IND-W vs IRE-W: ಇಂದು ಭಾರತ-ಐರ್ಲೆಂಡ್‌ ವನಿತೆಯರ 2ನೇ ಏಕದಿನ

Team Udayavani, Jan 12, 2025, 6:50 AM IST

ರಾಜ್‌ಕೋಟ್‌: ಸಾಕಷ್ಟು ಬದಲಾವಣೆಗಳಿಂದ ಕೂಡಿದ ಭಾರತೀಯ ವನಿತಾ ಏಕದಿನ ತಂಡವೀಗ ಐರ್ಲೆಂಡ್‌ ವಿರುದ್ಧ ಸರಣಿ ಗೆಲುವಿನ ಹಾದಿಯಲ್ಲಿದೆ.

ಭಾನುವಾರ ಇಲ್ಲಿ ದ್ವಿತೀಯ ಪಂದ್ಯ ಏರ್ಪಡಲಿದ್ದು, ಮೊದಲ ಮುಖಾಮುಖಿಯ ಗೆಲುವಿನ ಸಾಧನೆಯನ್ನು ಸ್ಮತಿ ಮಂಧನಾ ಪಡೆ ಪುನರಾವರ್ತಿಸಿದರೆ ಸರಣಿ ಒಲಿಸಿಕೊಳ್ಳುವುದು ಕಷ್ಟವೇನಲ್ಲ.

ಇದಕ್ಕೂ ಮುನ್ನ ಪ್ರವಾಸಿ ವೆಸ್ಟ್‌ ಇಂಡೀಸ್‌ ಎದುರಿನ 3 ಪಂದ್ಯಗಳ ಸರಣಿಯನ್ನು ಭಾರತ ಕ್ಲೀನ್‌ ಸ್ವೀಪ್ ಆಗಿ ವಶಪಡಿಸಿಕೊಂಡಿತ್ತು. ಇದೀಗ ತವರಿನ ಮತ್ತೂಂದು ಸರಣಿ ಗೆಲುವಿಗೆ ಕ್ಷಣಗಣನೆ ಆರಂಭವಾಗಿದೆ ಎನ್ನಬಹುದು.

ಅಧಿಕಾರಯುತ ಜಯ:

ಶುಕ್ರವಾರದ ಮುಖಾಮುಖಿಯಲ್ಲಿ ಭಾರತ 6 ವಿಕೆಟ್‌ಗಳ ಅಧಿಕಾರಯುತ ಜಯ ಸಾಧಿಸಿತ್ತು. ಆಗಿನ್ನೂ 15 ಓವರ್‌ಗಳಷ್ಟು ಆಟ ಬಾಕಿ ಇತ್ತು. ಸ್ಮತಿ ಮಂಧನಾಗೆ ಸೂಕ್ತ ಆರಂಭಿಕ ಜೋಡಿಯಾಗುವ ಸೂಚನೆ ನೀಡಿರುವ ಪ್ರತೀಕಾ ರಾವಲ್‌, ತೇಜಲ್‌ ಹಸಬ್ನಿಸ್‌ ಅಮೋಘ ಬ್ಯಾಟಿಂಗ್‌ ಪ್ರದರ್ಶನ ನೀಡಿದ್ದರು. ಮಂಧನಾ ಕೂಡ ಹಿಂದಿನ ಸರಣಿಯ ಬ್ಯಾಟಿಂಗ್‌ ಫಾರ್ಮ್ ಮುಂದುವರಿಸುವ ಜತೆಗೆ ನಾಯಕತ್ವವನ್ನು ಯಶಸ್ವಿಯಾಗಿ ನಿಭಾಯಿಸಿದ್ದರು.