5ನೇ ಸ್ಥಾನಕ್ಕೇರಿದ ಸಿಂಧು ಜೀವನಶ್ರೇಷ್ಠ ಸಾಧನೆ

Team Udayavani, Feb 19, 2017, 3:45 AM IST

ಹೈದ್ರಾಬಾದ್‌: ಒಲಿಂಪಿಕ್ಸ್‌ ಪದಕ ವಿಜೇತೆ ಪಿ.ವಿ.ಸಿಂಧು ವಿಶ್ವ ಬ್ಯಾಡ್ಮಿಂಟನ್‌ ಶ್ರೇಯಾಂಕದಲ್ಲಿ 5ನೇ ಸ್ಥಾನಕ್ಕೇರಿ ಜೀವನಶ್ರೇಷ್ಠ ಸಾಧನೆ ಮಾಡಿದ್ದಾರೆ. 

ಸೈನಾ ನಂತರ ಬ್ಯಾಡ್ಮಿಂಟನ್‌ನಲ್ಲಿ ಉನ್ನತ ಶ್ರೇಯಾಂಕ ಪಡೆದ ಭಾರತದ 2ನೇ ಮಹಿಳಾ ಆಟಗಾರ್ತಿ ಎನ್ನುವ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಸಿಂಧು ಇತ್ತೀಚೆಗೆ ಸೈಯದ್‌ ಮೋದಿ ಗ್ರ್ಯಾಂಡ್‌ ಪ್ರೀ  ಕೂಟದ ಪ್ರಶಸ್ತಿ ಗೆದ್ದಿದ್ದರು. ಈ ಕೂಟದಿಂದ ಒಟ್ಟಾರೆ ಪ್ರದರ್ಶನವನ್ನು ಇಮ್ಮಡಿಗೊಳಿಸಿದ್ದರು. ಪರಿಣಾಮ ಹೈದ್ರಾಬಾದ್‌ ಆಟಗಾರ್ತಿ ವಿಶ್ವ  ಬ್ಯಾಡ್ಮಿಂಟನ್‌ ಶ್ರೇಯಾಂಕದಲ್ಲಿ 69,399 ಅಂಕವನ್ನು ಪಡೆದುಕೊಂಡಿದ್ದಾರೆ. ಇನ್ನು ಕಳೆದ ವರ್ಷದ ಒಟ್ಟಾರೆ ಸಾಧನೆಯನ್ನು  ನೋಡುವುದಾದರೆ ಸಿಂಧು ಶ್ರೇಷ್ಠ ಪ್ರದರ್ಶನ ನೀಡಿದ್ದಾರೆ. 

ಒಲಿಂಪಿಕ್ಸ್‌ನಲ್ಲಿ  ಪದಕ ಗೆದ್ದ ಬಳಿಕ ಅವರು ಚೀನಾ ಓಪನ್‌ ಪ್ರಶಸ್ತಿ ಗೆದ್ದಿದ್ದರು. ಹಾಂಕಾಂಗ್‌ ಓಪನ್‌, ವಿಶ್ವ ಸೂಪರ್‌ ಸೀರೀಸ್‌ ಕೂಟದಲ್ಲೂ ಭರ್ಜರಿ ಸಾಧನೆ ಮೆರೆದಿದ್ದರು. ಇನ್ನು ಪುರುಷರ ಸಿಂಗಲ್ಸ್‌ ಬ್ಯಾಡ್ಮಿಂಟನ್‌ ಶ್ರೇಯಾಂಕ ಕೂಡ ಪ್ರಕಟಗೊಂಡಿದೆ. ಭಾರತದ ಅಜಯ್‌ ಜಯರಾಮ್‌ 18ನೇ ಸ್ಥಾನಕ್ಕೇರಿದ್ದಾರೆ. ಶ್ರೀಕಾಂತ್‌ 21ನೇ ಸ್ಥಾನದಲ್ಲಿದ್ದಾರೆ. ಎಚ್‌.ಎಸ್‌. ಪ್ರಣಯ್‌ 23ನೇ ಸ್ಥಾನದಲ್ಲಿದ್ದಾರೆ. ಮಹಿಳಾ ಸಿಂಗಲ್ಸ್‌ ರ್‍ಯಾಂಕಿಂಗ್‌ನಲ್ಲಿ ಅನುಭವಿ ಆಟಗಾರ್ತಿ ಸೈನಾ ನೆಹ್ವಾಲ್‌ 9ನೇ ಸ್ಥಾನದಲ್ಲಿದ್ದಾರೆ.