ಭಾರತ-ಚೀನ ಫ‌ುಟ್‌ಬಾಲ್‌ ಪಂದ್ಯ ಡ್ರಾ

Team Udayavani, Oct 14, 2018, 12:17 PM IST

ಸುಜೊ (ಚೀನ): ಬರೋಬ್ಬರಿ 21 ವರ್ಷಗಳ ಅನಂತರ ಭಾರತ ಮತ್ತು ಚೀನ ತಂಡಗಳ ನಡುವೆ ನಡೆದ ಫ‌ುಟ್‌ಬಾಲ್‌ ಪಂದ್ಯ ಯಾವುದೇ ಗೋಲು ಕಾಣದೇ ಡ್ರಾದಲ್ಲಿ ಮುಕ್ತಾಯ ಕಂಡಿದೆ. ಗೋಲು ಗಳಿಸಲು ಎರಡೂ ತಂಡಗಳು ನಿಕಟ ಹಣಾಹಣಿ ನಡೆಸಿದರೂ ಇದರಲ್ಲಿ ಯಶ ಕಾಣಲಿಲ್ಲ. ಭಾರತದ ಪರ ಗುರುಪ್ರೀತ್‌ ಸಿಂಗ್‌ ಉತ್ತಮವಾಗಿ ಗೋಲ್‌ ಕೀಪಿಂಗ್‌ ನಡೆಸಿ ಗಮನ ಸೆಳೆದರು.

ಎರಡೂ ತಂಡಗಳು ಈ ಹಿಂದೆ 17 ಬಾರಿ ಕಾದಾಡಿವೆ. ಆದರೆ ಅವೆಲ್ಲ 21 ವರ್ಷಗಳ ಹಿಂದೆ ನಡೆದದ್ದು! ಅದರಲ್ಲೂ ಭಾರತ ತಂಡ ಚೀನದಲ್ಲಿ ಪಂದ್ಯವಾಡಿರುವುದು ಇದೇ ಮೊದಲು ಎನ್ನುವುದು ಇನ್ನೊಂದು ಮಹತ್ವದ ಸಂಗತಿ. ಭಾರತದಲ್ಲಿ ಚೀನ 7 ಬಾರಿ ಆಡಿದೆ. ಉಳಿದ ಪಂದ್ಯಗಳು ತಟಸ್ಥ ತಾಣದಲ್ಲಿ ನಡೆದಿವೆ.

ನಾಯಕ ಸುನೀಲ್‌ ಚೆಟ್ರಿ ಶಕ್ತಿ ಮೀರಿ ಗೋಲು ಗಳಿಸಲು ಯತ್ನಿಸಿದರು. ಚೀನದ ರಕ್ಷಣಾ ಪಡೆ ಅದನ್ನು ತಡೆಯಲು ಪೂರ್ಣ ಯಶಸ್ಸು ಸಾಧಿಸಿತು. ಚೀನ ಆಟಗಾರರು ಚೆಟ್ರಿ ಅವರನ್ನು ತಡೆಯಲು ವಿಶೇಷ ಯೋಜನೆ ರೂಪಿಸಿದ್ದಂತೆ ಕಂಡುಬಂತು. ಮತ್ತೂಂದು ಕಡೆ ಭಾರತೀಯರನ್ನು ವಂಚಿಸಿ ಗೋಲು ಗಳಿಸುವ ಚೀನ ಯತ್ನವನ್ನು ಗೋಲ್‌ ಕೀಪರ್‌ ಗುರುಪ್ರೀತ್‌ ಸಿಂಗ್‌ ಸಂಧು ವಿಫ‌ಲಗೊಳಿಸಿದರು.