ಲಂಕಾಗೆ ಶಾಕ್ ನೀಡಿದ ಅಫ್ಘಾನ್ ಹುಡುಗರು: ಸೆಮಿ ಫೈನಲ್ ತಲುಪಿದ ಅಫ್ಘಾನ್ ಅಂಡರ್ 19 ತಂಡ

Team Udayavani, Jan 28, 2022, 10:18 AM IST

ಆ್ಯಂಟಿಗುವಾ: ಅಂಡರ್ 19 ವಿಶ್ವಕಪ್ ನ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಶ್ರೀಲಂಕಾ ತಂಡವನ್ನು ಮಣಿಸಿದ ಅಫ್ಘಾನಿಸ್ಥಾನ ತಂಡವು ಸೆಮಿ ಫೈನಲ್ ಪ್ರವೇಶಿಸಿದೆ. ಅಲ್ಪ ಮೊತ್ತದ ಪಂದ್ಯದಲ್ಲಿ ಅಫ್ಘಾನಿಸ್ಥಾನ ನಾಲ್ಕು ರನ್ ಅಂತರದಿಂದ ಗೆಲುವು ಸಾಧಿಸಿತು.

ಮೊದಲು ಬ್ಯಾಟಿಂಗ್ ನಡೆಸಿದ ಅಫ್ಘಾನ್ ತಂಡ 47.1 ಓವರ್ ನಲ್ಲಿ 134 ರನ್ ಗೆ ಆಲೌಟಾಯಿತು. ಗುರಿ ಬೆನ್ನತ್ತಿದ ಲಂಕಾ ಅಂಡರ್ 19 ತಂಡ 46 ಓವರ್ ನಲ್ಲಿ ಕೇವಲ 130 ರನ್ ಗೆ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು ಸೋಲನುಭವಿಸಿತು.

ಆ್ಯಂಟಿಗುವಾ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಬೌಲರ್ ಗಳು ಮೆರೆದಾಡಿದರು. ಅಫ್ಗಾನ್ ಪರ ಅಬ್ದುಲ್ ಹಾದಿ 37 ರನ್, ನೂರ್ ಅಹಮದ್ 30 ರನ್ ಮತ್ತು ಅಲ್ಲಾಹ್ ನೂರ್ 25 ರನ್ ಗಳಿಸಿದರು. ಲಂಕಾದ ವಿನುಜಾ ರಾನ್ಪುಲ್ ಕೇವಲ 10 ರನ್ ನೀಡಿ ಐದು ವಿಕೆಟ್ ಪಡೆದು ಗಮನ ಸೆಳೆದರು.

ಇದನ್ನೂ ಓದಿ:ಬ್ರೆಟ್ ಲಿ ಯಾರ್ಕರ್ ಗೆ ಮಣಿದ ಮಹಾರಾಜರು ಕೂಟದಿಂದ ಔಟ್; ನಮನ್-ಪಠಾಣ್ ಹೋರಾಟ ವ್ಯರ್ಥ; ವಿಡಿಯೋ

ಗುರಿ ಬೆನ್ನತ್ತಿದ ಲಂಕಾ ಸತತ ವಿಕೆಟ್ ಕಳೆದುಕೊಂಡಿತು. 34 ರನ್ ಗಳಿಸಿದ ನಾಯಕ ದುನಿತ್ ವೆಲ್ಲಲಗೆ ಅವರದ್ದೆ ಹೆಚ್ಚಿನ ಗಳಿಕೆ. ನಾಲ್ಕು ಮಂದಿ ಬ್ಯಾಟರ್ ಗಳು ರನ್ ಔಟಾದರು. ಕೊನೆಯಲ್ಲಿ 46 ಓವರ್ ಗಳಲ್ಲಿ 130 ರನ್ ಗಳಿಗೆ ಆಲೌಟಾಯಿತು. ಅಫ್ಘಾನಿಸ್ಥಾನ ತಂಡ ನಾಲ್ಕು ರನ್ ಗಳ ಗೆಲುವು ಸಾಧಿಸಿತು.

ನೂರ್ ಅಹಮದ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು. ಸೆಮಿ ಫೈನಲ್ ನಲ್ಲಿ ಅಫ್ಘಾನಿಸ್ಥಾನ ತಂಡ ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ.