ಅಭ್ಯಾಸ ವೇಳೆ ಹೃದಯಾಘಾತ: ತ್ರಿಪುರ ಕ್ರಿಕೆಟಿಗ ಮಿಥುನ್‌ ನಿಧನ

Team Udayavani, Dec 5, 2019, 11:04 PM IST

ಸಾಂದರ್ಭಿಕ ಚಿತ್ರ.

ಹೊಸದಿಲ್ಲಿ: ತ್ರಿಪುರದ ಅಂಡರ್‌-23 ತಂಡದ ಪ್ರಮುಖ ಆಟಗಾರ ಮಿಥುನ್‌ ದೇಬ್‌ಬರ್ಮ ಕ್ರೀಡಾಂಗಣದಲ್ಲಿ ಅಭ್ಯಾಸ ನಡೆಸುತ್ತಿದ್ದ ವೇಳೆ ಹಠಾತ್‌ ಕುಸಿದು ಬಿದ್ದು ಸಾವಿಗೀಡಾಗಿದ್ದಾರೆ.

ಈ ಘಟನೆ ಬುಧವಾರ ನಡೆದಿದೆ. ತ್ರಿಪುರ ಎಂಬಿಬಿ ಕ್ರೀಡಾಂಗಣದಲ್ಲಿ ಅಂಡರ್‌-23 ತಂಡದ 25 ಮಂದಿ ಆಟಗಾರರು ಎಂದಿನಂತೆ ಅಭ್ಯಾಸ ನಡೆಸಲು ಆಗಮಿಸಿದ್ದರು. ಅಭ್ಯಾಸಕ್ಕೂ ಮೊದಲು 10 ನಿಮಿಷ ಫಿಟ್‌ನೆಸ್‌ ತರಬೇತಿ ನಡೆಸಲಾಯಿತು. ಇದರಲ್ಲಿ ಮಿಥುನ್‌ ಕೂಡ ಭಾಗಿಯಾಗಿದ್ದರು. ಈ ಸಮಯದಲ್ಲಿ ಮಿಥುನ್‌ ನೀರು ಕುಡಿಯುತ್ತಿದ್ದಾಗ ಹಠಾತ್‌ ಕುಸಿದು ಬಿದ್ದರು. ಕೂಡಲೇ ಸಹ ಆಟಗಾರರು ಅವರನ್ನು ಹತ್ತಿರದ ಐಜಿಎಂ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆದರೆ ಆಗಲೇ ಅವರು ಕೊನೆಯುಸಿರು ಎಳೆದಾಗಿತ್ತು.

ಮಿಥುನ್‌ 2013-14ರಲ್ಲಿ ಅಂಡರ್‌-19 ಕ್ರಿಕೆಟ್‌ ಮೂಲಕ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು. ಸಿಕೆ ನಾಯ್ಡು ಟ್ರೋಫಿ ಕ್ರಿಕೆಟ್‌ ಕೂಟದಲ್ಲೂ ಆಡಿದ್ದರು.

ಅಗಲಿದ ಕ್ರಿಕೆಟಿಗನ ಕುಟುಂಬಕ್ಕೆ ಎಲ್ಲ ರೀತಿಯ ನೆರವು ನೀಡುತ್ತೇವೆ ಎಂದು ತ್ರಿಪುರ ಕ್ರೀಡಾ ಸಚಿವ ಮನೋಜ್‌ ಕಾಂತಿದೇಬ್‌ ತಿಳಿಸಿದ್ದಾರೆ.