ಫ್ರೆಂಚ್‌ ಓಪನ್‌ ಬ್ಯಾಡ್ಮಿಂಟನ್‌: ಕ್ವಾರ್ಟರ್‌ ಫೈನಲ್‌ಗೆ ಸೈನಾ

Team Udayavani, Oct 24, 2019, 10:31 PM IST

ಪ್ಯಾರಿಸ್‌: ಸೈನಾ ನೆಹ್ವಾಲ್‌ ಫ್ರೆಂಚ್‌ ಓಪನ್‌ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯಲ್ಲಿ ಭಾರತದ ಭರವಸೆಯಾಗಿ ಗೋಚರಿಸಿದ್ದಾರೆ. ಗುರುವಾರದ ಮುಖಾಮುಖೀಯಲ್ಲಿ ಅವರು ಡೆನ್ಮಾರ್ಕ್‌ನ ಲೈನ್‌ ಮಾರ್ಕ್‌ ಜಾರ್ಸ್‌ ಫೆಲ್ಡ್‌ ವಿರುದ್ಧ 21-10, 21-11 ಅಂತರದ ಸುಲಭ ಜಯ ಸಾಧಿಸಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರು. ಈ ಪಂದ್ಯ ಕೇವಲ 27 ನಿಮಿಷಗಳಲ್ಲಿ ಮುಗಿಯಿತು.

ಎರಡು ಬಾರಿಯ ಕಾಮನ್‌ವೆಲ್ತ್‌ ಚಾಂಪಿಯನ್‌ ಸೈನಾ ನೆಹ್ವಾಲ್‌ ಕಳೆದ 3 ಸತತ ಕೂಟಗಳಲ್ಲಿ ಮೊದಲ ಸುತ್ತಿನಲ್ಲೇ ಸೋತು ನಿರ್ಗಮಿಸಿದ್ದರು. ಆದರೆ ಪ್ಯಾರಿಸ್‌ನಲ್ಲಿ ಲಯ ಕಂಡುಕೊಂಡಿದ್ದು, ಕ್ವಾರ್ಟರ್‌ ಫೈನಲ್‌ನಲ್ಲಿ ಕೊರಿಯಾದ ಅನ್‌ ಸೆ ಯಂಗ್‌ ವಿರುದ್ಧ ಸೆಣಸಲಿದ್ದಾರೆ. ಯಂಗ್‌ ಕಳೆದ ಡೆನ್ಮಾರ್ಕ್‌ ಓಪನ್‌ ಪಂದ್ಯಾವಳಿಯಲ್ಲಿ ಭಾರತದ ಮತ್ತೋರ್ವ ಆಟಗಾರ್ತಿ ಪಿ.ವಿ. ಸಿಂಧು ಅವರನ್ನು ಮೊದಲ ಸುತ್ತಿನಲ್ಲೇ ಪರಾಭವಗೊಳಿಸಿದ್ದರು.

ಸೈನಾ ನೆಹ್ವಾಲ್‌ ಕಳೆದ ತಡರಾತ್ರಿಯ ಪ್ರಥಮ ಸುತ್ತಿನ ಪಂದ್ಯದಲ್ಲಿ ಹಾಂಕಾಂಗ್‌ನ ಚೆಯುಂಗ್‌ ಎನ್‌ಗಾನ್‌ ಅವರನ್ನು 23-21, 21-17 ಅಂತರದಿಂದ ಮಣಿಸಿದ್ದರು.