ಗಂಭೀರ್‌ ಭಾರತೀಯ ಕ್ರಿಕೆಟಿನ ಅಮಿತಾಭ್‌ ಬಚ್ಚನ್‌: ಪಾಟೀಲ್‌

Team Udayavani, May 1, 2018, 10:46 AM IST

ಮುಂಬಯಿ: ಎಡಗೈ ಆರಂಭಕಾರ ಗೌತಮ್‌ ಗಂಭೀರ್‌ ಈಗ ಬೇಡದ ಕಾರಣಗಳಿಂದ ಸುದ್ದಿಯಲ್ಲಿದ್ದಾರೆ. ಡೆಲ್ಲಿ ಡೇರ್‌ಡೆವಿಲ್ಸ್‌ ತಂಡದ ನಾಯಕತ್ವಕ್ಕೆ ರಾಜೀನಾಮೆ ನೀಡಿದ್ದು, ಈ ಬೆಳವಣಿಗೆಯ ಬೆನ್ನಲ್ಲೇ ಅವರನ್ನು ಆಡುವ ಬಳಗದಿಂದಲೂ ಕೈಬಿಟ್ಟದ್ದೆಲ್ಲ ಐಪಿಎಲ್‌ನ ಬಿಸಿ ಬಿಸಿ ವಿದ್ಯ ಮಾನಗಳು. ಇದಕ್ಕೆಲ್ಲ ಕಾರಣವೇನು ಎಂಬುದು ಸದ್ಯಕ್ಕೆ ನಿಗೂಢವಾಗಿದೆ. 

ಆದರೆ ಭಾರತದ ಮಾಜಿ ಕ್ರಿಕೆಟಿಗ, 1983ರ ವಿಶ್ವಕಪ್‌ ಹೀರೋ ಸಂದೀಪ್‌ ಪಾಟೀಲ್‌ ಮಾತ್ರ ಗೌತಮ್‌ ಗಂಭೀರ್‌ ಅವರ ಗುಣಗಾನ ಮಾಡಿದ್ದು, ಅವರ “ಆ್ಯಂಗ್ರಿ ಯಂಗ್‌ಮ್ಯಾನ್‌’ ವರ್ತನೆಯನ್ನು ಪ್ರಶಂಸಿಸಿದ್ದಾರೆ. ಈ ಕಾರಣಕ್ಕಾಗಿ ಗಂಭೀರ್‌ “ಭಾರತೀಯ ಕ್ರಿಕೆಟಿನ ಅಮಿತಾಭ್‌ ಬಚ್ಚನ್‌’ ಎಂಬುದಾಗಿ ತಮ್ಮ ಲೇಖನವೊಂದರಲ್ಲಿ ಬರೆದಿದ್ದಾರೆ. 

ವಿಪರ್ಯಾಸವೆಂದರೆ, ಗೌತಮ್‌ ಗಂಭೀರ್‌ ಅವರನ್ನು ಟೀಮ್‌ ಇಂಡಿಯಾದಿಂದ ಕೈ ಬಿಡುವಾಗ ಸಂದೀಪ್‌ ಪಾಟೀಲ್‌ ಅವರೇ ಭಾರತೀಯ ರಾಷ್ಟ್ರೀಯ ಕ್ರಿಕೆಟ್‌ ಆಯ್ಕೆ ಸಮಿತಿಯ ಅಧ್ಯಕ್ಷರಾಗಿದ್ದರು! ಅವರ “ವರ್ತನೆ’ಯೇ ತಂಡದಿಂದ ಕೈಬಿಡಲು ಮುಖ್ಯ ಕಾರಣ ಎಂದೂ ಸಂದೀಪ್‌ ಉಲ್ಲೇಖೀಸಿದ್ದಾರೆ.