ಭಾರತದ ಗೆಲುವಿಗೆ 209 ರನ್‌ ಗುರಿ

Team Udayavani, Aug 8, 2021, 12:45 AM IST

ನಾಟಿಂಗ್‌ಹ್ಯಾಮ್‌: ಇಂಗ್ಲೆಂಡ್‌ ಎದುರಿನ ಮೊದಲ ಟೆಸ್ಟ್‌ ಪಂದ್ಯದಲ್ಲಿ ಭಾರತ 209 ರನ್ನುಗಳ ಗೆಲುವಿನ ಗುರಿ ಪಡೆದಿದೆ. 95 ರನ್‌ ಹಿನ್ನಡೆಗೆ ಸಿಲುಕಿದ ಇಂಗ್ಲೆಂಡ್‌ ದ್ವಿತೀಯ ಸರದಿಯಲ್ಲಿ 303ಕ್ಕೆ ಆಲೌಟ್‌ ಆಯಿತು. ನಾಯಕ ಜೋ ರೂಟ್‌ ಅವರ 21ನೇ ಶತಕ ಸಾಹಸದಿಂದ ಇಂಗ್ಲೆಂಡ್‌ ಚೇತರಿಕೆ ಕಂಡಿತ್ತು. ರೂಟ್‌ 109 ರನ್‌ ಹೊಡೆದರು.

4ನೇ ದಿನದಾಟದಲ್ಲಿ ರೋರಿ ಬರ್ನ್ಸ್ (18) ಮತ್ತು ಜಾಕ್‌ ಕ್ರಾಲಿ (6) ಅವರನ್ನು ಬೇಗನೆ ಕಳೆದುಕೊಂಡಿತು. ಆಗ ಡೊಮಿನಿಕ್‌ ಸಿಬ್ಲಿ (28) ಮತ್ತು ರೂಟ್‌ ಸೇರಿಕೊಂಡು ತಂಡವನ್ನು ಮೇಲೆತ್ತುವ ಪ್ರಯತ್ನ ಮಾಡಿದರು. ಬಳಿಕ ಜಾನಿ ಬೇರ್‌ಸ್ಟೊ (30), ಡೇನಿಯಲ್‌ ಲಾರೆನ್ಸ್‌ (25) ನಾಯಕನಿಗೆ ಉತ್ತಮ ಬೆಂಬಲ ನೀಡಿದರು. ಇಂಗ್ಲೆಂಡ್‌ ನಿಧಾನವಾಗಿ ಚೇತರಿಸತೊಡಗಿತು.

ಜಸ್‌ಪ್ರೀತ್‌ ಬುಮ್ರಾ 5 ವಿಕೆಟ್‌ ಉರುಳಿಸಿ ಮಿಂಚಿದರು. ಸಿರಾಜ್‌ ಮತ್ತು ಶಾದೂìಲ್‌ ಠಾಕೂರ್‌ ತಲಾ 2 ವಿಕೆಟ್‌ ಉರುಳಿಸಿದರು. ಒಂದು ವಿಕೆಟ್‌ ಶಮಿ ಪಾಲಾಯಿತು.