ಅರ್ಜುನಕ್ಕೆ ಪ್ರಣಯ್‌ ಹೆಸರು ಶಿಫಾರಸು ಮಾಡಿದ ಗೋಪಿಚಂದ್‌

Team Udayavani, Jun 22, 2020, 12:03 PM IST

ನವದೆಹಲಿ: ತಾರಾ ಆಟಗಾರ ಎಚ್‌.ಎಸ್‌. ಪ್ರಣಯ್‌ ಹೆಸರನ್ನು ರಾಷ್ಟ್ರೀಯ ಬ್ಯಾಡ್ಮಿಂಟನ್‌ ತಂಡದ ಮುಖ್ಯ ತರಬೇತುದಾರ ಪುಲ್ಲೇಲ ಗೋಪಿಚಂದ್‌ ಅರ್ಜುನ ಪ್ರಶಸ್ತಿಗೆ ಶಿಫಾರಸು ಮಾಡಿದ್ದಾರೆ.

ಜೂ.2ರಂದು ಭಾರತೀಯ ಬ್ಯಾಡ್ಮಿಂಟನ್‌ ಸಂಸ್ಥೆ (ಬಿಎಐ) ಸಾತ್ವಿಕ್‌ಸಾಯಿರಾಜ್‌ ರಾಂಕಿರೆಡ್ಡಿ, ಚಿರಾಗ್‌ ಶೆಟ್ಟಿ ಹಾಗೂ ಸಮೀರ್‌ ವರ್ಮ ಹೆಸರನ್ನು ಪ್ರಶಸ್ತಿಗೆ ಶಿಫಾರಸು ಮಾಡಿದ್ದರು. ಸತತ ಎರಡನೇ ವರ್ಷ ಅರ್ಜುನ ಪ್ರಶಸ್ತಿಗೆ ಭಾರತೀಯ ಬ್ಯಾಡ್ಮಿಂಟನ್‌ ಸಂಸ್ಥೆ ಎಚ್‌.ಎಸ್‌.ಪ್ರಣಯ್‌ ಹೆಸರನ್ನು ಶಿಫಾರಸು ಮಾಡಿರಲಿಲ್ಲ. ಇದರಿಂದ ಪ್ರಣಯ್‌ ತೀವ್ರ ಅಸಮಾಧಾನಕ್ಕೆ ಒಳಗಾಗಿದ್ದರು. “ಇದು ಅದೇ ಹಳೆಯೇ ಕಥೆ, ಕಾಮನ್‌ವೆಲ್ತ್‌ ಗೇಮ್ಸ್‌ ಹಾಗೂ ಏಷ್ಯನ್‌ ಚಾಂಪಿಯನ್‌ ಶಿಪ್‌ನಲ್ಲಿ ಆಡದ ಆಟಗಾರರ ಹೆಸರನ್ನು ಬಿಎಐನಿಂದ ಶಿಫಾರಸು ಮಾಡಲಾಗಿದೆ’ ಎಂದು ತನ್ನ ಟ್ವಿಟ್ಟರ್‌ ಖಾತೆಯಲ್ಲಿ ಪ್ರಕಟಿಸಿದ್ದರು. ಸದ್ಯ ಆ ಟ್ವಿಟ್‌ ಅನ್ನು ಪ್ರಣಯ್‌ ಅಳಿಸಿ ಹಾಕಿದ್ದಾರೆ. ಈ ನಡುವೆ ಜೂ.3ರಂದು ಗೋಪಿಚಂದ್‌ ಅರ್ಜುನಕ್ಕೆ ಪ್ರಣಯ್‌ ಹೆಸರನ್ನು ಶಿಫಾರಸು ಮಾಡಿದ್ದಾರೆ.

ಬಿಎಐ ವಿರುದ್ಧ ಟೀಕೆ ವ್ಯಕ್ತಪಡಿಸಿದಕ್ಕಾಗಿ ಪ್ರಣಯ್‌ಗೆ ಶೋಕಾಸ್‌ ನೋಟಿಸ್‌ ಜಾರಿಗೊಳಿಸಲಾಗಿದೆ. 15 ದಿನದೊಳಗೆ ಉತ್ತರಿಸುವಂತೆ ತಿಳಿಸಲಾಗಿದೆ.”ಪ್ರಣಯ್‌ ಹಲವು ಸಲ ಶಿಸ್ತು ಉಲ್ಲಂಘಿಸಿ ನಡೆದುಕೊಂಡಿದ್ದಾರೆ, ಎಲ್ಲವನ್ನು ನಾವು ಸಹಿಸಿಕೊಂಡಿದ್ದೇವೆ, ಆದರೆ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ಅವರು ಬಿಎಐ ವಿರುದ್ಧ ಹರಿಹಾಯ್ದಿರುವುದರಿಂದ ಕ್ರಮ ತೆಗೆದು ಕೊಳ್ಳಲೇಬೇಕಾಗಿದೆ’ ಎಂದು ಬಿಎಐ ಕಾರ್ಯದರ್ಶಿ ಅಜಯ್‌ ಸಿಂಘಾನಿಯಾ ತಿಳಿಸಿದ್ದಾರೆ.