ಎಪ್ರಿಲ್‌ನಲ್ಲಿ ಟಿ10 ಉಡುಪಿ ಪ್ರೀಮಿಯರ್‌ ಲೀಗ್‌ ಕ್ರಿಕೆಟ್‌ 

Team Udayavani, Mar 7, 2017, 5:39 PM IST

ಉಡುಪಿ: ಉಡುಪಿ ಕ್ರಿಕೆಟ್‌ ಕ್ಲಬ್‌ನ ಆಶ್ರಯದಲ್ಲಿ ಸಾಬ್‌ ಉಡುಪಿ ಪ್ರೀಮಿಯರ್‌ ಲೀಗ್‌ ಟಿ10 ಹಾರ್ಡ್‌ ಟೆನಿಸ್‌ ಬಾಲ್‌ ಕ್ರಿಕೆಟ್‌ ಕೂಟ ಸೀಸನ್‌-2 ಮಂಗಳೂರು ಪಣಂಬೂರಿನ ಎನ್‌ಎಂಪಿಟಿ ಮೈದಾನದಲ್ಲಿ ಎ. 17ರಿಂದ 23ರ ವರೆಗೆ ನಡೆಯಲಿದೆ ಎಂದು ಉಡುಪಿ ಪ್ರೀಮಿಯರ್‌ ಲೀಗ್‌ನ ವೈಸ್‌ ಚಯರ್‌ಮನ್‌ ಮಹಮ್ಮದ್‌ ಮುಬೀನ್‌ ಅವರು ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.

ಉಡುಪಿ ಪ್ರೀಮಿಯರ್‌ ಲೀಗ್‌ (ಯುಪಿಎಲ್‌) 50 ಲ.ರೂ. ನಗದು ಬಹುಮಾನವನ್ನು ಹೊಂದಿದ್ದು ವಿಜೇತ ತಂಡವು ಟ್ರೋಫಿ ಮತ್ತು 25 ಲ.ರೂ.,ರನ್ನರ್‌ ಅಪ್‌ ತಂಡ 12 ಲ.ರೂ. ಪಡೆಯಲಿದೆ. ಸೆಮಿಫೈನಲ್‌ನಲ್ಲಿ ಸೋತ ಎರಡು ತಂಡಗಳಿಗೆ ತಲಾ 3 ಲ.ರೂ. ನೀಡಲಾಗುತ್ತದೆ. ಇದಲ್ಲದೇ ವೈಯಕ್ತಿಕವಾಗಿ ಸರಣಿಶ್ರೇಷ್ಠ ಆಟಗಾರನಿಗೆ ಕಾರು, ಫೈನಲ್‌ ಪಂದ್ಯದ ಮ್ಯಾನ್‌ ಆಫ್ ದ ಮ್ಯಾಚ್‌ ಹಾಗೂ ಬೆಸ್ಟ್‌ ಬೌಲರ್‌ ಮತ್ತು ಬೆಸ್ಟ್‌ ಬ್ಯಾಟ್ಸ್‌ಮನ್‌ಗೆ ಬೈಕು ನೀಡಲಾಗುತ್ತದೆ. ಹೆಚ್ಚು ಸಿಕ್ಸರ್‌ ಬಾರಿಸಿದವರಿಗೆ ಮತ್ತು ಪ್ರತಿ ಮ್ಯಾಚ್‌ನಲ್ಲಿ ಮ್ಯಾನ್‌ ಆಫ್ ದ ಮ್ಯಾಚ್‌ ಆಟಗಾರನಿಗೆ 2 ಸಾವಿರ ನಗದು ಸಹಿತ ಟ್ರೋಫಿ, ಮೆಡಲ್‌ ಕೊಡಮಾಡಲಾಗುತ್ತದೆ ಎಂದರು.

ಉಡುಪಿ ಪ್ರೀಮಿಯರ್‌ ಲೀಗ್‌ ಟಿ10 ಹಾರ್ಡ್‌ ಟೆನಿಸ್‌ ಬಾಲ್‌ ಕ್ರಿಕೆಟ್‌ ಕೂಟ ಸೀಸನ್‌ ಒಂದರ ಪಂದ್ಯಗಳು ಉಡುಪಿಯಲ್ಲಿ ಜರಗಿದ್ದು ಭಾರೀ ಯಶಸ್ಸು ಸಾಧಿಸಿತ್ತು. ಯುಪಿಎಲ್‌ ಅಧ್ಯಕ್ಷ ಸಾದಿಕ್‌ ಕಾಪು, ಗಂಗಾಧರ ಬಿರ್ತಿ, ಮುಸ್ತಾಫ‌, ಸಚಿನ್‌ ಕಾಪು ಅವರು ಪತ್ರಿಕಾಗೋಷ್ಠಿಯಲ್ಲಿದ್ದರು.

ಗಲ್ಫ್ ತಂಡವೂ ಇದೆ
ಹಾರ್ಡ್‌ ಟೆನಿಸ್‌ ಬಾಲ್‌ನ ಎಲ್ಲ ಪಂದ್ಯಗಳು 10 ಓವರ್‌ನದ್ದಾಗಿರುತ್ತದೆ. 20ಕ್ಕೂ ಅಧಿಕ ತಂಡಗಳು ಭಾಗವಹಿಸಲಿದ್ದು, ದೇಶದ ವಿವಿಧ ರಾಜ್ಯಗಳ ತಂಡ ಸೇರಿದಂತೆ ಗಲ್ಫ್ ರಾಷ್ಟ್ರದ ತಂಡವೂ ಭಾಗವಹಿಸಲಿದೆ. ಕ್ರಿಕೆಟ್‌ ಆಯೋಜನೆಗೆ ಸಚಿವ ಪ್ರಮೋದ್‌ ಮಧ್ವರಾಜ್‌ ಸಹಿತ ಸೌದಿ ಅರೇಬಿಯಾದಲ್ಲಿನ ಸಾಬ್‌ ಸಂಸ್ಥೆಯ ಎಂಡಿ ಸಲಾಹುದ್ದೀನ್‌ ಸಲ್ಮಾನ್‌ ಅವರು ಮುಖ್ಯ ಸಲಹೆ, ಸಹಕಾರ ನೀಡಿದ್ದಾರೆ ಎಂದರು.