ಹಾಕಿ ವಿಶ್ವ ಲೀಗ್‌ ಫೈನಲ್‌: ಸೆಮಿಫೈನಲ್‌ನಲ್ಲಿ ಭಾರತಕ್ಕೆ ಸೋಲು

Team Udayavani, Dec 9, 2017, 11:21 AM IST

ಭುವನೇಶ್ವರ: ವಿಶ್ವದ ನಂಬರ್‌ ವನ್‌ ಖ್ಯಾತಿಯ ಆರ್ಜೆಂಟೀನಾ ವಿರುದ್ಧ ಭಾರತ ತಂಡ ಹಾಕಿ ವಿಶ್ವ ಲೀಗ್‌ ಫೈನಲ್‌ ಕೂಟದ ಸೆಮಿಫೈನಲ್‌ ಪಂದ್ಯದಲ್ಲಿ 0-1 ಗೋಲಿನಿಂದ ಸೋಲುಂಡಿದೆ. ಆದರೂ ತನ್ನ ಪ್ರಬಲ ಹೋರಾಟದಿಂದ ಅಭಿಮಾನಿಗಳ ಮನಗೆದ್ದಿದೆ. ಪಂದ್ಯದ ಕೊನೆಯವರೆಗೆ ಭಾರತ ಪ್ರಬಲವಾಗಿ ಹೋರಾಟ ಸಂಘಟಿಸಿತು. ಸದ್ಯ ಭಾರತ ಡಿ.10ರಂದು ಕಂಚಿನ ಪದಕಕ್ಕಾಗಿ ಹೋರಾಟ ನಡೆಸಲಿದೆ.

ಶುಕ್ರವಾರ ಇಲ್ಲಿ ನಡೆದ ಪಂದ್ಯದಲ್ಲಿ ಭಾರತ ತವರಿನ ಅಂಕಣದ ಲಾಭ ಪಡೆದು ಫೈನಲ್‌ ಪ್ರವೇಶಿಸುವ ಭರವಸೆ ಮೂಡಿಸಿತ್ತು. ಆದರೆ ಪಂದ್ಯ ಆರಂಭವಾಗಿ 17ನೇ ನಿಮಿಷದಲ್ಲಿಯೇ ಭಾರತದ ಆಸೆಗೆ ಹಿನ್ನಡೆ ಉಂಟಾಯಿತು. ಈ ಹಂತದಲ್ಲಿ ಸಿಕ್ಕ ಪೆನಾಲ್ಟಿ ಕಾರ್ನರ್‌ ಅವಕಾಶವನ್ನು ಆರ್ಜೆಂಟೀನಾ ಅತ್ಯುತ್ತಮವಾಗಿ ಬಳಸಿಕೊಂಡಿತು. ಗೊಂಜಾಲೊ ಪಿಲ್ಲಟ್‌ ಚೆಂಡನ್ನು ಆಕರ್ಷಕವಾಗಿ ಬಲೆಯೊಳಗೆ ಸೇರಿಸುವಲ್ಲಿ ಯಶಸ್ವಿಯಾದರು. ಇದರಿಂದ ಆರ್ಜೆಂಟೀನಾ 1-0 ಗೋಲಿನಿಂದ ಮುನ್ನಡೆ ಪಡೆಯಿತು. ಇದೊಂದೇ ಪಂದ್ಯದಲ್ಲಿ ದಾಖಲಾದ ಗೋಲೆನ್ನುವುದು ಗಮನಾರ್ಹ. ಅನಂತರದ ಹಂತದಲ್ಲಿ ತುಂತುರು ಮಳೆಯಲ್ಲಿಯೇ ಉಭಯ ತಂಡಗಳು ಭರ್ಜರಿ ಹೋರಾಟ ಪ್ರದರ್ಶಿಸಿದವು. ಆದರೆ ಯಾವುದೇ ಗೋಲು ದಾಖಲಾಗಲಿಲ್ಲ.