ಇನ್ನೂ ಆರಂಭವಾಗಿಲ್ಲ ಹಾರ್ದಿಕ್‌, ರಾಹುಲ್‌ ವಿಚಾರಣೆ!

Team Udayavani, Mar 7, 2019, 12:45 AM IST

ಮುಂಬಯಿ: ಕಾಫಿ ವಿತ್‌ ಕರಣ್‌ ಟೀವಿ ಶೋನಲ್ಲಿ ಮಹಿಳೆಯರ ವಿರುದ್ಧ ಅಸಭ್ಯ ಹೇಳಿಕೆ ನೀಡಿದ್ದಾರೆಂಬ ಹಿನ್ನೆಲೆಯಲ್ಲಿ, ಕ್ರಿಕೆಟಿಗರಾದ ಹಾರ್ದಿಕ್‌ ಪಾಂಡ್ಯ ಹಾಗೂ ಕೆ.ಎಲ್‌.ರಾಹುಲ್‌ಗೆ ಕೆಲವು ಅಂತಾರಾಷ್ಟ್ರೀಯ ಪಂದ್ಯಗಳ ನಿಷೇಧ ಹೇರಲಾಗಿತ್ತು. 

ಈ ಇಬ್ಬರು ಕ್ಷಮೆ ಕೇಳಿದ್ದರೂ, ವಿಚಾರಣೆ ನಡೆಸಲು ಬಿಸಿಸಿಐನ ಬೇಡಿಕೆಯಂತೆ ಸರ್ವೋಚ್ಚ ನ್ಯಾಯಾಲಯ ವಿಶೇಷ ತನಿಖಾಧಿಕಾರಿಯನ್ನು ನೇಮಿಸಿತ್ತು. ಇದಾಗಿ ಎರಡು ವಾರಗಳು ಕಳೆದಿದ್ದರೂ, ಈ ಪ್ರಕರಣವನ್ನು ಬಿಸಿಸಿಐ ಇನ್ನೂ ವಿಚಾರಣೆಗೆ ಒಪ್ಪಿಸಿಲ್ಲ! ಈ ವಿಷಯವನ್ನು ತನಿಖಾಧಿಕಾರಿ ಡಿ.ಕೆ.ಜೈನ್‌ ಹೇಳಿಕೊಂಡಿದ್ದಾರೆ.

ಬಿಸಿಸಿಐ ಮುಖ್ಯ ಆಡಳಿತಾಧಿಕಾರಿ ವಿನೋದ್‌ ರಾಯ್‌, ಸಹ ಆಡಳಿತಾಧಿಕಾರಿ ಡಯಾನ ಎಡುಲ್ಜಿ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದರು. ಈ ಪ್ರಕರಣಕ್ಕೆ ಶಿಕ್ಷೆ ನೀಡುವುದು ಬಿಸಿಸಿಐ ನೀತಿ ಸಂಹಿತೆಯಲ್ಲಿಲ್ಲ ಎಂದು ಗೊತ್ತಾಗಿ ಅದನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದರು.

ಇಬ್ಬರೂ ಕ್ರಿಕೆಟಿಗರು ಬೇಷರತ್‌ ಈ ಪ್ರಕರಣದ ಕುರಿತು ಕ್ಷಮೆ ಕೇಳಿದ್ದರು. ಇದಾದ ಬಳಿಕ ಕೆಲವು ಪಂದ್ಯಗಳ ನಿಷೇಧ ವಿಧಿಸಿಯೋ, ಎಚ್ಚರಿಕೆ ನೀಡಿಯೋ ಕೈಬಿಡಬೇಕಾಗಿದ್ದ ಪ್ರಕರಣವನ್ನು ಅತಿಯಾಗಿ ಎಳೆದಾಡಿ, ಕಡೆಗೆ ತನಿಖೆ ನಡೆಯಬೇಕು ಎಂಬ ಮಟ್ಟಕ್ಕೆ ಎಳೆದುಕೊಂಡು ಹೋಗಿದ್ದಾರೆ. ಇಷ್ಟಾದ ಮೇಲೆ ಈ ವಿಷಯದ ಕುರಿತು ಒಂದು ತಾರ್ಕಿಕ ಅಂತ್ಯಕ್ಕೆ ಬಿಸಿಸಿಐ ಏಕೆ ಒಯ್ಯುತ್ತಿಲ್ಲ ಎಂದು ಪ್ರಶ್ನೆ ಹಲವರಲ್ಲಿ ಮೂಡಿದೆ.