ವನಿತಾ ವಿಶ್ವಕಪ್‌: ನಾಕೌಟ್‌ ರೇಸ್‌ನಿಂದ ನ್ಯೂಜಿಲ್ಯಾಂಡ್‌ ಔಟ್‌?

Team Udayavani, Mar 21, 2022, 4:00 AM IST

ಆಕ್ಲೆಂಡ್‌: ಆತಿಥೇಯ ನ್ಯೂಜಿಲ್ಯಾಂಡನ್ನು ಒಂದು ವಿಕೆಟ್‌ ಅಂತರದಿಂದ ರೋಚಕವಾಗಿ ಮಣಿಸಿದ ಹಾಲಿ ಚಾಂಪಿಯನ್‌ ಇಂಗ್ಲೆಂಡ್‌ ವನಿತಾ ವಿಶ್ವಕಪ್‌ ಸೆಮಿಫೈನಲ್‌ ರೇಸ್‌ನಲ್ಲಿ ಉಳಿದು ಕೊಂಡಿದೆ. ಆದರೆ ಕಿವೀಸ್‌ ನಾಕೌಟ್‌ ಹಾದಿ ಬಹುತೇಕ ಮುಚ್ಚಲ್ಪಟ್ಟಿದೆ.

ರವಿವಾರದ ಪಂದ್ಯ ಎರಡೂ ತಂಡಗಳ ಪಾಲಿಗೆ “ಮಸ್ಟ್‌ ವಿನ್‌ ಮ್ಯಾಚ್‌’ ಆಗಿತ್ತು. ಇಲ್ಲಿ ಅದೃಷ್ಟ ಇಂಗ್ಲೆಂಡ್‌ ಕೈ ಹಿಡಿಯಿತು. ಮೊದಲು ಬ್ಯಾಟಿಂಗ್‌ ನಡೆಸಿದ ನ್ಯೂಜಿಲ್ಯಾಂಡ್‌ ದೊಡ್ಡ ಮೊತ್ತ ಪೇರಿಸಲು ವಿಫ‌ಲವಾಗಿ 48.5 ಓವರ್‌ಗಳಲ್ಲಿ 203ಕ್ಕೆ ಕುಸಿಯಿತು. ಇಂಗ್ಲೆಂಡ್‌ 47.2 ಓವರ್‌ಗಳಲ್ಲಿ 9 ವಿಕೆಟಿಗೆ 204 ರನ್‌ ಹೊಡೆದು ಜಯಶಾಲಿಯಾಯಿತು.

6ನೇ ಸ್ಥಾನದಲ್ಲಿ ಕಿವೀಸ್‌
ಇದು 5 ಪಂದ್ಯಗಳಲ್ಲಿ ಇಂಗ್ಲೆಂಡ್‌ ಸಾಧಿಸಿದ 2ನೇ ಜಯ. ಅಂಕಪಟ್ಟಿ ಯಲ್ಲಿ 5ನೇ ಸ್ಥಾನದಲ್ಲಿದೆ. ನ್ಯೂಜಿಲ್ಯಾಂಡ್‌ 6 ಪಂದ್ಯಗಳಲ್ಲಿ 4ನೇ ಸೋಲನುಭವಿಸಿತು. ಅಂಕ ಪಟ್ಟಿಯಲ್ಲಿ 6ನೇ ಸ್ಥಾನದಲ್ಲಿದೆ. ಹೊಂದಿರುವುದು ನಾಲ್ಕೇ ಅಂಕ, ಉಳಿದಿರುವುದು ಒಂದೇ ಪಂದ್ಯ. ಎದುರಾಳಿ ದುರ್ಬಲ ಪಾಕಿಸ್ಥಾನ ಎಂಬುದಷ್ಟೇ ಕಿವೀಸ್‌ ಪಾಲಿನ ಸಮಾಧಾನ. ಇದನ್ನು ದೊಡ್ಡ ಅಂತರದಿಂದ ಗೆದ್ದರೂ ನ್ಯೂಜಿ ಲ್ಯಾಂಡ್‌ಗೆ “ಟಾಪ್‌-4′ ಸ್ಥಾನ ಅನುಮಾನ. ಕಾರಣ, ರನ್‌ರೇಟ್‌. ಅದು ಮೈನಸ್‌ನಲ್ಲಿದೆ. ಹೀಗಾಗಿ 3- 4ನೇ ಸ್ಥಾನಕ್ಕೆ ವಿಂಡೀಸ್‌, ಭಾರತ ಮತ್ತು ಇಂಗ್ಲೆಂಡ್‌ ನಡುವೆ ಸ್ಪರ್ಧೆ ಏರ್ಪಡುವುದು ಖಚಿತ.

