ಎಫ್ಐಎಚ್‌ ಸೀರಿಸ್‌: ಭಾರತ ಚಾಂಪಿಯನ್‌

Team Udayavani, Jun 16, 2019, 5:23 AM IST

ಭುವನೇಶ್ವರ: ಒಲಿಂಪಿಕ್‌ ಅರ್ಹತೆಯ ಹುರುಪಿನಲ್ಲಿದ್ದ ಭಾರತೀಯ ಹಾಕಿ ತಂಡ ಎಫ್ಐಎಚ್‌ ಸೀರಿಸ್‌ ಫೈನಲ್ಸ್‌ ಹಾಕಿ ಪಂದ್ಯಾವಳಿಯ ಚಾಂಪಿಯನ್‌ ಆಗಿ ಹೊರಹೊಮ್ಮಿದೆ. ಶನಿವಾರ ಇಲ್ಲಿ ನಡೆದ ಫೈನಲ್‌ನಲ್ಲಿ ಆತಿಥೇಯ ತಂಡ ದಕ್ಷಿಣ ಆಫ್ರಿಕಾವನ್ನು 5-1 ಗೋಲುಗಳಿಂದ ಕೆಡವಿ ಚಿನ್ನದ ಪದಕಕ್ಕೆ ಮುತ್ತಿಕ್ಕಿದೆ.

ವಿಶ್ವದ 5ನೇ ರ್‍ಯಾಂಕಿಂಗ್‌ ತಂಡವಾಗಿರುವ ಭಾರತ ಕೂಟದುದ್ದಕ್ಕೂ ಅಜೇಯವಾಗಿ ಉಳಿದು ಚಾಂಪಿಯನ್ನರ ಆಟವನ್ನಾಡಿತು. ಪ್ರಶಸ್ತಿ ಕಾಳಗದಲ್ಲಿ ಡ್ರ್ಯಾಗ್‌ಫ್ಲಿಕರ್‌ಗಳಾದ ವರುಣ್‌ ಕುಮಾರ್‌ (2ನೇ, 49ನೇ ನಿಮಿಷ) ಮತ್ತು ಹರ್ಮನ್‌ಪ್ರೀತ್‌ ಸಿಂಗ್‌ (11ನೇ, 25ನೇ ನಿಮಿಷ) ತಲಾ 2 ಗೋಲು ಹೊಡೆದರು. ಇನ್ನೊಂದು ಗೋಲು ವಿವೇಕ್‌ ಸಾಗರ್‌ ಪ್ರಸಾದ್‌ ಅವರಿಂದ 35ನೇ ನಿಮಿಷದಲ್ಲಿ ದಾಖಲಾಯಿತು. ದಕ್ಷಿಣ ಆಫ್ರಿಕಾದ ಏಕೈಕ ಗೋಲನ್ನು 53ನೇ ನಿಮಿಷದಲ್ಲಿ ರಿಚರ್ಡ್‌ ಪೌಟ್ಜ್ ಹೊಡೆದರು.

3ನೇ ಸ್ಥಾನಕ್ಕಾಗಿ ನಡೆದ ಪಂದ್ಯದಲ್ಲಿ ಏಶ್ಯನ್‌ ಗೇಮ್ಸ್‌ ಚಾಂಪಿಯನ್‌ ಜಪಾನ್‌ 4-2 ಗೋಲುಗಳಿಂದ ಅಮೆರಿಕವನ್ನು ಕೆಡವಿತು.

ಈ ಕೂಟದಲ್ಲಿ ಮೊದಲೆರಡು ಸ್ಥಾನ ಸಂಪಾದಿಸಿದ ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳು ಒಲಿಂಪಿಕ್‌ ಅರ್ಹತಾ ಕೂಟದ ಅಂತಿಮ ಸುತ್ತು ಪ್ರವೇಶಿಸಿವೆ.