ಫ‌ುಟ್‌ಬಾಲ್‌ ಭವಿಷ್ಯ:  ಈ ಬಾರಿ ಬೆಕ್ಕಿನ ಸರದಿ!

Team Udayavani, Jun 10, 2018, 10:52 AM IST

“ಪೌಲ್‌ ದಿ ಆಕ್ಟೋಪಸ್‌!’
ಈ ಹೆಸರು ನೆನಪಿರಬೇಕಲ್ಲ? 2010ರ ವಿಶ್ವಕಪ್‌ ವೇಳೆ ಭವಿಷ್ಯ ನುಡಿದ “ಅಷ್ಟಪದಿ’. ತಂಡಗಳ ಹೆಸರುಳ್ಳ, ಆಹಾರ ತುಂಬಿರುವ 2 ಬೌಲ್‌ಗ‌ಳ ಪೈಕಿ ಒಂದನ್ನು ಆರಿಸುವ ಮೂಲಕ ಆಕ್ಟೋಪಸ್‌ ಗೆಲುವಿನ ತಂಡ ಯಾವುದೆಂದು ಗುರುತಿಸುವ ರೀತಿಗೆ ಎಲ್ಲರೂ ಬೆರಗಾಗಿದ್ದರು. 

ಇದೀಗ ಮಾಸ್ಕೊ ವಿಶ್ವಕಪ್‌ ಸಮೀಪಿಸಿದೆ. ಸೋಲು-ಗೆಲುವಿನ ಭವಿಷ್ಯ ನಡಿಯುವ ಪ್ರಾಣಿ ಯಾವುದು ಎಂಬ ಕುತೂಹಲ ಅನೇಕರಲ್ಲಿತ್ತು. ಇದಕ್ಕೀಗ ತೆರೆ ಬಿದ್ದಿದೆ. ಈ ಸಲ ಭವಿಷ್ಯ ಹೇಳುವುದು ಬೆಕ್ಕಿನ ಸರದಿ. ಬಿಳಿ ಬಣ್ಣದ, ನೀಲಿ ಕಂಗಳ, “ಅಚಿಲ್ಸ್‌’ ಎಂಬ ಹೆಸರಿನ ಕಿವುಡು ಬೆಕ್ಕು ಈ ಕೆಲಸ ಮಾಡಲಿದೆ. ಆಚೀಚೆ ಬದಿಯಲ್ಲಿ ಇಡಲಾಗುವ 2 ಬೌಲ್‌ಗ‌ಳಲ್ಲಿ ಆಹಾರದ ಜತೆಗೆ 2 ದೇಶಗಳ ಧ್ವಜವನ್ನು ನೆಡಲಾಗುತ್ತದೆ. ಇದರಲ್ಲಿ ಒಂದನ್ನು ಆಹಾರಕ್ಕಾಗಿ ಆಯ್ದುಕೊಳ್ಳುವ ಮೂಲಕ ಅಚಿಲ್ಸ್‌ ಗೆಲುವಿನ ತಂಡವನ್ನು ಗುರುತಿಸುತ್ತದೆ. ಸದ್ಯ ಈ ಬೆಕ್ಕು ಸೇಂಟ್‌ ಪೀಟರ್ಬರ್ಗ್‌ನ “ಹರ್ಮಿಟೇಜ್‌ ಮ್ಯೂಸಿಯಂ’ನಲ್ಲಿ ಇದೆ. ಇಲ್ಲಿನ ಬೆಕ್ಕುಗಳ ಉಸ್ತುವಾರಿ ನೋಡಿಕೊಳ್ಳುತ್ತಿರುವ ಅನ್ನಾ ಕಸತ್ಕಿನಾ ಫ‌ುಟ್‌ಬಾಲ್‌ ಭವಿಷ್ಯ ನುಡಿಯಲು “ಅಚಿಲ್ಸ್‌’ನನ್ನೇ ಆಯ್ಕೆ ಮಾಡಿದ್ದಾರೆ.

ಈ ಮ್ಯೂಸಿಯಂಗೆ ಆಗಮಿಸಿದ ಬಳಿಕ ಅಚಿಲ್ಸ್‌ ಮೊದಲ ಬಾರಿಗೆ ಹೊರಹೋಗುತ್ತಿದ್ದು, ವಿಶ್ವಕಪ್‌ ಫ‌ುಟ್‌ಬಾಲ್‌ ಮುಗಿಯುವ ತನಕ “ಕ್ಯಾಟ್‌ ರಿಪಬ್ಲಿಕ್‌ ಕೆಫೆ’ಯಲ್ಲಿ ಉಳಿಯಲಿದೆ. ಇಲ್ಲಿ ಈ ಬೆಕ್ಕಿನ ವೀಕ್ಷಣೆಗೆ ಕೆಲವು ವಿಶೇಷ ಅತಿಥಿಗಳಿಗೆ ಅವಕಾಶ ಕಲ್ಪಿಸಲಾಗುವುದು.