ICC World Cup 2023; ದೆಹಲಿ, ಮುಂಬೈನಲ್ಲಿ ಸುಡುಮದ್ದು ಪ್ರದರ್ಶನ ರದ್ದು

Team Udayavani, Nov 2, 2023, 11:15 AM IST

ನವದೆಹಲಿ: ನವದೆಹಲಿ ಮತ್ತು ಮುಂಬೈ ನಗರಗಳಲ್ಲಿ ತೀವ್ರವಾಗಿರುವ ವಾಯುಮಾಲಿನ್ಯದಿಂದಾಗಿ; ಇಲ್ಲಿ ನಡೆಯಲಿರುವ ವಿಶ್ವಕಪ್‌ ಪಂದ್ಯಗಳ ವೇಳೆ ಸುಡುಮದ್ದು ಪ್ರದರ್ಶನವನ್ನು ಭಾರತೀಯ ಕ್ರಿಕೆಟ್‌ ಮಂಡಳಿ (ಬಿಸಿಸಿಐ) ನಿಷೇಧಿಸಿದೆ.

ದೆಹಲಿಯಲ್ಲಿ ಇನ್ನೊಂದು ಪಂದ್ಯ ಬಾಕಿ ಉಳಿದಿದ್ದರೆ, ಮುಂಬೈನಲ್ಲಿ ಎರಡು ಲೀಗ್‌ ಪಂದ್ಯಗಳ ಸಹಿತ ನ.15ರಂದು ನಡೆಯುವ ಸೆಮಿಫೈನಲ್‌ ಪಂದ್ಯವೊಂದು ಜರುಗಲಿದೆ.

ಪರಿಸರಕ್ಕೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಬಿಸಿಸಿಐ ಬಹಳಷ್ಟು ಜಾಗ್ರತೆ ವಹಿಸುತ್ತದೆ. ಈ ಸಂಬಂಧ ಐಸಿಸಿ ಜತೆ ಚರ್ಚಿಸಿದ್ದು ಮುಂಬೈನಲ್ಲಿ ನಡೆಯಲಿರುವ ಪಂದ್ಯಗಳ ವೇಳೆ ಸುಡುಮದ್ದು ಪ್ರದರ್ಶನ ಇರುವುದಿಲ್ಲವೆಂದು ಸ್ಪಷ್ಟಪಡಿಸಿದೆ. ಈ ಮೂಲಕ ಮಾಲಿನ್ಯದ ಮಟ್ಟವನ್ನು ಕಡಿಮೆಗೊಳಿಸಲು ಪ್ರಯತ್ನಿಸಲಾಗುವುದು ಎಂಂದು ಬಿಸಿಸಿಐ ಕಾರ್ಯದರ್ಶಿ ಜಯ್‌ ಶಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಅಭಿಮಾನಿಗಳ ಸುರಕ್ಷೆ ಮತ್ತು ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವುದಕ್ಕೆ ನಾವು ಬದ್ಧರಾಗಿದ್ದೇವೆ ಎಂದವರು ಹೇಳಿದರು.