ಐಪಿಎಲ್‌ ಪಂದ್ಯಗಳ ವೇಳೆ ತ್ಯಾಜ್ಯ ನಿರ್ವಹಣೆ ಪರೀಕ್ಷಿಸಿ

Team Udayavani, Apr 13, 2017, 11:10 PM IST

ಹೊಸದಿಲ್ಲಿ: ದಿಲ್ಲಿಯ ಫಿರೋಜ್‌ ಶಾ ಕೋಟ್ಲಾ ಮೈದಾನದಲ್ಲಿ ಐಪಿಎಲ್‌ ಪಂದ್ಯಗಳು ನಡೆಯುವ ಸಂದರ್ಭದಲ್ಲಿ ತ್ಯಾಜ್ಯ ನಿರ್ವಹಣೆಯ ಕುರಿತು ಗಮನ ಹರಿಸುವಂತೆ ದಿಲ್ಲಿ ಮಾಲಿನ್ಯ ನಿಯಂತ್ರಣ ಸಮಿತಿಗೆ ರಾಷ್ಟ್ರೀಯ ಹಸಿರು ನ್ಯಾಯಾಧೀಕರಣ ಮಂಡಳಿ ಆದೇಶಿಸಿದೆ.

ಈ ಸಂಬಂಧ ಘಾಜಿಯಾಬಾದ್‌ನ ಅಜಯ್‌ ಮೆಹ್ರಾ ಸಲ್ಲಿಸಿದ್ದ ಅರ್ಜಿಯನ್ನು ತಿರಸ್ಕರಿಸಿ ಹಸಿರು ನ್ಯಾಯಾಧೀಕರಣ ಮಂಡಳಿ ಮೇಲಿನಂತೆ ಆದೇಶ ನೀಡಿತು. ಐಪಿಎಲ್‌ ಪಂದ್ಯಗಳ ಸಂದರ್ಭದಲ್ಲಿ ಫಿರೋಜ್‌ ಶಾದಲ್ಲಿ 40,000 ಪ್ರೇಕ್ಷಕರು ಸೇರುತ್ತಾರೆ. ಆಗ ಟನ್‌ಗಟ್ಟಲೆ ತ್ಯಾಜ್ಯ ಸೃಷ್ಟಿಯಾಗುತ್ತದೆ. ಇದನ್ನು ಸರಿಯಾಗಿ ವಿಂಗಡಿಸದೇ ಒಟ್ಟಾರೆ ಎತ್ತಿ ಎಸೆಯಲಾಗುತ್ತದೆ ಎಂದು ಅವರು ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿದ್ದರು. ಆದರೆ ತ್ಯಾಜ್ಯ ಎಲ್ಲಿಂದ ಉತ್ಪನ್ನವಾಗುತ್ತದೆ ಎಂದು ಅರ್ಜಿದಾರರು ಸ್ಪಷ್ಟವಾಗಿ ಹೇಳಿಲ್ಲ ಎನ್ನುವ ಕಾರಣ ನೀಡಿ ಸ್ವತಂತ್ರ ಕುಮಾರ್‌ ಅಧ್ಯಕ್ಷತೆಯ ಹಸಿರು ನ್ಯಾಯಾಧೀಕರಣ ಮಂಡಳಿ ಅರ್ಜಿಯನ್ನು ತಿರಸ್ಕರಿಸಿತು.