ENGvsSL; ಮತ್ತೊಂದು ಶತಕದೊಂದಿಗೆ ಹಲವು ದಾಖಲೆ ಬರೆದ ಜೋ ರೂಟ್‌

Team Udayavani, Sep 1, 2024, 8:17 AM IST

ಲಾರ್ಡ್ಸ್:‌ ಇಂಗ್ಲೆಂಡ್‌ ನ ಪ್ರಮುಖ ಬ್ಯಾಟರ್‌ ಜೋ ರೂಟ್‌ (Joe Root) ಅವರು ಶ್ರೀಲಂಕಾ ವಿರುದ್ದದ ಎರಡನೇ ಟೆಸ್ಟ್‌ ಪಂದ್ಯದ ಎರಡೂ ಇನ್ನಿಂಗ್ಸ್‌ ಗಳಲ್ಲಿ ಶತಕ ಹೊಡೆದು ಮಿಂಚಿದ್ದಾರೆ. ಇದೇ ವೇಳೆ ಇಂಗ್ಲೆಂಡ್‌ ಪರ ದಾಖಲೆ ಬರೆದಿದ್ದಾರೆ.

ಲಾರ್ಡ್ಸ್‌ ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್‌ ಪಂದ್ಯದ ಎರಡನೇ ಇನ್ನಿಂಗ್ಸ್‌ ನಲ್ಲಿಯೂ ಶತಕ ಬಾರಿಸಿದ ರೂಟ್‌, ತನ್ನ ಟೆಸ್ಟ್‌ ಶತಕಗಳ ಸಂಖ್ಯೆಯನ್ನು 34ಕ್ಕೆ ಏರಿಸಿದರು. ಈ ಮೂಲಕ ಇಂಗ್ಲೆಂಡ್‌ ಪರ ಅತಿ ಹೆಚ್ಚು ಟೆಸ್ಟ್‌ ಶತಕ ಗಳಿಸಿದ್ದ ಅಲಿಸ್ಟರ್‌ ಕುಕ್‌ ದಾಖಲೆ ಮುರಿದರು.

ಇಂಗ್ಲೆಂಡ್‌ ನ ಮಾಜಿ ನಾಯಕ ಅಲಿಸ್ಟರ್‌ ಕುಕ್‌ ಅವರು 33 ಟೆಸ್ಟ್‌ ಶತಕ ಬಾರಿಸಿದ್ದರು. ಇದುವರೆಗೆ ಇಂಗ್ಲೆಂಡ್‌ ಆಟಗಾರನೋರ್ವ ಗಳಿಸಿದ್ದ ಅತಿ ಹೆಚ್ಚು ಟೆಸ್ಟ್‌ ಶತಕ ಇದಾಗಿತ್ತು. ಇದೀಗ ರೂಟ್‌ 34ನೇ ಶತಕದೊಂದಿಗೆ ಈ ದಾಖಲೆಯನ್ನು ತನ್ನ ಹೆಸರಿಗೆ ಬರೆದುಕೊಂಡರು.

ಜೋ ರೂಟ್‌ ಅವರು ತನ್ನ 145ನೇ ಟೆಸ್ಟ್‌ ಪಂದ್ಯದಲ್ಲಿ ಈ ದಾಖಲೆ ಬರೆದರೆ, ಅಲಿಸ್ಟರ್‌ ಕುಕ್‌ ಅವರು 131 ಟೆಸ್ಟ್‌ ಪಂದ್ಯಗಳಲ್ಲಿ 33 ಶತಕ ಗಳಿಸಿದ್ದರು.

ಲಾರ್ಡ್ಸ್‌ ನಲ್ಲಿ ರೂಟ್‌ ರ ಏಳನೇ ಟೆಸ್ಟ್ ಶತಕ ಬಾರಿಸಿದರು. ಈ ಮೂಲಕ ಅವರು ‘ಹೋಮ್ ಆಫ್ ಕ್ರಿಕೆಟ್’ನಲ್ಲಿ ಅವರು ಇಂಗ್ಲೆಂಡ್ ಜೋಡಿಯಾದ ಗ್ರಹಾಂ ಗೂಚ್ ಮತ್ತು ಮೈಕೆಲ್ ವಾನ್ ಅವರ ಹೆಸರಲ್ಲಿದ್ದ ಅತಿ ಹೆಚ್ಚು ಟೆಸ್ಟ್ ಶತಕಗಳ ದಾಖಲೆಯ ಮುರಿದರು. ಇಬ್ಬರೂ ತಲಾ ಆರು ಶತಕ ಗಳಿಸಿದ್ದರು.

ಟೆಸ್ಟ್‌ ಕ್ರಿಕೆಟ್‌ ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿರುವ ಆಟಗಾರರ ಪೈಕಿ ಜೋ ರೂಟ್‌ ಆರನೇ ಸ್ಥಾನಕ್ಕೇರಿದರು. ಮೊದಲ ಸ್ಥಾನದಲ್ಲಿ ಭಾರತದ ಸಚಿನ್‌ ತೆಂಡೂಲ್ಕರ್‌ ಅವರಿದದ್ದಾರೆ.