ಸೆರೆನಾ-ಬಿಯಾಂಕಾ ಪ್ರಶಸ್ತಿ ಫೈಟ್‌

Team Udayavani, Sep 7, 2019, 5:09 AM IST

ನ್ಯೂಯಾರ್ಕ್‌: ಆತಿಥೇಯ ದೇಶದ ದೈತ್ಯ ಆಟಗಾರ್ತಿ, 23 ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿಗಳ ಒಡತಿ ಸೆರೆನಾ ವಿಲಿಯಮ್ಸ್‌ ಸತತ 2ನೇ ಯುಎಸ್‌ ಓಪನ್‌ ಫೈನಲ್‌ಗೆ ಲಗ್ಗೆ ಇರಿಸಿದ್ದಾರೆ. ಇಲ್ಲಿ ಇದೇ ಮೊದಲ ಸಲ ಗ್ರ್ಯಾನ್‌ಸ್ಲಾಮ್‌ ಫೈನಲ್‌ಗೆ ಏರಿ ಬಂದ ಕೆನಡಾದ ಬಿಯಾಂಕಾ ಆ್ಯಂಡ್ರಿಸ್ಕಾ ಅವರನ್ನು ಎದುರಿಸಲಿದ್ದಾರೆ. ಭಾರತೀಯ ಕಾಲಮಾನ ಪ್ರಕಾರ ಈ ಪಂದ್ಯ ಶನಿವಾರ ನಡುರಾತ್ರಿ ಬಳಿಕ 1.30ಕ್ಕೆ ಆರಂಭವಾಗಲಿದೆ.

ಗುರುವಾರ ರಾತ್ರಿ ನಡೆದ ಮೊದಲ ಸೆಮಿಫೈನಲ್‌ನಲ್ಲಿ ಸೆರೆನಾ ವಿಲಿಯಮ್ಸ್‌ ಉಕ್ರೇನಿನ ಎಲಿನಾ ಸ್ವಿಟೋಲಿನಾ ಅವರನ್ನು 6-3, 6-1 ಅಂತರದಿಂದ ಸುಲಭದಲ್ಲಿ ಮಣಿಸಿದರು. ಬಿಯಾಂಕಾ ಆ್ಯಂಡ್ರಿಸ್ಕಾ ಮತ್ತು ಸ್ವಿಜರ್‌ಲ್ಯಾಂಡಿನ ಬೆಲಿಂಡಾ ಬೆನ್ಸಿಕ್‌ ನಡುವಿನ ಇನ್ನೊಂದು ಸೆಮಿಫೈನಲ್‌ ಭಾರೀ ಹೋರಾಟದಿಂದ ಕೂಡಿತ್ತು. ಇಬ್ಬರ ಪಾಲಿಗೂ ಇದು ಮೊದಲ ಗ್ರ್ಯಾನ್‌ಸ್ಲಾಮ್‌ ಉಪಾಂತ್ಯವಾಗಿತ್ತು. ಇದನ್ನು ಆ್ಯಂಡ್ರಿಸ್ಕಾ 7-6 (7-3), 7-5 ಅಂತರದಿಂದ ಗೆದ್ದರು.

19ರ ಹರೆಯದ ಬಿಯಾಂಕಾ ಆ್ಯಂಡ್ರಿಸ್ಕಾ ಗ್ರ್ಯಾನ್‌ಸ್ಲಾಮ್‌ ಫೈನಲ್‌ ತಲುಪಿದ ಕೆನಡಾದ ಕೇವಲ 2ನೇ ಆಟಗಾರ್ತಿಯಾದರೆ, ಯುಎಸ್‌ ಓಪನ್‌ ಪ್ರಶಸ್ತಿ ಸುತ್ತಿಗೆ ನೆಗೆದ ಕೆನಡಾದ ಮೊದಲ ಸಾಧಕಿ. ಇದಕ್ಕೂ ಮುನ್ನ 2014ರಲ್ಲಿ ಯುಗೆನಿ ಬೌಶಾರ್ಡ್‌ ವಿಂಬಲ್ಡನ್‌ ಫೈನಲ್‌ ತಲುಪಿದ್ದರು. ಇಲ್ಲಿ ಪೆಟ್ರಾ ಕ್ವಿಟೋವಾಗೆ ಶರಣಾಗಿ ಪ್ರಶಸ್ತಿ ವಂಚಿತರಾಗಿದ್ದರು.

ನ್ಯೂಯಾರ್ಕ್‌ನಲ್ಲಿ ನೂರೊಂದನೇ ಜಯ
ಮರಿಯಾ ಶರಪೋವಾ ಅವರನ್ನು ಮಣಿಸಿ ಈ ಕೂಟದಲ್ಲಿ ಗೆಲುವಿನ ಓಟ ಆರಂಭಿಸಿದ ಸೆರೆನಾ ವಿಲಿಯಮ್ಸ್‌, ಈಗ ಸರ್ವಾಧಿಕ 24 ಗ್ರ್ಯಾನ್‌ಸ್ಲಾಮ್‌ ಗೆಲುವಿನ ದಾಖಲೆಯನ್ನು ಸರಿದೂಗಿಸುವ ಹಾದಿಯಲ್ಲಿದ್ದಾರೆ. ಆದರೆ ಮಾಜಿ ನಂ.1 ಆಟಗಾರ್ತಿ ಸೆರೆನಾರ ಟಾಪ್‌ ಕ್ಲಾಸ್‌ ಆಟವೀಗ ಕಂಡುಬರುತ್ತಿಲ್ಲ. ಆದರೆ ನಿರ್ದಿಷ್ಟ ಹಂತದಲ್ಲಿ ಯಾವ ರೀತಿಯ ಟೆಕ್ನಿಕ್‌ ತೋರಬೇಕೆಂಬ ಜಾಣ್ಮೆಯ ಆಟಕ್ಕೇನೂ ಅಡ್ಡಿಯಾಗಿಲ್ಲ.

“ಸೆರೆನಾ ಇಂದು ಅದ್ಭುತ ಪ್ರದರ್ಶನವನ್ನೇನೂ ನೀಡಿಲ್ಲ. ಆದರೆ ಆರಂಭದಲ್ಲಿ ಬಹಳ ಮೇಲ್ಮಟ್ಟದ ಆಟವಾಡಿದರು. ಇದು ಪಂದ್ಯದ ವ್ಯತ್ಯಾಸಕ್ಕೆ ಮುಖ್ಯ ಕಾರಣ. ಅವರ ಹೊಡೆತಗಳು ಪವರ್‌ಫ‌ುಲ್‌ ಆಗಿದ್ದವು’ ಎಂಬುದು ಪರಾಜಿತ ಸ್ವಿಟೋಲಿನಾ ಪ್ರತಿಕ್ರಿಯೆ.

ಇದು ಸೆರೆನಾ ವಿಲಿಯಮ್ಸ್‌ಗೆ
ಯುಎಸ್‌ ಓಪನ್‌ನಲ್ಲಿ ಒಲಿದ 101ನೇ ಗೆಲುವು. ಇದರೊಂದಿಗೆ ಕ್ರಿಸ್‌ ಎವರ್ಟ್‌ ದಾಖಲೆಯನ್ನು ಅವರೀಗ ಸರಿದೂಗಿಸಿದ್ದಾರೆ. ಚಾಂಪಿಯನ್‌ ಆದರೆ ನೂತನ ದಾಖಲೆ ಸ್ಥಾಪಿಸಲಿದ್ದಾರೆ.

ಬಿಯಾಂಕಾ ಅದೃಷ್ಟದ ಆಟ
ಬಿಯಾಂಕಾ ಆ್ಯಂಡ್ರಿಸ್ಕಾ ಯುಎಸ್‌ ಓಪನ್‌ ಮುಖ್ಯ ಸುತ್ತಿನಲ್ಲಿ ಆಡಿದ್ದು ಇದೇ ಮೊದಲು ಎಂಬುದು ವಿಶೇಷ. ಕೂಟದುದ್ದಕ್ಕೂ ಕೈಹಿಡಿದ ಅದೃಷ್ಟ, ಅವರಿಗೆ ಸೆಮಿಫೈನಲ್‌ನಲ್ಲೂ ಸಾಥ್‌ ಕೊಟ್ಟಿತು. ಮೊದಲ ಸೆಟ್‌ ಟೈ-ಬ್ರೇಕರ್‌ಗೆ ಎಳೆಯಲ್ಪಟ್ಟಾಗ, ದ್ವಿತೀಯ ಸೆಟ್‌ ವೇಳೆ 2-5ರ ಹಿನ್ನಡೆ ಅನುಭವಿಸಿದಾಗಲೆಲ್ಲ ಬಿಯಾಂಕಾ ಮೇಲೆದ್ದು ಬಂದರು.

ರೋಜರ್ ಕಪ್‌
ಫೈನಲ್‌ ರೀ-ಮ್ಯಾಚ್‌
ಸೆರೆನಾ ವಿಲಿಯಮ್ಸ್‌-ಬಿಯಾಂಕಾ ಆ್ಯಂಡ್ರಿಸ್ಕಾ ಕೇವಲ 3 ವಾರಗಳ ಅಂತರದಲ್ಲಿ ಎರಡನೇ ಫೈನಲ್‌ ಆಡುತ್ತಿರುವುದು ವಿಶೇಷ. ಆ. 11ರಂದು ಇವರಿಬ್ಬರೂ ಟೊರಂಟೊದಲ್ಲಿ  ನಡೆದ “ರೋಜರ್ ಕಪ್‌’ ಪ್ರಶಸ್ತಿ ಸಮರದಲ್ಲಿ ಪರಸ್ಪರ ಎದುರಾಗಿದ್ದರು. ಆದರೆ ಮೊದಲ ಸೆಟ್‌ ವೇಳೆ 3-1ರ ಮುನ್ನಡೆಯಲ್ಲಿದ್ದಾಗ ಬೆನ್ನುನೋವಿನಿಂದಾಗಿ ಸೆರೆನಾ ಕೂಟದಿಂದ ಹಿಂದೆ ಸರಿದ ಕಾರಣ ತವರಿನ ಬಿಯಾಂಕಾ ಪ್ರಶಸ್ತಿ ಎತ್ತಿದ್ದರು.  ನ್ಯೂಯಾರ್ಕ್‌ನಲ್ಲಿ ಏನು ಸಂಭವಿಸೀತೆಂಬುದು  ಟೆನಿಸ್‌ ಅಭಿಮಾನಿಗಳ  ಕಾತರ, ಕುತೂಹಲ.

ಆರಂಭ: ಶನಿವಾರ ನಡುರಾತ್ರಿ ಬಳಿಕ 1.30