Hockey; ವನಿತಾ ಜೂನಿಯರ್‌ ವಿಶ್ವಕಪ್‌ : ಭಾರತ ಆಯ್ಕೆ

Team Udayavani, Dec 16, 2024, 11:20 PM IST

ಮಸ್ಕತ್‌: ಮೂರು ಬಾರಿಯ ಚಾಂಪಿಯನ್‌ ಚೀನವನ್ನು ಶೂಟೌಟ್‌ನಲ್ಲಿ ಮಣಿಸುವ ಮೂಲಕ ಭಾರತ ವನಿತಾ ಜೂನಿಯರ್‌ ಏಷ್ಯಾ ಕಪ್‌ ಹಾಕಿ ಕಿರೀಟವನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಇದರೊಂದಿಗೆ ಮುಂದಿನ ವರ್ಷ ಚಿಲಿಯಲ್ಲಿ ನಡೆಯುವ ಜೂನಿಯರ್‌ ವಿಶ್ವಕಪ್‌ಗೆ ಆಯ್ಕೆಯಾಗಿದೆ. ಈ ಅರ್ಹತೆ ಪಡೆದ ಇತರ ತಂಡಗಳೆಂದರೆ ಚೀನ, ಜಪಾನ್‌ ಮತ್ತು ದಕ್ಷಿಣ ಕೊರಿಯಾ.

ಈ ಕೂಟದಲ್ಲಿ ಭಾರತದ ಏಕೈಕ ಸೋಲು ಲೀಗ್‌ನಲ್ಲಿ ಚೀನ ವಿರುದ್ಧವೇ ಎದುರಾಗಿತ್ತು. ಫೈನಲ್‌ನಲ್ಲಿ ಚೀನವನ್ನೇ ಮಣಿಸಿ ಪ್ರಶಸ್ತಿಯನ್ನು ಎತ್ತಿಹಿಡಿಯಿತು. ನಿಗದಿತ ಅವಧಿಯಲ್ಲಿ ಪಂದ್ಯ 1-1ರಿಂದ ಸಮನಾದ ಕಾರಣ ಫ‌ಲಿತಾಂಶ ನಿರ್ಧರಿಸಲು ಶೂಟೌಟ್‌ ಅಳವಡಿಸಲಾಯಿತು. ಭಾರತವಿಲ್ಲಿ 3-2 ಅಂತರದ ಮೇಲುಗೈ ಸಾಧಿಸಿತು. ಗೋಲ್‌ಕೀಪರ್‌ ನಿಧಿ 3 ಪೆನಾಲ್ಟಿ ಹೊಡೆತಗಳನ್ನು ತಡೆದು ಭಾರತದ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದರು.

ಹಾಕಿ ಇಂಡಿಯಾ ಬಹುಮಾನ
ವಿಜೇತ ತಂಡದ ಪ್ರತಿಯೋರ್ವ ಆಟಗಾರ್ತಿಗೆ “ಹಾಕಿ ಇಂಡಿಯಾ’ 2 ಲಕ್ಷ ರೂ. ಹಾಗೂ ಸಹಾಯಕ ಸಿಬಂದಿಗೆ ಒಂದು ಲಕ್ಷ ರೂ. ಬಹುಮಾನ ಘೋಷಿಸಿದೆ.