Hyderabad; ಟೀಂ ಬಸ್ ನಲ್ಲಿ ಮದ್ಯಪಾನ ಮಾಡಿದ ಕ್ರಿಕೆಟ್ ಕೋಚ್; ಅಮಾನತು ಮಾಡಿದ ಮಂಡಳಿ

Team Udayavani, Feb 16, 2024, 5:39 PM IST

ಹೈದರಾಬಾದ್: ಟೀಂ ಬಸ್ ನಲ್ಲಿ ಮದ್ಯಪಾನ ಮಾಡಿದ ಆರೋಪದಡಿ ಹೈದರಾಬಾದ್ ಹಿರಿಯ ಮಹಿಳಾ ಕ್ರಿಕೆಟ್ ತಂಡದ ಕೋಚ್ ವಿದ್ಯುತ್ ಜಯಸಿಂಹ ಅವರನ್ನು ಅಮಾನತು ಮಾಡಲಾಗಿದೆ.

ಹೈದರಾಬಾದ್ ಕ್ರಿಕೆಟ್ ಅಸೋಸಿಯೇಷನ್ ಮುಖ್ಯಸ್ಥ ಜಗನ್ ಮೋಹನ್ ರಾವ್ ಅವರು ಮಂಡಳಿಯ ವಿಚಾರಣೆಯ ಬಾಕಿ ಉಳಿದಿರುವಂತೆ ಎಲ್ಲಾ ಕ್ರಿಕೆಟ್ ಸಂಬಂಧಿತ ಚಟುವಟಿಕೆಗಳಿಂದ ದೂರವಿರುವಂತೆ ವಿದ್ಯುತ್‌ ಗೆ ಸೂಚಿಸಿದ್ದಾರೆ.

ಕೋಚ್ ವಿದ್ಯುತ್ ಜಯಸಿಂಹ ಅವರು ತಂಡದೊಂದಿಗೆ ಇರುವಾಗ ಪಾನಮತ್ತರಾಗಿದ್ದು, ಆಟಗಾರರೊಂದಿಗೆ ತಪ್ಪಾಗಿ ನಡೆದುಕೊಂಡಿದ್ದಾರೆ ಎಂದು ಬರೆದಿರುವ ಅನಾಮಧೇಯ ಇ-ಮೇಲ್ ಹೈದರಾಬಾದ್ ಕ್ರಿಕೆಟ್ ಅಸೋಸಿಯೇಶನ್ ಗೆ ಬಂದಿದೆ. ಆ ಬಳಿಕ ಘಟನೆ ಬೆಳಕಿಗೆ ಬಂದಿದೆ.

ಗಮನಾರ್ಹವಾಗಿ, ಹೈದರಾಬಾದ್ ಹಿರಿಯ ಮಹಿಳಾ ತಂಡದ ಕ್ರಿಕೆಟಿಗರೊಂದಿಗೆ ವಿದ್ಯುತ್ ಅವರ ಕೆಟ್ಟ ನಡವಳಿಕೆಯನ್ನು ಆರೋಪಿಸಿ ಆಟಗಾರರ ಪೋಷಕರು ಬರೆದ ಪತ್ರವೊಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದೆ.

ಹೆಚ್‌ಸಿಎ ಅಧ್ಯಕ್ಷ ಜಗನ್ ಮೋಹನ್ ರಾವ್ ಅವರು ಟೀಮ್ ಬಸ್‌ ನಲ್ಲಿ ವಿದ್ಯುತ್ ಕುಡಿಯುತ್ತಿರುವ ವೀಡಿಯೊಗಳು ಸ್ಥಳೀಯ ಮಾಧ್ಯಮಗಳು ಮತ್ತು ವಾಟ್ಸಾಪ್ ಗುಂಪುಗಳಲ್ಲಿ ಪ್ರಸಾರವಾಗುತ್ತಿವೆ ಎಂದು ಗಮನಿಸಿ ಕ್ರಮ ಕೈಗೊಂಡಿದ್ದಾರೆ.