಹಾಯದಿಂದ 42 ಎಸೆತದಲ್ಲಿ 48 ರನ್ ಗಳಿಸಬೇಕಾದ ಸುಲಭ ಗುರಿ ಹೊಂದಿದ್ದ ಆಸೀಸ್ ನಂತರ ನಾಟಕೀಯ ಕುಸಿತ ಕಂಡಿತು. ಸತತ ವಿಕೆಟ್ ಕಳೆದುಕೊಂಡ ಆಸೀಸ್ ಪರದಾಡಿತು. 20 ಓವರ್ ನಲ್ಲಿ 160 ರನ್ ಗಳಿಸಲಷ್ಟೇ ಗಳಿಸಲಾಯಿತು. ಇಂಗ್ಲೆಂಡ್ ಎರಡು ರನ್ ಗಳ ರೋಚಕ ಜಯ ಗಳಿಸಿತು. ಮಲಾನ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಗಳಿಸಿದರು.