ಒಂದೇ ವಿಮಾನ ಏರಲಿರುವ ಹಿರಿಯ-ಕಿರಿಯ ಕ್ರಿಕೆಟಿಗರು

Team Udayavani, Dec 24, 2017, 6:55 AM IST

ಮುಂಬಯಿ: ಇದೇ ಮೊದಲ ಬಾರಿಗೆ ಭಾರತದ ಕಿರಿಯ ಕ್ರಿಕೆಟಿಗರಿಗೆ ಸೀನಿಯರ್ ತಂಡದ ಜತೆ ವಿಮಾನದಲ್ಲಿ ಪ್ರಯಾಣಿಸುವ ಅವಕಾಶವೊಂದು ಎದುರಾಗಿದೆ. ಈ ತಿಂಗಳ ಕೊನೆಯಲ್ಲಿ ಈ ಪ್ರಯಾಣಕ್ಕೆ ಅವಕಾಶ ಕೂಡಿಬರಲಿದೆ.

ವಿರಾಟ್‌ ಕೊಹ್ಲಿ ನಾಯಕತ್ವದ ಹಿರಿಯರ ತಂಡ ದಕ್ಷಿಣ ಆಫ್ರಿಕಾಕ್ಕೆ ತೆರಳಲಿದ್ದು, ಇದೇ ವೇಳೆ ಅಂಡರ್‌-19 ತಂಡದ ಸದಸ್ಯರು ಕಿರಿಯರ ವಿಶ್ವಕಪ್‌ ಪಂದ್ಯಾವಳಿಗಾಗಿ ನ್ಯೂಜಿಲ್ಯಾಂಡಿಗೆ ಪಯಣಿಸಲಿದ್ದಾರೆ. ಎರಡೂ ತಂಡಗಳ ಆಟಗಾರರು ಡಿ. 28ರ ಬೆಳಗ್ಗೆ 4 ಗಂಟೆಗೆ “ಎಮಿರೇಟ್ಸ್‌ ಏರ್‌ಲೈನ್‌’ ವಿಮಾನದಲ್ಲಿ ದುಬಾೖಗೆ ಪ್ರಯಾಣಿಸಲಿದ್ದಾರೆ. ಇತ್ತಂಡಗಳಿಗೆ ದುಬಾೖ “ಸ್ಟಾಪ್‌ ಓವರ್‌’ ನಿಲ್ದಾಣವಾಗಲಿದ್ದು, ಇಲ್ಲಿ ವಿಮಾನ ಬದಲಾಯಿಸಿ ಬೇರೆ ಬೇರೆ ದಿಕ್ಕಿಗೆ ಪ್ರಯಾಣ ಮುಂದುವರಿಸಲಾಗುವುದು.

ಭಾರತದ ಕ್ರಿಕೆಟ್‌ ಇತಿಹಾಸದಲ್ಲಿ ಸೀನಿಯರ್-ಜೂನಿಯರ್ ತಂಡಗಳೆರಡೂ ಒಂದೇ ವಿಮಾನದಲ್ಲಿ ವಿದೇಶಕ್ಕೆ ಸಂಚರಿಸುತ್ತಿರುವುದು ಇದೇ ಮೊದಲು. ಆದರೆ ಇತ್ತಂಡಗಳ ಪ್ರಯಾಣ ದರ್ಜೆ ಮಾತ್ರ ಬೇರೆ ಬೇರೆ. ಕೊಹ್ಲಿ ಪಡೆ ಬ್ಯುಸಿನೆಸ್‌ ಕ್ಲಾಸ್‌ನಲ್ಲಿ ಪಯಣಿಸಿದರೆ, ಕಿರಿಯರು ಇಕಾನಮಿ ಕ್ಲಾಸ್‌ನಲ್ಲಿ ಪ್ರಯಾಣಿಸುವರು.

ಅಂಡರ್‌-19 ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾವಳಿ ಜ. 13ರಿಂದ ಆರಂಭವಾಗುವುದಾದರೂ ನ್ಯೂಜಿಲ್ಯಾಂಡ್‌ ವಾತಾವರಣಕ್ಕೆ ಹೊಂದಿಕೊಳ್ಳುವ ಸಲುವಾಗಿ 2 ವಾರ ಮೊದಲೇ ತಂಡವನ್ನು ಕಳುಹಿಸುವುದು ಬಿಸಿಸಿಐ ಯೋಜನೆ. ಕೋಚ್‌ ರಾಹುಲ್‌ ದ್ರಾವಿಡ್‌ ಕೂಡ ತಂಡದೊಂದಿಗೇ ತೆರಳುವರು. ಮುಂಬಯಿಯ ಉದಯೋನ್ಮುಖ ಬ್ಯಾಟ್ಸ್‌ಮನ್‌ ಪೃಥ್ವಿ ಷಾ ವಿಶ್ವಕಪ್‌ನಲ್ಲಿ ಭಾರತ ತಂಡವನ್ನು ಮುನ್ನಡೆಸಲಿದ್ದಾರೆ.