ODI; ಪ್ರವಾಸಿ ಆಸ್ಟ್ರೇಲಿಯ ವಿರುದ್ಧ ಮೊದಲ ಪಂದ್ಯದಲ್ಲಿ ಟೀಮ್ ಇಂಡಿಯಾಕ್ಕೆ ಅಮೋಘ ಜಯ

Team Udayavani, Sep 22, 2023, 9:48 PM IST

ಮೊಹಾಲಿ: ಇಲ್ಲಿ  ಶುಕ್ರವಾರ ನಡೆದ  ಮೂರು ಪಂದ್ಯಗಳ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ತಂಡ ಪ್ರವಾಸಿ ಆಸ್ಟ್ರೇಲಿಯ ವಿರುದ್ಧ ಭರ್ಜರಿ ಗೆಲುವು ಸಾಧಿಸಿದೆ.

ಟಾಸ್ ಗೆದ್ದ ಭಾರತ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಆಸ್ಟ್ರೇಲಿಯ 50 ಓವರ್ ಗಳನ್ನೂ ಆಡಿ 276 ಕ್ಕೆ ಎಲ್ಲಾ ವಿಕೆಟ್ ಗಳನ್ನು ಕಳೆದುಕೊಂಡಿತು. ಗುರಿ ಬೆನ್ನಟ್ಟಿದ ಭಾರತ 48.4 ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 281ರನ್ ಗಳಿಸಿ ಅಮೋಘ ಜಯ ಸಾಧಿಸಿತು.

ಮಿಚೆಲ್ ಮಾರ್ಷ್ 4 ರನ್ ಗಳಿಸಿ ಔಟಾದರು.ತಂಡಕ್ಕೆ ಆಧಾರವಾದ ಡೇವಿಡ್ ವಾರ್ನರ್ 52 ರನ್ ಗಳಿಸಿದ್ದ ವೇಳೆ ಔಟಾದರು. ಸ್ಟೀವನ್ ಸ್ಮಿತ್ 41 ರನ್ , ಮಾರ್ನಸ್ ಲಬುಶೇನ್ 39 , ಕ್ಯಾಮೆರಾನ್ ಗ್ರೀನ್ 31, ಜೋಶ್ ಇಂಗ್ಲಿಸ್ 45 , ಮಾರ್ಕಸ್ ಸ್ಟೊಯಿನಿಸ್ 29, ಮ್ಯಾಥ್ಯೂ ಶಾರ್ಟ್ 2 , ನಾಯಕ ಪ್ಯಾಟ್ ಕಮ್ಮಿನ್ಸ್ ಔಟಾಗದೆ 21 ರನ್ ಗಳಿಸಿ ತಂಡ ಗೌರವಯುತ ಮೊತ್ತ ಕಲೆ ಹಾಕಲು ಕಾರಣವಾದರು.

ಶಮಿ 51 ಕ್ಕೆ 5 ವಿಕೆಟ್ ಪಡೆದು ಉತ್ತಮ ಸಾಧನೆ ತೋರಿದರು. ಬುಮ್ರಾ, ಅಶ್ವಿನ್, ಜಡೇಜಾ ತಲಾ ಒಂದು ವಿಕೆಟ್ ಪಡೆದರು.

ಅಮೋಘ ಆರಂಭ

277 ರನ್ ಗಳ ಗುರಿ ಬೆನ್ನಟ್ಟಿದ ಭಾರತಕ್ಕೆ ಆರಂಭಿಕರಾದ ಶುಭಮನ್ ಗಿಲ್ ಮತ್ತು ರುತುರಾಜ್ ಗಾಯಕ್ವಾಡ್ ಅತ್ಯಮೋಘ ಆರಂಭ ಒದಗಿಸಿಕೊಟ್ಟರು. 21.4 ಓವರ್ ಗಳಲ್ಲಿ 142 ರನ್ ಗಳ ಜತೆಯಾಟವಾಡಿದರು. 71 ರನ್ ಗಳಿಸಿದ್ದ(77ಎಸೆತ, 10ಬೌಂಡರಿ) ಗಾಯಕ್ವಾಡ್ ಅವರನ್ನು ಝಂಪಾ ಎಲ್ಬಿಡಬ್ಲ್ಯೂ ಮೂಲಕ ಔಟ್ ಮಾಡಿದರು.3 ರನ್ ಗಳಿಸಿದ್ದ ಶ್ರೇಯಸ್ ಅಯ್ಯರ್ ರನ್ ಔಟ್ ಆಗಿ ಭಾರಿ ನಿರಾಸೆ ಅನುಭವಿಸಿದರು. 74 ರನ್ ಗಳಿಸಿದ್ದ ಗಿಲ್ ಅವರನ್ನು ಝಂಪಾ ಬೌಲ್ಡ್ ಮಾಡಿದರು. ಉತ್ತಮ ಇನ್ನಿಂಗ್ಸ್ ಆಡಿದ ಗಿಲ್ 63 ಎಸೆತಗಳಲ್ಲಿ 74 ರನ್ ಗಳಿಸಿದರು. 6 ಬೌಂಡರಿ ಮತ್ತು 2 ಆಕರ್ಷಕ ಸಿಕ್ಸರ್ ಬಾರಿಸಿದ್ದರು. ಇಶಾನ್ ಕಿಶನ್ 18 ರನ್ ಗಳಿಸಿ ಔಟಾದರು.ಸೂರ್ಯಕುಮಾರ್ ಯಾದವ್ 50 ರನ್ ಗಳಿಸಿ ಔಟಾದರು. ಕೆಎಲ್ ರಾಹುಲ್ ಔಟಾಗದೆ 58 ರನ್ ಗಳಿಸಿದರು.