ಫಿಫಾ ವಿಶ್ವಕಪ್‌ 2022 ಫ‌ುಟ್‌ಬಾಲ್‌: ದಿನಾಂಕ ಪ್ರಕಟ

Team Udayavani, Jul 17, 2020, 6:32 AM IST

ದೋಹಾ: ಕತಾರ್‌ನಲ್ಲಿ ಇದೇ ಮೊದಲ ಬಾರಿಗೆ ನಡೆಯಲಿರುವ ಫಿಫಾ ವಿಶ್ವಕಪ್‌ ಫ‌ುಟ್‌ಬಾಲ್‌ ಪಂದ್ಯಾವಳಿಯ ದಿನಾಂಕವನ್ನು ಪ್ರಕಟಿಸಲಾಗಿದೆ.

ಒಟ್ಟು 64 ಪಂದ್ಯಗಳ ಈ ಕೂಟ 2022ರ ನವೆಂಬರ್‌ 21ರಿಂದ ಮೊದಲ್ಗೊಂಡು ಡಿಸೆಂಬರ್‌ 18ರ ತನಕ ನಡೆಯಲಿದೆ. ದಿನಂಪ್ರತಿ 4 ಪಂದ್ಯಗಳನ್ನು ಆಡಲಾಗುವುದು.

ಭಾರತೀಯ ಕಾಲಮಾನದಂತೆ ಪಂದ್ಯಗಳು ನಡುರಾತ್ರಿ 12.30, ಅಪರಾಹ್ನ 3.30, ಸಂಜೆ 6.30 ಮತ್ತು ರಾತ್ರಿ 9.30ಕ್ಕೆ ಆರಂಭವಾಗಲಿವೆ.

ಎರಡೂ ಸೆಮಿಫೈನಲ್‌ ಪಂದ್ಯಗಳ ಆರಂಭದ ಸಮಯ ರಾತ್ರಿ 12.30. ಫೈನಲ್‌ ಹಣಾಹಣಿ ರಾತ್ರಿ 9.30ಕ್ಕೆ ಪ್ರಾರಂಭವಾಗುತ್ತದೆ.

32 ತಂಡಗಳು
ಈ ಪಂದ್ಯಾವಳಿಯಲ್ಲಿ ಸರ್ವಾಧಿಕ 32 ತಂಡಗಳು ಪಾಲ್ಗೊಳ್ಳಲಿವೆ. ಇವನ್ನು ತಲಾ 4 ತಂಡಗಳ 8 ಗುಂಪುಗಳಾಗಿ ವಿಭಜಿಸಲಾಗಿದೆ. ಸದ್ಯ ಗುಂಪಿನ ಹೆಸರಿನ ಮಾನದಂಡದಂತೆ ಪಂದ್ಯಗಳ ದಿನಾಂಕವನ್ನು ಅಂತಿಮಗೊಳಿಸಲಾಗಿದೆ.

2022ರ ಮಾರ್ಚ್‌ ಅಂತ್ಯದಲ್ಲಿ ಅಥವಾ ಎಪ್ರಿಲ್‌ ಮೊದಲ ವಾರದಲ್ಲಿ ಭಾಗವಹಿಸುವ 32 ತಂಡಗಳ ಸ್ಪಷ್ಟ ಚಿತ್ರಣ ಸಿಗಲಿದೆ. ಅನಂತರ ಡ್ರಾ ನಡೆಸಿ ವೇಳಾಪಟ್ಟಿಯನ್ನು ಅಂತಿಮಗೊಳಿಸಲಾಗುವುದು ಎಂದು ಫಿಫಾ ತಿಳಿಸಿದೆ. ನ. 21ರ ಉದ್ಘಾಟನಾ ಪಂದ್ಯದಲ್ಲಿ ಎ1-ಎ2 ತಂಡಗಳು ಎದುರಾಗಲಿವೆ.