ಆತಂಕದಿಂದ ಪಾರಾದ ಆಂಗ್ಲರು
ಇಂಗ್ಲೆಂಡ್‌ ಸುಲಭದಲ್ಲಿ ಗೆಲ್ಲಬಹು ದಾಗಿದ್ದ ಪಂದ್ಯ ಇದಾಗಿತ್ತು. 40ನೇ ಓವರ್‌ ವೇಳೆ 4 ವಿಕೆಟಿಗೆ 175 ರನ್‌ ಮಾಡಿ ಜಯದತ್ತ ದಾಪುಗಾಲಿಕ್ಕಿತ್ತು. ಆದರೆ ಇಲ್ಲಿಂದ ಮುಂದೆ ಕಿವೀಸ್‌ ಬೌಲರ್ ಬಲವಾದ ತಿರುಗೇಟು ನೀಡಿದರು. 196ಕ್ಕೆ 9 ವಿಕೆಟ್‌ ಬಿತ್ತು. ಅನ್ನಾ ಇಂಗ್ಲೆಂಡನ್ನು ದಡ ಮುಟ್ಟಿಸಿದರು.

ಮಧ್ಯಮ ಕ್ರಮಾಂಕದ ಆಟಗಾರ್ತಿ ನಥಾಲಿ ಸ್ಕಿವರ್‌ 61 ರನ್‌ (108 ಎಸೆತ, 5 ಬೌಂಡರಿ) ಬಾರಿಸಿ ಇಂಗ್ಲೆಂಡಿನ ಓಟವನ್ನು ಜಾರಿಯಲ್ಲಿರಿಸಿದರು. ನಾಯಕಿ ಹೀತರ್‌ ನೈಟ್‌ 42, ಓಪನರ್‌ ಟಾಮಿ ಬ್ಯೂಮಂಟ್‌ 25, ಸೋಫಿ ಡಂಕ್ಲಿ 33 ರನ್‌ ಹೊಡೆದರು.

ನ್ಯೂಜಿಲ್ಯಾಂಡಿನ ಅಗ್ರ ಕ್ರಮಾಂಕವೂ ಅಮೋಘವಾಗಿತ್ತು. 33ನೇ ಓವರ್‌ ವೇಳೆ ಮೂರೇ ವಿಕೆಟಿಗೆ 137 ರನ್‌ ಗಳಿಸಿತ್ತು. ಅನಂತರ ಸೋಫಿ  ದಾಳಿಗೆ ಸಿಲುಕಿತು. ಅಜೇಯ 52 ರನ್‌ ಮಾಡಿದ ಮ್ಯಾಡ್ಡಿ ಗ್ರೀನ್‌ ನ್ಯೂಜಿಲ್ಯಾಂಡಿನ ಟಾಪ್‌ ಸ್ಕೋರರ್‌.

ಇಂದಿನ ಪಂದ್ಯ
ವೆಸ್ಟ್‌ ಇಂಡೀಸ್‌-ಪಾಕಿಸ್ಥಾನ
ಸ್ಥಳ: ಹ್ಯಾಮಿಲ್ಟನ್‌
ಆರಂಭ: ಬೆಳಗ್ಗೆ 6.30
ಪ್ರಸಾರ: ಸ್ಟಾರ್‌ ಸ್ಪೋರ್ಟ್ಸ್