ಭಾರತ-ಕಿವೀಸ್‌ ಟೆಸ್ಟ್‌  ವಿಶ್ವಕಪ್‌ ಫೈನಲ್‌ : 4 ಸಾವಿರ ಪ್ರೇಕ್ಷಕರಿಗೆ ಅನುಮತಿ

Team Udayavani, May 21, 2021, 7:10 AM IST

ಸೌತಾಂಪ್ಟನ್‌: ಭಾರತ-ನ್ಯೂಜಿಲ್ಯಾಂಡ್‌ ನಡುವಿನ ಐಸಿಸಿ ವಿಶ್ವ ಟೆಸ್ಟ್‌ ಚಾಂಪಿಯನ್‌ಶಿಪ್‌ ಫೈನಲ್‌ ಪಂದ್ಯ 4,000 ವೀಕ್ಷಕರ ಸಮ್ಮುಖದಲ್ಲಿ ನಡೆಯಲಿದೆ ಎಂದು ಹ್ಯಾಂಪಶೈರ್‌ ಕೌಂಟಿ ಕ್ಲಬ್‌ನ ಮುಖ್ಯಸ್ಥ ರಾಡ್‌ ಬ್ರಾನ್ಸ್‌ ಗ್ರೋವ್‌ ತಿಳಿಸಿದ್ದಾರೆ.

“ಬ್ರಿಟನ್‌ನಲ್ಲಿ ಕೋವಿಡ್‌-19 ಪರಿಸ್ಥಿತಿ ಸುಧಾರಿಸಿದೆ. ಇತ್ತೀಚೆಗಷ್ಟೇ ಲೀಸೆಸ್ಟಶೈರ್‌-ಹ್ಯಾಂಪಶೈರ್‌ ಕೌಂಟಿ ಪಂದ್ಯಕ್ಕೆ ಒಂದೂವರೆ ಸಾವಿರ ಪ್ರೇಕ್ಷಕರಿಗೆ ಅನುಮತಿ ನೀಡಲಾಗಿತ್ತು. ಇದೀಗ ಜೂ. 18ರಿಂದ ನಡೆಯಲಿರುವ ವಿಶ್ವಕಪ್‌ ಟೆಸ್ಟ್‌ ಫೈನಲ್‌ ಪಂದ್ಯಕ್ಕೂ ವೀಕ್ಷರಿಗೆ ಅನುಮತಿ ನೀಡಲಾಗುವುದು’ ಎಂದು ಬ್ರಾನ್ಸ್‌ಗ್ರೋವ್‌ ತಿಳಿಸಿದರು.

“2019ರ ಸೆಪ್ಟೆಂಬರ್‌ ಬಳಿಕ ಇಂಗ್ಲೆಂಡ್‌ನ‌ಲ್ಲಿ ಇದೇ ಮೊದಲ ಬಾರಿ ನಾಲ್ಕು ದಿನಗಳ ಕೌಂಟಿ ಕ್ರಿಕೆಟ್‌ ಪ್ರಾರಂಭಿಸಿದ್ದೇವೆ. ಈ ಪಂದ್ಯಕ್ಕೂ ಪ್ರೇಕ್ಷಕರಿಗೆ ಅವಕಾಶ ಕಲ್ಪಿಸಲಾಗಿದೆ. ಈ ಮೂಲಕ ಕೊರೊನಾ ಪೂರ್ವದಂತೆ ಮತ್ತೆ ಇಂಗ್ಲೆಂಡ್‌ನ‌ಲ್ಲಿ ಕ್ರಿಕೆಟ್‌ ಚಟುವಟಿಕೆ ಆರಂಭಗೊಳ್ಳಲಿದೆ’ ಎಂದರು.

ಮಾರಾಟಕ್ಕೆ 2 ಸಾವಿರ ಟಿಕೆಟ್‌ :

“ಶೇ. 50 ರಷ್ಟು ಟಿಕೆಟ್‌ಗಳನ್ನು ಐಸಿಸಿ ತನ್ನ ಪ್ರಾಯೋಜಕರಿಗೆ ಹಾಗೂ ಇತರ ಪಾಲುದಾರರಿಗೆ ನೀಡುತ್ತದೆ. ಉಳಿದ ಎರಡು ಸಾವಿರ ಟಿಕೆಟ್‌ಗಳನ್ನು ನಾವು ಮಾರಾಟ ಮಾಡುತ್ತೇವೆ. ಈಗಾಗಲೇ ಎರಡು ಪಟ್ಟು ಅಭಿಮಾನಿಗಳಿಂದ ಅರ್ಜಿ ಗಳನ್ನು ಸ್ವೀಕರಿಸಲಾಗಿದೆ’ ಎಂದು ಬ್ರಾನ್ಸ್‌ಗ್ರೋವ್‌ ಮಾಹಿತಿ ನೀಡಿದರು.

ಭಾರತ್‌ ಆರ್ಮಿ ರೆಡಿ! :

ವಿಶ್ವಕಪ್‌ ಫೈನಲ್‌ ಪಂದ್ಯಕ್ಕೆ 4 ಸಾವಿರ ವೀಕ್ಷಕರಿಗೆ ಪ್ರವೇಶ ನೀಡಲು ನಿರ್ಧರಿಸಿದ ಬೆನ್ನಲ್ಲೇ ಭಾರತೀಯ ಕ್ರಿಕೆಟ್‌ ತಂಡದ ಬೆಂಬಲಕ್ಕಿರುವ “ಭಾರತ್‌ ಆರ್ಮಿ’ ಭಾರೀ ಸಂತಸ ವ್ಯಕ್ತಪಡಿಸಿದೆ. ಇಂಗ್ಲೆಂಡ್‌ನ‌ಲ್ಲಿರುವ ಈ ಅಭಿಮಾನಿಗಳ ಬಳಗ ಭಾರತ ತಂಡಕ್ಕೆ ಚಿಯರ್ ಹೇಳಲು ಸ್ಟೇಡಿಯಂಗೆ ತೆರಳಲು ನಿರ್ಧರಿಸಿದ್ದಾಗಿ ಭಾರತ್‌ ಆರ್ಮಿಯ ಸಂಸ್ಥಾಪಕ ರಾಕೇಶ್‌ ಪಟೇಲ್‌ ಹೇಳಿದ್ದಾರೆ.

ಕೇವಲ 48 ಗಂಟೆಗಳಲ್ಲಿ ಭಾರತ್‌ ಆರ್ಮಿ ಕಡೆಯಿಂದ ಟಿಕೆಟ್‌ಗಾಗಿ ಎರಡು ಸಾವಿರ ಅರ್ಜಿ ಬಂದಿದೆ.