ನನ್ನ ನಿರ್ವಹಣೆ ತೃಪ್ತಿ ಕೊಟ್ಟಿರಲಿಕ್ಕಿಲ್ಲ: ಮಾಂಜ್ರೆಕರ್‌

Team Udayavani, Mar 16, 2020, 6:15 AM IST

ಮುಂಬಯಿ: “ಬಹುಶಃ ಬಿಸಿಸಿಐಗೆ ನನ್ನ ನಿರ್ವಹಣೆ ತೃಪ್ತಿ ತಂದಿರಲಿಕ್ಕಿಲ್ಲ, ಹೀಗಾಗಿ ಕಮೆಂಟ್ರಿ ತಂಡದಿಂದ ಕೈಬಿಟ್ಟಿರಬಹುದು’ ಎಂದು ಸಂಜಯ್‌ ಮಾಂಜ್ರೆಕರ್‌ ಪ್ರತಿಕ್ರಿಯಿಸಿದ್ದಾರೆ.

“ವೀಕ್ಷಕ ವಿವರಣೆಯ ವೃತ್ತಿಯನ್ನು ನಾನು ಯಾವತ್ತೂ ಒಂದು ಗೌರವವೆಂದೇ ಭಾವಿಸಿದ್ದೇನೆ. ಇದು ನನ್ನ ಹಕ್ಕು ಎಂದು ಯಾವತ್ತೂ ಭಾವಿಸಿದವನಲ್ಲ. ನಾನು ಈ ವೃತ್ತಿಯನ್ನು ಗೌರವದಿಂದಲೇ ಕಂಡಿದ್ದೇನೆ. ಬಹುಶಃ ಬಿಸಿಸಿಐಗೆ ನನ್ನ ನಿರ್ವಹಣೆ ಸಮಾಧಾನ ತಂದಿರಲಿಕ್ಕಿಲ್ಲವೋ ಏನೋ. ಹೀಗಾಗಿ ನನ್ನನ್ನು ಕಮೆಂಟ್ರಿ ಟೀಮ್‌ನಿಂದ ಕೈಬಿಟ್ಟಿರಬಹುದು’ ಎಂದು ಸಂಜಯ್‌ ಮಾಂಜ್ರೆಕರ್‌ ಟ್ವೀಟ್‌ ಮಾಡಿದ್ದಾರೆ.

ಕಳೆದ ಕೆಲವು ವರ್ಷಗಳಿಂದ ಬಿಸಿಸಿಐ ವೀಕ್ಷಕ ವಿವರಣಕಾರರ ತಂಡದಲ್ಲಿದ್ದ ಸಂಜಯ್‌ ಮಾಂಜ್ರೆಕರ್‌ ಅವರನ್ನು ಭಾರತ-ದಕ್ಷಿಣ ಆಫ್ರಿಕಾ ನಡುವಿನ ಧರ್ಮಶಾಲಾ ಏಕದಿನ ಪಂದ್ಯದ ವೇಳೆ ಯಾವುದೇ ಕಾರಣ ನೀಡದೆ ಕೈಬಿಡಲಾಗಿತ್ತು.