ಭಾರತ “ಎ’-ಇಂಗ್ಲೆಂಡ್‌ ಇಲೆವೆನ್‌ ಮೊದಲ ಅಭ್ಯಾಸ ಪಂದ್ಯ ಇಂದು

Team Udayavani, Jan 10, 2017, 3:45 AM IST

ಮುಂಬಯಿ: ಭಾರತ “ಎ’ ಮತ್ತು ಇಂಗ್ಲೆಂಡ್‌ ಇಲೆವೆನ್‌ ತಂಡಗಳ ನಡುವಿನ ಮೊದಲ ಅಭ್ಯಾಸ ಏಕದಿನ ಪಂದ್ಯ ಮಂಗಳವಾರ ಬ್ರೆಬೋರ್ನ್ ಸ್ಟೇಡಿಯಂನಲ್ಲಿ ನಡೆಯಲಿದೆ. ಮಹೇಂದ್ರ ಸಿಂಗ್‌ ಧೋನಿ ಕೊನೆಯ ಸಲ ಭಾರತ ತಂಡವೊಂದರ ಸಾರಥ್ಯ ವಹಿಸುವುದನ್ನು ಅಭಿಮಾನಿಗಳಿಲ್ಲಿ ಕಣ್ತುಂಬಿ ಕೊಳ್ಳಬಹುದು.

ಸುದ್ದಿ ಸಂಸ್ಥೆ ಹಾಗೂ ಇತರ ವೆಬ್‌ಸೈಟ್‌ಗಳು ಪ್ರಕಟಿಸಿದ ದಿನಾಂಕದ ಗೊಂದಲದಿಂದಾಗಿ ಈ ಪಂದ್ಯ ಸೋಮವಾರ ನಡೆಯುತ್ತದೆಂದು ವರದಿಯಾಗಿತ್ತು. ಜ. 15ರಂದು ಆರಂಭವಾಗಲಿರುವ ಏಕದಿನ ಸರಣಿಗೂ ಮುನ್ನ ಪ್ರವಾಸಿ ಇಂಗ್ಲೆಂಡ್‌ ತಂಡಕ್ಕೆ 2 ಅಭ್ಯಾಸ ಪಂದ್ಯಗಳನ್ನು ಆಯೋಜಿಸಲಾಗಿದೆ. ಇನ್ನೊಂದು ಪಂದ್ಯ ಜ. 12ರಂದು ಇದೇ ಅಂಗಳದಲ್ಲಿ ನಡೆಯಲಿದೆ. ಇದು ಹಗಲು ಪಂದ್ಯವಾಗಿದ್ದು, ಭಾರತ “ಎ’ ತಂಡವನ್ನು ಅಜಿಂಕ್ಯ ರಹಾನೆ ಮುನ್ನಡೆಸಲಿದ್ದಾರೆ.

ಟೀಮ್‌ ಇಂಡಿಯಾಕ್ಕೆ ಮರಳಿ ಆಯ್ಕೆಯಾಗಿರುವ ಯುವರಾಜ್‌ ಸಿಂಗ್‌, ಆಶಿಷ್‌ ನೆಹ್ರಾ, ಶಿಖರ್‌ ಧವನ್‌ ಅವರ ಫಾರ್ಮ್ ಪ್ರದರ್ಶನಕ್ಕೆ ಈ ಪಂದ್ಯಗಳು ವೇದಿಕೆಯಾಗಲಿವೆ.