Hockey; ಭಾರತ-ಜರ್ಮನಿ: ಎರಡು ಪಂದ್ಯಗಳ ಹಾಕಿ ಸರಣಿ

Team Udayavani, Sep 24, 2024, 11:12 PM IST

ಹೊಸದಿಲ್ಲಿ: ಭಾರತ ಮತ್ತು ಜರ್ಮನಿ ತಂಡಗಳ ನಡುವೆ 2 ಪಂದ್ಯಗಳ ಹಾಕಿ ಸರಣಿ ಮುಂದಿನ ತಿಂಗಳು ಹೊಸದಿಲ್ಲಿಯಲ್ಲಿ ನಡೆಯಲಿದೆ. ಅ. 23 ಮತ್ತು 24ರಂದು ರಾಜಧಾನಿಯ “ಮೇಜರ್‌ ಧ್ಯಾನ್‌ ಚಂದ್‌ ನ್ಯಾಶನಲ್‌ ಸ್ಟೇಡಿಯಂ’ನಲ್ಲಿ ಈ ಪಂದ್ಯಗಳನ್ನು ಆಡಲಾಗುವುದು ಎಂದು “ಹಾಕಿ ಇಂಡಿಯಾ’ ಮಂಗಳವಾರ ತಿಳಿಸಿದೆ.

“ಇವೆರಡೂ ವಿಶ್ವದ ಬಲಿಷ್ಠ ಹಾಕಿ ತಂಡಗಳು. ಎರಡೂ ದೇಶಗಳು ಕ್ರೀಡೆಯಲ್ಲಿ ಶ್ರೀಮಂತ ಇತಿಹಾಸವನ್ನು ಹೊಂದಿವೆ. ಈ ಸರಣಿ ವಿಶ್ವ ದರ್ಜೆಯ ಹಾಕಿಯ ಅಮೋಘ ಪ್ರದರ್ಶನವೊಂದಕ್ಕೆ ಸಾಕ್ಷಿಯಾಗಲಿದೆ. ಅಸಾಮಾನ್ಯ ತಂಡಗಳೆರಡರ ನಡುವಿನ ಈ ಸ್ಪರ್ಧೆ ಹಾಕಿ ಅಭಿಮಾನಿಗಳ ಪಾಲಿಗೆ ಧಾರಾಳ ರಂಜನೆ ಒದಗಿಸಲಿದೆ’ ಎಂದು ಹಾಕಿ ಇಂಡಿಯಾದ ಅಧ್ಯಕ್ಷ ದಿಲೀಪ್‌ ತಿರ್ಕಿ ಹೇಳಿದರು.

“ಜರ್ಮನಿ ಎದುರಿನ ಪಂದ್ಯ ಯಾವತ್ತೂ ರೋಮಾಂಚಕಾರಿಯಾಗಿರುತ್ತದೆ. ನಮ್ಮ ಆಟಗಾರರು ಇಂಥದೊಂದು ಉತ್ತಮ ತಂಡದೆದುರು ಆಡಲು ಕಾದು ನಿಂತಿದ್ದಾರೆ’ ಎಂಬುದು ಹಾಕಿ ಇಂಡಿಯಾ ಕಾರ್ಯದರ್ಶಿ ಭೋಲಾನಾಥ್‌ ಸಿಂಗ್‌ ಅವರ ಹೇಳಿಕೆ.

ಭಾರತ-ಜರ್ಮನಿ ಕೊನೆಯ ಸಲ ಪ್ಯಾರಿಸ್‌ ಒಲಿಂಪಿಕ್ಸ್‌ ಸೆಮಿಫೈನಲ್‌ನಲ್ಲಿ ಎದುರಾಗಿದ್ದವು. ಅಲ್ಲಿ ಯುರೋಪಿಯನ್‌ ಜೈಂಟ್ಸ್‌ ಖ್ಯಾತಿಯ ಜರ್ಮನಿ 3-2 ಗೋಲುಗಳಿಂದ ಹರ್ಮನ್‌ಪ್ರೀತ್‌ ಸಿಂಗ್‌ ಪಡೆಯನ್ನು ಪರಾಭವಗೊಳಿಸಿತ್ತು.