ತಲೈವಾಸ್‌ಗೆ ಮತ್ತೆ ಒಂದಂಕದ ಸೋಲು

Team Udayavani, Jul 30, 2019, 5:37 AM IST

ಮುಂಬಯಿ: ಎರಡು ಸೂಪರ್‌ ಟ್ಯಾಕಲ್‌, ಐದು ಪ್ರಚಂಡ ಟ್ಯಾಕಲ್‌ ನಡೆಸಿದ ಜೈದೀಪ್‌ ಸಾಹಸದಿಂದಾಗಿ 7ನೇ ಆವೃತ್ತಿ ಪ್ರೊ ಕಬಡ್ಡಿ ಮುಂಬಯಿ ಚರಣದ ಸೋಮವಾರದ ಮೊದಲ ಪಂದ್ಯದಲ್ಲಿ ತಮಿಳ್‌ ತಲೈವಾಸ್‌ ವಿರುದ್ಧ ಪಾಟ್ನಾ ಪೈರೇಟ್ಸ್‌ 24-23 ಅಂತರದ ರೋಚಕ ಗೆಲುವು ಸಾಧಿಸಿದೆ. ಪಾಟ್ನಾಗೆ ಇದು 2ನೇ ಜಯವಾದರೆ, ತಲೈವಾಸ್‌ಗೆ ಸತತ 2ನೇ ಸೋಲು.

ಒಂದು ಅಂಕದ ಆಘಾತ
ಹೈದರಾಬಾದ್‌ನಲ್ಲಿ ದಬಾಂಗ್‌ ಡೆಲ್ಲಿ ವಿರುದ್ಧ ನಡೆದ ಪಂದ್ಯದಲ್ಲೂ ತಮಿಳ್‌ ತಲೈವಾಸ್‌ ಒಂದು ಅಂಕದಿಂದ ಎಡವಿತ್ತು (29-30). ತಮಿಳ್‌ ತಲೈವಾಸ್‌ ಪರ ತಾರಾ ಆಟಗಾರರಾದ ರಾಹುಲ್‌ ಚೌಧರಿ (5 ಅಂಕ), ಅಜಯ್‌ ಠಾಕೂರ್‌ (3 ಅಂಕ) ಸಾಧಾರಣ ಪ್ರದರ್ಶನ ನೀಡಿದರು. ಮಂಜಿತ್‌ ಚಿಲ್ಲರ್‌ (4 ಅಂಕ), ಅಜಿತ್‌ (3 ಅಂಕ) ಹಾಗೂ ರಾಣಾ ಸಿಂಗ್‌ (3 ಅಂಕ) ಉತ್ತಮ ಹೋರಾಟ ನೀಡಿದರೂ ತಂಡಕ್ಕೆ ಜಯ ಒದಗಿಸಿಕೊಡಲು ಸಾಧ್ಯವಾಗಲಿಲ್ಲ.

ಜೈದೀಪ್‌ ಜಯದ ರೂವಾರಿ
ಜೈದೀಪ್‌ (7 ಅಂಕ) ಪ್ರಚಂಡ ಟ್ಯಾಕಲ್‌ ಮೂಲಕ ಗಮನ ಸೆಳೆದರು. ಇವರಿಗೆ ಆಲ್‌ರೌಂಡರ್‌ ಮೋನು (5 ಅಂಕ) ಉತ್ತಮ ಸಾಥ್‌ ನೀಡಿದರು. ಹೀಗಾಗಿ ತಂಡ ಗೆಲುವು ಗಳಿಸಲು ಸಾಧ್ಯವಾಯಿತು. ತಾರಾ ಆಟಗಾರ ಪರ್‌ದೀಪ್‌ ನರ್ವಾಲ್‌ 13 ಸಲ ರೈಡ್‌ ಮಾಡಿ ಗಳಿಸಿದ್ದು ಒಂದು ಅಂಕ ಮಾತ್ರ.

ಬೆಂಗಾಲ್‌ ಜಯಭೇರಿ
ಸೋಮವಾರ ನಡೆದ ಎರಡನೇ ಪಂದ್ಯದಲ್ಲಿ ಮಣಿಂದರ್‌ ಸಿಂಗ್‌ (14 ಅಂಕ) ಭರ್ಜರಿ ರೈಡಿಂಗ್‌ನಿಂದ ಬೆಂಗಾಲ್‌ ವಾರಿಯರ್ 43 -23 ಅಂಕಗಳ ಅಂತರದಿಂದ ಪುನೇರಿ ಪಲ್ಟಾನ್‌ ತಂಡವನ್ನು ಮಣಿಸಿತು.