ಹಾಕಿ ವಿಶ್ವಕಪ್‌: ಪಂದ್ಯಗಳನ್ನು ಫಿಕ್ಸ್‌ ಮಾಡಿತ್ತೇ ಬೆಲ್ಜಿಯಂ?

Team Udayavani, Jan 17, 2019, 12:30 AM IST

ಹೊಸದಿಲ್ಲಿ: ಡಿಸೆಂಬರ್‌ನಲ್ಲಿ ಮುಕ್ತಾಯಗೊಂಡ ಹಾಕಿ ವಿಶ್ವಕಪ್‌ ಪ್ರಶಸ್ತಿ ಜಯಿಸಿದ ಬೆಲ್ಜಿಯಂ ತಂಡ ಸದ್ಯ ಬೆಟ್ಟಿಂಗ್‌ ವಿವಾದದಲ್ಲಿ ಸಿಲುಕಿಕೊಂಡಿದೆ.

ಬೆಲ್ಜಿಯಂ ತಂಡ ಆಡಿರುವ 20 ಪಂದ್ಯಗಳಲ್ಲಿ  ತಂಡದ ಆಟಗಾರರು ಹಾಗೂ ಸದಸ್ಯರನ್ನು ಬೆಟ್ಟಿಂಗ್‌ ನಡೆಸುವ ವ್ಯಕ್ತಿಗಳು ಸಂಪರ್ಕಿಸಿದ್ದಾರೆ ಎಂದು ಬೆಲ್ಜಿಯಂನ ಸುದ್ದಿವಾಹಿನಿಯೊಂದು ಪ್ರಕಟಿಸಿದೆ. ಈ ಮಾಹಿತಿಯಂತೆ ಅಂತಾರಾಷ್ಟ್ರೀಯ ಹಾಕಿ ಫೆಡರೇಶನ್‌ (ಎಫ್ಐಎಚ್‌) ತನಿಖೆ ಆರಂಭಿಸಿದೆ.

ಈ ಕುರಿತಂತೆ ಬೆಲ್ಜಿಯಂ ತಂಡದ ನಾಯಕ ಥಾಮಸ್‌ ಬ್ರಿಲೇಸ್‌ ಹಾಗೂ ಬೆಲ್ಜಿಯಂ ಹಾಕಿ ಅಸೋಸಿಯೇಶನ್‌ನ ಮಾರ್ಕೆಟಿಂಗ್‌ ಹಾಗೂ ಸಂವಹನ ನಿರ್ದೇಶಕ ಡೆವಿನ್‌ ವಾನ್‌ ಡ್ಯಾಮ್‌ ಯಾವುದೇ ಮಾಹಿತಿ ಹಂಚಿಕೊಂಡಿಲ್ಲ.

“ವಾಹಿನಿಯಲ್ಲಿ ಬಂದ ಸುದ್ದಿಯಂತೆ ಬೆಲ್ಜಿಯಂ ಹಾಕಿ ಅಸೋಸಿಯೇಶನ್‌ ಅನ್ನು ಸಂಪರ್ಕಿಸಲಾಗಿದ್ದು, ಈ ವಿಷಯವನ್ನು ಸಂಪೂರ್ಣ ಸಹಕಾರ ಹಾಗೂ ಪಾರದರ್ಶಕತೆಯಿಂದ ಇತ್ಯರ್ಥ ಮಾಡುತ್ತೇವೆ ಎಂಬ ನಂಬಿಕೆ ಇದೆ’ ಎಂದು ಎಫ್ಐಎಚ್‌ನ ಹಿರಿಯ ಸಂವಹನ ವ್ಯವಸ್ಥಾಪಕ ನಿಕೋಲಸ್‌ ಮಾಯಿಂಗ್ಟ್ ತಿಳಿಸಿದ್ದಾರೆ.