ಐಒಎ ಅಧ್ಯಕ್ಷ ಹುದ್ದೆ ಚುನಾವಣೆ:  ಹಿಂದೆ ಸರಿದ ಅನಿಲ್‌ ಖನ್ನಾ

Team Udayavani, Dec 8, 2017, 1:12 PM IST

ಹೊಸದಿಲ್ಲಿ: ಅಖೀಲ ಭಾರತ ಟೆನಿಸ್‌ ಅಸೋಸಿಯೇಶನ್‌ನ ಉನ್ನತ ಅಧಿಕಾರಿ ಅನಿಲ್‌ ಖನ್ನಾ ಅವರು ಭಾರತೀಯ ಒಲಿಂಪಿಕ್‌ ಅಸೋಸಿಯೇಶನ್‌ (ಐಒಎ)ನ ಅಧ್ಯಕ್ಷ ಹುದ್ದೆಗೆ ನಡೆಯುವ ಚುನಾವಣೆಯಲ್ಲಿ ಸ್ಪರ್ಧಿಸದಿರಲು ನಿರ್ಧರಿಸಿದ್ದಾರೆ. ನಾಮಪತ್ರ ಹಿಂದೆಗೆಯಲು ಗಡು ಮುಗಿದಿದ್ದರೂ ಖನ್ನಾ ಅಚ್ಚರಿಯ ನಡೆಯೊಂದರಲ್ಲಿ ಸ್ಪರ್ಧೆಯಿಂದ ಹಿಂದೆ ಸರಿಯಲು ಬಯಸಿದ್ದಾರೆ.

ನಾಮಪತ್ರ ಹಿಂದೆಗೆಯಲು ಡಿ. 3 ಕೊನೆಯ ದಿನವಾಗಿತ್ತು. ಇಂಟರ್‌ನ್ಯಾಶನಲ್‌ ಹಾಕಿ ಫೆಡರೇಶನ್‌ ಅಧ್ಯಕ್ಷ ನರೀಂದರ್‌ ಬಾತ್ರ ಜತೆ ಐಒಎ ಅಧ್ಯಕ್ಷ ಹುದ್ದೆಗೆ ಅಖೀಲ ಭಾರತ ಟೆನಿಸ್‌ ಅಸೋಸಿಯೇಶನ್‌ನ ಮಾಜಿ ಅಧ್ಯಕ್ಷ ಖನ್ನಾ ಕೂಡ ನಾಮಪತ್ರ ಸಲ್ಲಿಸಿದ್ದರು. ಆದರೆ ಗುರುವಾರ ನಡೆದ ಅಚ್ಚರಿಯ ನಡೆಯೊಂದರಲ್ಲಿ ಖನ್ನಾ ಅವರು ಐಒಎ ಚುನಾವಣಾ ಆಯೋಗಕ್ಕೆ ಪತ್ರ ಬರೆದು ಸ್ಪರ್ಧೆ ಯಿಂದ ಹಿಂದೆ ಸರಿಯುವ ತನ್ನ ನಿರ್ಧಾರವನ್ನು ತಿಳಿಸಿದರಲ್ಲದೇ ಡಿ. 14ರಂದು ನಡೆಯುವ ವಾರ್ಷಿಕ ಮಹಾಸಭೆಯಲ್ಲಿ ಅಧ್ಯಕ್ಷ ಹುದ್ದೆಗೆ ಸ್ಪರ್ಧೆಯಲ್ಲಿರುವ ಬಾತ್ರ ಅವರಿಗೆ ಬೆಂಬಲ ನೀಡುವುದಾಗಿ ಹೇಳಿದ್ದಾರೆ.

ಖನ್ನಾ ಹಿಂದೆ ಸರಿಯುವ ನಿರ್ಧಾರ ಮಾಡಿದ್ದರಿಂದ ಬಾತ್ರ ಅವರು ಐಒಎ ಅಧ್ಯಕ್ಷ ರಾಗಿ ಆಯ್ಕೆಯಾಗುವುದು ಖಚಿತವಾಗಿದೆ.